| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. ৰচ্ছগোত্তসুত্তং
7. Vacchagottasuttaṃ
৫৮. অথ খো ৰচ্ছগোত্তো 1 পরিব্বাজকো যেন ভগৰা তেনুপসঙ্কমি ; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘সুতং মেতং, ভো গোতম, সমণো গোতমো এৰমাহ – ‘ময্হমেৰ দানং দাতব্বং , নাঞ্ঞেসং দানং দাতব্বং; ময্হমেৰ সাৰকানং দানং দাতব্বং, নাঞ্ঞেসং সাৰকানং দানং দাতব্বং; ময্হমেৰ দিন্নং মহপ্ফলং, নাঞ্ঞেসং দিন্নং মহপ্ফলং; ময্হমেৰ সাৰকানং দিন্নং মহপ্ফলং, নাঞ্ঞেসং সাৰকানং দিন্নং মহপ্ফল’ন্তি। যে তে, ভো গোতম, এৰমাহংসু ‘সমণো গোতমো এৰমাহ ময্হমেৰ দানং দাতব্বং, নাঞ্ঞেসং দানং দাতব্বং। ময্হমেৰ সাৰকানং দানং দাতব্বং, নাঞ্ঞেসং সাৰকানং দানং দাতব্বং। ময্হমেৰ দিন্নং মহপ্ফলং, নাঞ্ঞেসং দিন্নং মহপ্ফলং। ময্হমেৰ সাৰকানং দিন্নং মহপ্ফলং, নাঞ্ঞেসং সাৰকানং দিন্নং মহপ্ফল’ন্তি। কচ্চি তে ভোতো গোতমস্স ৰুত্তৰাদিনো চ ভৰন্তং গোতমং অভূতেন অব্ভাচিক্খন্তি, ধম্মস্স চানুধম্মং ব্যাকরোন্তি, ন চ কোচি সহধম্মিকো ৰাদানুপাতো 2 গারয্হং ঠানং আগচ্ছতি? অনব্ভক্খাতুকামা হি মযং ভৰন্তং গোতম’’ন্তি।
58. Atha kho vacchagotto 3 paribbājako yena bhagavā tenupasaṅkami ; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘sutaṃ metaṃ, bho gotama, samaṇo gotamo evamāha – ‘mayhameva dānaṃ dātabbaṃ , nāññesaṃ dānaṃ dātabbaṃ; mayhameva sāvakānaṃ dānaṃ dātabbaṃ, nāññesaṃ sāvakānaṃ dānaṃ dātabbaṃ; mayhameva dinnaṃ mahapphalaṃ, nāññesaṃ dinnaṃ mahapphalaṃ; mayhameva sāvakānaṃ dinnaṃ mahapphalaṃ, nāññesaṃ sāvakānaṃ dinnaṃ mahapphala’nti. Ye te, bho gotama, evamāhaṃsu ‘samaṇo gotamo evamāha mayhameva dānaṃ dātabbaṃ, nāññesaṃ dānaṃ dātabbaṃ. Mayhameva sāvakānaṃ dānaṃ dātabbaṃ, nāññesaṃ sāvakānaṃ dānaṃ dātabbaṃ. Mayhameva dinnaṃ mahapphalaṃ, nāññesaṃ dinnaṃ mahapphalaṃ. Mayhameva sāvakānaṃ dinnaṃ mahapphalaṃ, nāññesaṃ sāvakānaṃ dinnaṃ mahapphala’nti. Kacci te bhoto gotamassa vuttavādino ca bhavantaṃ gotamaṃ abhūtena abbhācikkhanti, dhammassa cānudhammaṃ byākaronti, na ca koci sahadhammiko vādānupāto 4 gārayhaṃ ṭhānaṃ āgacchati? Anabbhakkhātukāmā hi mayaṃ bhavantaṃ gotama’’nti.
‘‘যে তে, ৰচ্ছ, এৰমাহংসু – ‘সমণো গোতমো এৰমাহ – ময্হমেৰ দানং দাতব্বং…পে॰… নাঞ্ঞেসং সাৰকানং দিন্নং মহপ্ফল’ন্তি ন মে তে ৰুত্তৰাদিনো। অব্ভাচিক্খন্তি চ পন মং 5 অসতা অভূতেন। যো খো, ৰচ্ছ, পরং দানং দদন্তং ৰারেতি সো তিণ্ণং অন্তরাযকরো হোতি, তিণ্ণং পারিপন্থিকো। কতমেসং তিণ্ণং? দাযকস্স পুঞ্ঞন্তরাযকরো হোতি, পটিগ্গাহকানং লাভন্তরাযকরো হোতি, পুব্বেৰ খো পনস্স অত্তা খতো চ হোতি উপহতো চ। যো খো, ৰচ্ছ, পরং দানং দদন্তং ৰারেতি সো ইমেসং তিণ্ণং অন্তরাযকরো হোতি, তিণ্ণং পারিপন্থিকো।
‘‘Ye te, vaccha, evamāhaṃsu – ‘samaṇo gotamo evamāha – mayhameva dānaṃ dātabbaṃ…pe… nāññesaṃ sāvakānaṃ dinnaṃ mahapphala’nti na me te vuttavādino. Abbhācikkhanti ca pana maṃ 6 asatā abhūtena. Yo kho, vaccha, paraṃ dānaṃ dadantaṃ vāreti so tiṇṇaṃ antarāyakaro hoti, tiṇṇaṃ pāripanthiko. Katamesaṃ tiṇṇaṃ? Dāyakassa puññantarāyakaro hoti, paṭiggāhakānaṃ lābhantarāyakaro hoti, pubbeva kho panassa attā khato ca hoti upahato ca. Yo kho, vaccha, paraṃ dānaṃ dadantaṃ vāreti so imesaṃ tiṇṇaṃ antarāyakaro hoti, tiṇṇaṃ pāripanthiko.
‘‘অহং খো পন, ৰচ্ছ, এৰং ৰদামি – যে হি তে চন্দনিকায ৰা ওলিগল্লে ৰা পাণা, তত্রপি যো থালিধোৰনং 7 ৰা সরাৰধোৰনং ৰা ছড্ডেতি – যে তত্থ পাণা তে তেন যাপেন্তূতি, ততো নিদানম্পাহং, ৰচ্ছ, পুঞ্ঞস্স আগমং ৰদামি। কো পন ৰাদো মনুস্সভূতে! অপি চাহং, ৰচ্ছ, সীলৰতো দিন্নং মহপ্ফলং ৰদামি, নো তথা দুস্সীলস্স, সো চ হোতি পঞ্চঙ্গৰিপ্পহীনো পঞ্চঙ্গসমন্নাগতো।
‘‘Ahaṃ kho pana, vaccha, evaṃ vadāmi – ye hi te candanikāya vā oligalle vā pāṇā, tatrapi yo thālidhovanaṃ 8 vā sarāvadhovanaṃ vā chaḍḍeti – ye tattha pāṇā te tena yāpentūti, tato nidānampāhaṃ, vaccha, puññassa āgamaṃ vadāmi. Ko pana vādo manussabhūte! Api cāhaṃ, vaccha, sīlavato dinnaṃ mahapphalaṃ vadāmi, no tathā dussīlassa, so ca hoti pañcaṅgavippahīno pañcaṅgasamannāgato.
‘‘কতমানি পঞ্চঙ্গানি পহীনানি হোন্তি? কামচ্ছন্দো পহীনো হোতি, ব্যাপাদো পহীনো হোতি , থিনমিদ্ধং পহীনং হোতি, উদ্ধচ্চকুক্কুচ্চং পহীনং হোতি, ৰিচিকিচ্ছা পহীনা হোতি। ইমানি পঞ্চঙ্গানি ৰিপ্পহীনানি হোন্তি।
‘‘Katamāni pañcaṅgāni pahīnāni honti? Kāmacchando pahīno hoti, byāpādo pahīno hoti , thinamiddhaṃ pahīnaṃ hoti, uddhaccakukkuccaṃ pahīnaṃ hoti, vicikicchā pahīnā hoti. Imāni pañcaṅgāni vippahīnāni honti.
‘‘কতমেহি পঞ্চহি অঙ্গেহি সমন্নাগতো হোতি? অসেক্খেন সীলক্খন্ধেন সমন্নাগতো হোতি, অসেক্খেন সমাধিক্খন্ধেন সমন্নাগতো হোতি, অসেক্খেন পঞ্ঞাক্খন্ধেন সমন্নাগতো হোতি, অসেক্খেন ৰিমুত্তিক্খন্ধেন সমন্নাগতো হোতি, অসেক্খেন ৰিমুত্তিঞাণদস্সনক্খন্ধেন সমন্নাগতো হোতি; ইমেহি পঞ্চহি অঙ্গেহি সমন্নাগতো হোতি। ইতি পঞ্চঙ্গৰিপ্পহীনে পঞ্চঙ্গসমন্নাগতে দিন্নং মহপ্ফলন্তি ৰদামী’’তি।
‘‘Katamehi pañcahi aṅgehi samannāgato hoti? Asekkhena sīlakkhandhena samannāgato hoti, asekkhena samādhikkhandhena samannāgato hoti, asekkhena paññākkhandhena samannāgato hoti, asekkhena vimuttikkhandhena samannāgato hoti, asekkhena vimuttiñāṇadassanakkhandhena samannāgato hoti; imehi pañcahi aṅgehi samannāgato hoti. Iti pañcaṅgavippahīne pañcaṅgasamannāgate dinnaṃ mahapphalanti vadāmī’’ti.
‘‘ইতি কণ্হাসু সেতাসু, রোহিণীসু হরীসু ৰা।
‘‘Iti kaṇhāsu setāsu, rohiṇīsu harīsu vā;
কম্মাসাসু সরূপাসু, গোসু পারেৰতাসু ৰা॥
Kammāsāsu sarūpāsu, gosu pārevatāsu vā.
‘‘যাসু কাসুচি এতাসু, দন্তো জাযতি পুঙ্গৰো।
‘‘Yāsu kāsuci etāsu, danto jāyati puṅgavo;
ধোরয্হো বলসম্পন্নো, কল্যাণজৰনিক্কমো।
Dhorayho balasampanno, kalyāṇajavanikkamo;
তমেৰ ভারে যুঞ্জন্তি, নাস্স ৰণ্ণং পরিক্খরে॥
Tameva bhāre yuñjanti, nāssa vaṇṇaṃ parikkhare.
‘‘এৰমেৰং মনুস্সেসু, যস্মিং কস্মিঞ্চি জাতিযে।
‘‘Evamevaṃ manussesu, yasmiṃ kasmiñci jātiye;
খত্তিযে ব্রাহ্মণে ৰেস্সে, সুদ্দে চণ্ডালপুক্কুসে॥
Khattiye brāhmaṇe vesse, sudde caṇḍālapukkuse.
‘‘যাসু কাসুচি এতাসু, দন্তো জাযতি সুব্বতো।
‘‘Yāsu kāsuci etāsu, danto jāyati subbato;
ধম্মট্ঠো সীলসম্পন্নো, সচ্চৰাদী হিরীমনো॥
Dhammaṭṭho sīlasampanno, saccavādī hirīmano.
‘‘পহীনজাতিমরণো, ব্রহ্মচরিযস্স কেৰলী।
‘‘Pahīnajātimaraṇo, brahmacariyassa kevalī;
পন্নভারো ৰিসংযুত্তো, কতকিচ্চো অনাসৰো॥
Pannabhāro visaṃyutto, katakicco anāsavo.
‘‘পারগূ সব্বধম্মানং, অনুপাদায নিব্বুতো।
‘‘Pāragū sabbadhammānaṃ, anupādāya nibbuto;
‘‘বালা চ অৰিজানন্তা, দুম্মেধা অস্সুতাৰিনো।
‘‘Bālā ca avijānantā, dummedhā assutāvino;
বহিদ্ধা দেন্তি দানানি, ন হি সন্তে উপাসরে॥
Bahiddhā denti dānāni, na hi sante upāsare.
‘‘যে চ সন্তে উপাসন্তি, সপ্পঞ্ঞে ধীরসম্মতে।
‘‘Ye ca sante upāsanti, sappaññe dhīrasammate;
সদ্ধা চ নেসং সুগতে, মূলজাতা পতিট্ঠিতা॥
Saddhā ca nesaṃ sugate, mūlajātā patiṭṭhitā.
‘‘দেৰলোকঞ্চ তে যন্তি, কুলে ৰা ইধ জাযরে।
‘‘Devalokañca te yanti, kule vā idha jāyare;
অনুপুব্বেন নিব্বানং, অধিগচ্ছন্তি পণ্ডিতা’’তি॥ সত্তমং।
Anupubbena nibbānaṃ, adhigacchanti paṇḍitā’’ti. sattamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. ৰচ্ছগোত্তসুত্তৰণ্ণনা • 7. Vacchagottasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭. ৰচ্ছগোত্তসুত্তৰণ্ণনা • 7. Vacchagottasuttavaṇṇanā
