| Library / Tipiṭaka / തിപിടക • Tipiṭaka / ഖുദ്ദസിക്ഖാ-മൂലസിക്ഖാ • Khuddasikkhā-mūlasikkhā |
൧൬. വച്ചപ്പസ്സാവട്ഠാനികനിദ്ദേസവണ്ണനാ
16. Vaccappassāvaṭṭhānikaniddesavaṇṇanā
൧൫൬. യഥാവുഡ്ഢം ന കരേയ്യ വച്ചന്തി സമ്ബന്ധോ. യഥാനുപുബ്ബിയാ ലബ്ഭതീതി സമ്ബന്ധോ. ഇമേസു പന തീസു ഠാനേസു യോ യോ പഠമം ആഗച്ഛതി വുഡ്ഢോ വാ നവോ വാ, സോ സോ ആഗതപടിപാടിയാ കാതുഞ്ച നഹായിതുഞ്ച ലബ്ഭതീതി അധിപ്പായോ.
156. Yathāvuḍḍhaṃ na kareyya vaccanti sambandho. Yathānupubbiyā labbhatīti sambandho. Imesu pana tīsu ṭhānesu yo yo paṭhamaṃ āgacchati vuḍḍho vā navo vā, so so āgatapaṭipāṭiyā kātuñca nahāyituñca labbhatīti adhippāyo.
൧൫൭. ഉബ്ഭജിത്വാതി (ചൂളവ॰ ൩൭൩, ൩൭൪) നിവാസനം ദൂരതോവ ഉക്ഖിപിത്വാ നോ പവിസേയ്യ. സഹസാ ച നോ പവിസേയ്യാതി സമ്ബന്ധോ. ‘‘ബഹി ഠിതേന ഉക്കാസിതബ്ബ’’ന്തി ച ‘‘സാധുകം അതരമാനേന വച്ചകുടി പവിസിതബ്ബാ’’തി ച വുത്തത്താ ഉക്കാസിത്വാവ അതരമാനോ പവിസേയ്യാതി അത്ഥോ. ‘‘ന ഉബ്ഭജിത്വാ പവിസിതബ്ബാ, വച്ചപാദുകായ ഠിതേന ഉബ്ഭജിതബ്ബ’’ന്തി (ചൂളവ॰ ൩൭൪) വചനതോ ‘‘ഉബ്ഭജേയ്യ പാദുകാസ്വേവ സണ്ഠിതോ’’തി വുത്തം.
157.Ubbhajitvāti (cūḷava. 373, 374) nivāsanaṃ dūratova ukkhipitvā no paviseyya. Sahasā ca no paviseyyāti sambandho. ‘‘Bahi ṭhitena ukkāsitabba’’nti ca ‘‘sādhukaṃ ataramānena vaccakuṭi pavisitabbā’’ti ca vuttattā ukkāsitvāva ataramāno paviseyyāti attho. ‘‘Na ubbhajitvā pavisitabbā, vaccapādukāya ṭhitena ubbhajitabba’’nti (cūḷava. 374) vacanato ‘‘ubbhajeyya pādukāsveva saṇṭhito’’ti vuttaṃ.
൧൫൮. ന കരേയ്യ ഉഭയം ന കരേയ്യുഭയം.
158. Na kareyya ubhayaṃ na kareyyubhayaṃ.
൧൫൯. കൂപേതി (ചൂളവ॰ ൩൭൪) വച്ചകൂപേ. കട്ഠന്തി അവലേഖനകട്ഠം. പസ്സാവദോണിയാ ഖേളം ന കാതബ്ബന്തി അത്ഥോ. നാവലേഖേയ്യ ഫരുസേനാതി ഫാലിതകട്ഠേന വാ ഖരേന വാ ഗണ്ഠികേന വാ കണ്ടകേന വാ സുസിരേന വാ പൂതിനാ വാ നാവലേഖിതബ്ബന്തി അത്ഥോ. ഉഹതഞ്ചാപീതി ഗൂഥമക്ഖിതമ്പി ധോവയേ അത്തനാ വാ പരേന വാ കതന്തി അധിപ്പായോ.
159.Kūpeti (cūḷava. 374) vaccakūpe. Kaṭṭhanti avalekhanakaṭṭhaṃ. Passāvadoṇiyā kheḷaṃ na kātabbanti attho. Nāvalekheyya pharusenāti phālitakaṭṭhena vā kharena vā gaṇṭhikena vā kaṇṭakena vā susirena vā pūtinā vā nāvalekhitabbanti attho. Uhatañcāpīti gūthamakkhitampi dhovaye attanā vā parena vā katanti adhippāyo.
൧൬൦. ഉബ്ഭജിത്വാ ന നിക്ഖമേതി ഏത്ഥ ‘‘വച്ചപാദുകായ ഠിതേന പടിച്ഛാദേതബ്ബ’’ന്തി (ചൂളവ॰ ൩൭൪) ഹി വുത്തം, പുന ‘‘ആചമനപാദുകായം ഠിതേന ഉബ്ഭജിതബ്ബ’’ന്തി (ചൂളവ॰ ൩൭൪) ച വുത്തം. ‘‘ചപു ചപൂ’’തി സദ്ദം കത്വാ നാചമേയ്യാതി അത്ഥോ. വച്ചപ്പസ്സാവട്ഠാനികവിനിച്ഛയോ.
160.Ubbhajitvā na nikkhameti ettha ‘‘vaccapādukāya ṭhitena paṭicchādetabba’’nti (cūḷava. 374) hi vuttaṃ, puna ‘‘ācamanapādukāyaṃ ṭhitena ubbhajitabba’’nti (cūḷava. 374) ca vuttaṃ. ‘‘Capu capū’’ti saddaṃ katvā nācameyyāti attho. Vaccappassāvaṭṭhānikavinicchayo.
വച്ചപ്പസ്സാവട്ഠാനികനിദ്ദേസവണ്ണനാ നിട്ഠിതാ.
Vaccappassāvaṭṭhānikaniddesavaṇṇanā niṭṭhitā.
