| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༡༦. ཝཙྩཔྤསྶཱཝཊྛཱནིཀནིདྡེསཝཎྞནཱ
16. Vaccappassāvaṭṭhānikaniddesavaṇṇanā
༡༥༦. ཡཐཱཝུཌྜྷཾ ན ཀརེཡྻ ཝཙྩནྟི སམྦནྡྷོ། ཡཐཱནུཔུབྦིཡཱ ལབྦྷཏཱིཏི སམྦནྡྷོ། ཨིམེསུ པན ཏཱིསུ ཋཱནེསུ ཡོ ཡོ པཋམཾ ཨཱགཙྪཏི ཝུཌྜྷོ ཝཱ ནཝོ ཝཱ, སོ སོ ཨཱགཏཔཊིཔཱཊིཡཱ ཀཱཏུཉྩ ནཧཱཡིཏུཉྩ ལབྦྷཏཱིཏི ཨདྷིཔྤཱཡོ།
156. Yathāvuḍḍhaṃ na kareyya vaccanti sambandho. Yathānupubbiyā labbhatīti sambandho. Imesu pana tīsu ṭhānesu yo yo paṭhamaṃ āgacchati vuḍḍho vā navo vā, so so āgatapaṭipāṭiyā kātuñca nahāyituñca labbhatīti adhippāyo.
༡༥༧. ཨུབྦྷཛིཏྭཱཏི (ཙཱུལ༹ཝ॰ ༣༧༣, ༣༧༤) ནིཝཱསནཾ དཱུརཏོཝ ཨུཀྑིཔིཏྭཱ ནོ པཝིསེཡྻ། སཧསཱ ཙ ནོ པཝིསེཡྻཱཏི སམྦནྡྷོ། ‘‘བཧི ཋིཏེན ཨུཀྐཱསིཏབྦ’’ནྟི ཙ ‘‘སཱདྷུཀཾ ཨཏརམཱནེན ཝཙྩཀུཊི པཝིསིཏབྦཱ’’ཏི ཙ ཝུཏྟཏྟཱ ཨུཀྐཱསིཏྭཱཝ ཨཏརམཱནོ པཝིསེཡྻཱཏི ཨཏྠོ། ‘‘ན ཨུབྦྷཛིཏྭཱ པཝིསིཏབྦཱ, ཝཙྩཔཱདུཀཱཡ ཋིཏེན ཨུབྦྷཛིཏབྦ’’ནྟི (ཙཱུལ༹ཝ॰ ༣༧༤) ཝཙནཏོ ‘‘ཨུབྦྷཛེཡྻ པཱདུཀཱསྭེཝ སཎྛིཏོ’’ཏི ཝུཏྟཾ།
157.Ubbhajitvāti (cūḷava. 373, 374) nivāsanaṃ dūratova ukkhipitvā no paviseyya. Sahasā ca no paviseyyāti sambandho. ‘‘Bahi ṭhitena ukkāsitabba’’nti ca ‘‘sādhukaṃ ataramānena vaccakuṭi pavisitabbā’’ti ca vuttattā ukkāsitvāva ataramāno paviseyyāti attho. ‘‘Na ubbhajitvā pavisitabbā, vaccapādukāya ṭhitena ubbhajitabba’’nti (cūḷava. 374) vacanato ‘‘ubbhajeyya pādukāsveva saṇṭhito’’ti vuttaṃ.
༡༥༨. ན ཀརེཡྻ ཨུབྷཡཾ ན ཀརེཡྻུབྷཡཾ།
158. Na kareyya ubhayaṃ na kareyyubhayaṃ.
༡༥༩. ཀཱུཔེཏི (ཙཱུལ༹ཝ॰ ༣༧༤) ཝཙྩཀཱུཔེ། ཀཊྛནྟི ཨཝལེཁནཀཊྛཾ། པསྶཱཝདོཎིཡཱ ཁེལ༹ཾ ན ཀཱཏབྦནྟི ཨཏྠོ། ནཱཝལེཁེཡྻ ཕརུསེནཱཏི ཕཱལིཏཀཊྛེན ཝཱ ཁརེན ཝཱ གཎྛིཀེན ཝཱ ཀཎྚཀེན ཝཱ སུསིརེན ཝཱ པཱུཏིནཱ ཝཱ ནཱཝལེཁིཏབྦནྟི ཨཏྠོ། ཨུཧཏཉྩཱཔཱིཏི གཱུཐམཀྑིཏམྤི དྷོཝཡེ ཨཏྟནཱ ཝཱ པརེན ཝཱ ཀཏནྟི ཨདྷིཔྤཱཡོ།
159.Kūpeti (cūḷava. 374) vaccakūpe. Kaṭṭhanti avalekhanakaṭṭhaṃ. Passāvadoṇiyā kheḷaṃ na kātabbanti attho. Nāvalekheyya pharusenāti phālitakaṭṭhena vā kharena vā gaṇṭhikena vā kaṇṭakena vā susirena vā pūtinā vā nāvalekhitabbanti attho. Uhatañcāpīti gūthamakkhitampi dhovaye attanā vā parena vā katanti adhippāyo.
༡༦༠. ཨུབྦྷཛིཏྭཱ ན ནིཀྑམེཏི ཨེཏྠ ‘‘ཝཙྩཔཱདུཀཱཡ ཋིཏེན པཊིཙྪཱདེཏབྦ’’ནྟི (ཙཱུལ༹ཝ॰ ༣༧༤) ཧི ཝུཏྟཾ, པུན ‘‘ཨཱཙམནཔཱདུཀཱཡཾ ཋིཏེན ཨུབྦྷཛིཏབྦ’’ནྟི (ཙཱུལ༹ཝ॰ ༣༧༤) ཙ ཝུཏྟཾ། ‘‘ཙཔུ ཙཔཱུ’’ཏི སདྡཾ ཀཏྭཱ ནཱཙམེཡྻཱཏི ཨཏྠོ། ཝཙྩཔྤསྶཱཝཊྛཱནིཀཝིནིཙྪཡོ།
160.Ubbhajitvā na nikkhameti ettha ‘‘vaccapādukāya ṭhitena paṭicchādetabba’’nti (cūḷava. 374) hi vuttaṃ, puna ‘‘ācamanapādukāyaṃ ṭhitena ubbhajitabba’’nti (cūḷava. 374) ca vuttaṃ. ‘‘Capu capū’’ti saddaṃ katvā nācameyyāti attho. Vaccappassāvaṭṭhānikavinicchayo.
ཝཙྩཔྤསྶཱཝཊྛཱནིཀནིདྡེསཝཎྞནཱ ནིཊྛིཏཱ།
Vaccappassāvaṭṭhānikaniddesavaṇṇanā niṭṭhitā.
