| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၁၆. ဝစ္စပ္ပသ္သာဝဋ္ဌာနိကနိဒ္ဒေသဝဏ္ဏနာ
16. Vaccappassāvaṭṭhānikaniddesavaṇṇanā
၁၅၆. ယထာဝုဍ္ဎံ န ကရေယ္ယ ဝစ္စန္တိ သမ္ဗန္ဓော။ ယထာနုပုဗ္ဗိယာ လဗ္ဘတီတိ သမ္ဗန္ဓော။ ဣမေသု ပန တီသု ဌာနေသု ယော ယော ပဌမံ အာဂစ္ဆတိ ဝုဍ္ဎော ဝာ နဝော ဝာ, သော သော အာဂတပဋိပာဋိယာ ကာတုဉ္စ နဟာယိတုဉ္စ လဗ္ဘတီတိ အဓိပ္ပာယော။
156. Yathāvuḍḍhaṃ na kareyya vaccanti sambandho. Yathānupubbiyā labbhatīti sambandho. Imesu pana tīsu ṭhānesu yo yo paṭhamaṃ āgacchati vuḍḍho vā navo vā, so so āgatapaṭipāṭiyā kātuñca nahāyituñca labbhatīti adhippāyo.
၁၅၇. ဥဗ္ဘဇိတ္ဝာတိ (စူဠဝ. ၃၇၃, ၃၇၄) နိဝာသနံ ဒူရတောဝ ဥက္ခိပိတ္ဝာ နော ပဝိသေယ္ယ။ သဟသာ စ နော ပဝိသေယ္ယာတိ သမ္ဗန္ဓော။ ‘‘ဗဟိ ဌိတေန ဥက္ကာသိတဗ္ဗ’’န္တိ စ ‘‘သာဓုကံ အတရမာနေန ဝစ္စကုဋိ ပဝိသိတဗ္ဗာ’’တိ စ ဝုတ္တတ္တာ ဥက္ကာသိတ္ဝာဝ အတရမာနော ပဝိသေယ္ယာတိ အတ္ထော။ ‘‘န ဥဗ္ဘဇိတ္ဝာ ပဝိသိတဗ္ဗာ, ဝစ္စပာဒုကာယ ဌိတေန ဥဗ္ဘဇိတဗ္ဗ’’န္တိ (စူဠဝ. ၃၇၄) ဝစနတော ‘‘ဥဗ္ဘဇေယ္ယ ပာဒုကာသ္ဝေဝ သဏ္ဌိတော’’တိ ဝုတ္တံ။
157.Ubbhajitvāti (cūḷava. 373, 374) nivāsanaṃ dūratova ukkhipitvā no paviseyya. Sahasā ca no paviseyyāti sambandho. ‘‘Bahi ṭhitena ukkāsitabba’’nti ca ‘‘sādhukaṃ ataramānena vaccakuṭi pavisitabbā’’ti ca vuttattā ukkāsitvāva ataramāno paviseyyāti attho. ‘‘Na ubbhajitvā pavisitabbā, vaccapādukāya ṭhitena ubbhajitabba’’nti (cūḷava. 374) vacanato ‘‘ubbhajeyya pādukāsveva saṇṭhito’’ti vuttaṃ.
၁၅၈. န ကရေယ္ယ ဥဘယံ န ကရေယ္ယုဘယံ။
158. Na kareyya ubhayaṃ na kareyyubhayaṃ.
၁၅၉. ကူပေတိ (စူဠဝ. ၃၇၄) ဝစ္စကူပေ။ ကဋ္ဌန္တိ အဝလေခနကဋ္ဌံ။ ပသ္သာဝဒောဏိယာ ခေဠံ န ကာတဗ္ဗန္တိ အတ္ထော။ နာဝလေခေယ္ယ ဖရုသေနာတိ ဖာလိတကဋ္ဌေန ဝာ ခရေန ဝာ ဂဏ္ဌိကေန ဝာ ကဏ္ဋကေန ဝာ သုသိရေန ဝာ ပူတိနာ ဝာ နာဝလေခိတဗ္ဗန္တိ အတ္ထော။ ဥဟတဉ္စာပီတိ ဂူထမက္ခိတမ္ပိ ဓောဝယေ အတ္တနာ ဝာ ပရေန ဝာ ကတန္တိ အဓိပ္ပာယော။
159.Kūpeti (cūḷava. 374) vaccakūpe. Kaṭṭhanti avalekhanakaṭṭhaṃ. Passāvadoṇiyā kheḷaṃ na kātabbanti attho. Nāvalekheyya pharusenāti phālitakaṭṭhena vā kharena vā gaṇṭhikena vā kaṇṭakena vā susirena vā pūtinā vā nāvalekhitabbanti attho. Uhatañcāpīti gūthamakkhitampi dhovaye attanā vā parena vā katanti adhippāyo.
၁၆၀. ဥဗ္ဘဇိတ္ဝာ န နိက္ခမေတိ ဧတ္ထ ‘‘ဝစ္စပာဒုကာယ ဌိတေန ပဋိစ္ဆာဒေတဗ္ဗ’’န္တိ (စူဠဝ. ၃၇၄) ဟိ ဝုတ္တံ, ပုန ‘‘အာစမနပာဒုကာယံ ဌိတေန ဥဗ္ဘဇိတဗ္ဗ’’န္တိ (စူဠဝ. ၃၇၄) စ ဝုတ္တံ။ ‘‘စပု စပူ’’တိ သဒ္ဒံ ကတ္ဝာ နာစမေယ္ယာတိ အတ္ထော။ ဝစ္စပ္ပသ္သာဝဋ္ဌာနိကဝိနိစ္ဆယော။
160.Ubbhajitvā na nikkhameti ettha ‘‘vaccapādukāya ṭhitena paṭicchādetabba’’nti (cūḷava. 374) hi vuttaṃ, puna ‘‘ācamanapādukāyaṃ ṭhitena ubbhajitabba’’nti (cūḷava. 374) ca vuttaṃ. ‘‘Capu capū’’ti saddaṃ katvā nācameyyāti attho. Vaccappassāvaṭṭhānikavinicchayo.
ဝစ္စပ္ပသ္သာဝဋ္ဌာနိကနိဒ္ဒေသဝဏ္ဏနာ နိဋ္ဌိတာ။
Vaccappassāvaṭṭhānikaniddesavaṇṇanā niṭṭhitā.
