| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೧೬. ವಚ್ಚಪಸ್ಸಾವಟ್ಠಾನಿಕನಿದ್ದೇಸವಣ್ಣನಾ
16. Vaccapassāvaṭṭhānikaniddesavaṇṇanā
೧೫೬. ವಚ್ಚಪಸ್ಸಾವಟ್ಠಾನಿಕನ್ತಿ ಠಾನಮ್ಹಿ ಠಾನೇ ವಾ ಭವಂ ವಚ್ಚಪಸ್ಸಾವಟ್ಠಾನಿಕಂ। ಯಥಾವುಡ್ಢಂ ವಚ್ಚಂ ನ ಕರೇಯ್ಯಾತಿ ಸಮ್ಬನ್ಧೋ। ಯೇ ಯೇ ವುಡ್ಢಾ ಯಥಾವುಡ್ಢಂ, ಆಗತಪ್ಪಟಿಪಾಟಿಂ ಹಿತ್ವಾ ವುಡ್ಢಪ್ಪಟಿಪಾಟಿಯಾತಿ ಅತ್ಥೋ। ವಚ್ಚನ್ತಿ ಉಪಲಕ್ಖಣಮತ್ತಂ, ಪಸ್ಸಾವಞ್ಚ ನಹಾನಞ್ಚ ನ ಕರೇಯ್ಯಾತಿ ಅಧಿಪ್ಪಾಯೋ। ತದೇವ ಸಮತ್ಥೇತಿ ‘‘ಯಾತಾನುಪುಬ್ಬಿಯಾ’’ತಿಆದಿನಾ। ಯಾತಾನುಪುಬ್ಬಿಯಾತಿ ಯಾತಾನಂ ಗತಾನಂ ಅನುಪುಬ್ಬಿ ಅನುಕ್ಕಮೋ ಯಾತಾನುಪುಬ್ಬಿ, ತಾಯ। ವಚ್ಚ…ಪೇ॰… ತಿತ್ಥಞ್ಚಾತಿ ಏತಂ ತಯಂ ಲಬ್ಭತೀತಿ ಅತ್ಥೋ, ಭಿಕ್ಖುನಾತಿ ವಿಞ್ಞಾಯತಿ।
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
೧೫೭. ಉಬ್ಭಜಿತ್ವಾ ಚ ಸಹಸಾ ಚ ನೋ ಪವಿಸೇಯ್ಯಾತಿ ಸಮ್ಬನ್ಧೋ। ಉಬ್ಭಜಿತ್ವಾತಿ ಚೀವರಂ ದೂರತೋವ ಉಕ್ಖಿಪಿತ್ವಾ। ಸಹಸಾತಿ ಸೀಘಂ। ಉಕ್ಕಾಸಿತ್ವಾ ಪವಿಸೇಯ್ಯಾತಿ ಯೋಜನಾ।
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
೧೫೮. ವಚ್ಚಪಸ್ಸಾವದೋಣೀನಂ ಬಹೀತಿ ಸಮ್ಬನ್ಧೋ। ಉಭಯನ್ತಿ ವಚ್ಚಮ್ಪಿ ಪಸ್ಸಾವಮ್ಪಿ।
158. Vaccapassāvadoṇīnaṃ bahīti sambandho. Ubhayanti vaccampi passāvampi.
೧೫೯. ಕೂಪೇತಿ ವಚ್ಚಾವಾಟೇ। ಕಟ್ಠನ್ತಿ ಅವಲೇಖನಕಟ್ಠಂ। ಫರುಸೇನಾತಿ ಖರೇನ ಅವಲೇಖನಕಟ್ಠೇನ। ಉಹತಞ್ಚಾಪೀತಿ ಅತ್ತನಾ ವಾ ಪರೇನ ವಾ ಉಹತಞ್ಚಾಪಿ ವಚ್ಚಮಕ್ಖಿತಞ್ಚಾಪೀತಿ ಅತ್ಥೋ। ಧೋವಯೇತಿ ಸತಿ ಉದಕೇ, ಉದಕೇ ಅಸತಿ ಕಟ್ಠೇನಪಿ ಸೋಧೇಯ್ಯ।
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
೧೬೦. ನ ನಿಕ್ಖಮೇತಿ ನ ನಿಕ್ಖಮೇಯ್ಯ। ಚಪು ಚಪೂತಿ ಅನುಕರಣಂ, ವಿಚ್ಛಾಯಂ ದ್ವಿತ್ತೇ ಚಪು ಚಪು ಕತ್ವಾತಿ ಕಿರಿಯಾವಿಸೇಸನಂ। ನಾಚಮೇಯ್ಯಾತಿ ನ ಧೋವೇಯ್ಯ। ಸತಿ ಪನ ಉದಕೇ ಆಚಮಿತಬ್ಬಂ, ಅಸತಿ ಯೇನ ಕೇನಚಿ ಪುಞ್ಛಿತ್ವಾ ಗನ್ತಬ್ಬಂ, ಸಬ್ಬಸಾಧಾರಣಟ್ಠಾನೇ ಚ ಆಚಮನಕುಮ್ಭಿಯಾ ಉದಕಂ ನ ಸೇಸೇತಬ್ಬಂ। ಉಕ್ಲಾಪನ್ತಿ ಕಚವರಂ। ವಿಸೋಧಯೇತಿ ವಿಹಾರಸೋಧನೇ ವಿಯ ವಚ್ಚಪಸ್ಸಾವಕುಟಿಯೋ, ಪರಿವೇಣಕೋಟ್ಠಕೇ ಚ ಸಮ್ಮಜ್ಜೇಯ್ಯ। ಸಬ್ಬತ್ಥೇವ ಚ ಪನ ವತ್ತಭೇದೇ ದುಕ್ಕಟಂ।
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
ವಚ್ಚಪಸ್ಸಾವಟ್ಠಾನಿಕನಿದ್ದೇಸವಣ್ಣನಾ ನಿಟ್ಠಿತಾ।
Vaccapassāvaṭṭhānikaniddesavaṇṇanā niṭṭhitā.
