| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. ৰচ্ছগোত্তসুত্তং
8. Vacchagottasuttaṃ
৪১৭. অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কিং নু খো, ভো গোতম, সস্সতো লোকো’’তি? অব্যাকতং খো এতং, ৰচ্ছ, মযা – ‘সস্সতো লোকো’তি…পে॰…। ‘‘কিং পন, ভো গোতম, ‘নেৰ হোতি ন ন হোতি তথাগতো পরং মরণা’’’তি? ‘‘এতম্পি খো, ৰচ্ছ, অব্যাকতং মযা – ‘নেৰ হোতি ন ন হোতি তথাগতো পরং মরণা’’’তি।
417. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, sassato loko’’ti? Abyākataṃ kho etaṃ, vaccha, mayā – ‘sassato loko’ti…pe…. ‘‘Kiṃ pana, bho gotama, ‘neva hoti na na hoti tathāgato paraṃ maraṇā’’’ti? ‘‘Etampi kho, vaccha, abyākataṃ mayā – ‘neva hoti na na hoti tathāgato paraṃ maraṇā’’’ti.
‘‘কো নু খো, ভো গোতম, হেতু, কো পচ্চযো, যেন অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – ‘সস্সতো লোকো’তি ৰা…পে॰… ‘নেৰ হোতি ন ন হোতি তথাগতো পরং মরণা’তি ৰা? কো পন, ভো গোতম, হেতু, কো পচ্চযো, যেন ভোতো গোতমস্স এৰং পুট্ঠস্স ন এৰং ৰেয্যাকরণং হোতি – ‘সস্সতো লোকো’তিপি…পে॰… ‘নেৰ হোতি ন ন হোতি তথাগতো পরং মরণা’তিপী’’তি?
‘‘Ko nu kho, bho gotama, hetu, ko paccayo, yena aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – ‘sassato loko’ti vā…pe… ‘neva hoti na na hoti tathāgato paraṃ maraṇā’ti vā? Ko pana, bho gotama, hetu, ko paccayo, yena bhoto gotamassa evaṃ puṭṭhassa na evaṃ veyyākaraṇaṃ hoti – ‘sassato loko’tipi…pe… ‘neva hoti na na hoti tathāgato paraṃ maraṇā’tipī’’ti?
‘‘অঞ্ঞতিত্থিযা খো, ৰচ্ছ, পরিব্বাজকা রূপং অত্ততো সমনুপস্সন্তি, রূপৰন্তং ৰা অত্তানং, অত্তনি ৰা রূপং, রূপস্মিং ৰা অত্তানং । ৰেদনং অত্ততো সমনুপস্সন্তি…পে॰… সঞ্ঞং…পে॰… সঙ্খারে…পে॰… ৰিঞ্ঞাণং অত্ততো সমনুপস্সন্তি, ৰিঞ্ঞাণৰন্তং ৰা অত্তানং, অত্তনি ৰা ৰিঞ্ঞাণং, ৰিঞ্ঞাণস্মিং ৰা অত্তানং। তস্মা অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – ‘সস্সতো লোকো’তি ৰা…পে॰… ‘নেৰ হোতি ন ন হোতি তথাগতো পরং মরণা’তি ৰা। তথাগতো চ খো, ৰচ্ছ, অরহং সম্মাসম্বুদ্ধো ন রূপং অত্ততো সমনুপস্সতি, ন রূপৰন্তং ৰা অত্তানং, ন অত্তনি ৰা রূপং, ন রূপস্মিং ৰা অত্তানং। ন ৰেদনং অত্ততো সমনুপস্সতি…পে॰… ন সঞ্ঞং…পে॰… ন সঙ্খারে…পে॰… ন ৰিঞ্ঞাণং অত্ততো সমনুপস্সতি, ন ৰিঞ্ঞাণৰন্তং ৰা অত্তানং, ন অত্তনি ৰা ৰিঞ্ঞাণং, ন ৰিঞ্ঞাণস্মিং ৰা অত্তানং। তস্মা তথাগতস্স এৰং পুট্ঠস্স ন এৰং ৰেয্যাকরণং হোতি – ‘সস্সতো লোকো’তিপি…পে॰… ‘নেৰ হোতি ন ন হোতি তথাগতো পরং মরণা’তিপী’’তি।
‘‘Aññatitthiyā kho, vaccha, paribbājakā rūpaṃ attato samanupassanti, rūpavantaṃ vā attānaṃ, attani vā rūpaṃ, rūpasmiṃ vā attānaṃ . Vedanaṃ attato samanupassanti…pe… saññaṃ…pe… saṅkhāre…pe… viññāṇaṃ attato samanupassanti, viññāṇavantaṃ vā attānaṃ, attani vā viññāṇaṃ, viññāṇasmiṃ vā attānaṃ. Tasmā aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – ‘sassato loko’ti vā…pe… ‘neva hoti na na hoti tathāgato paraṃ maraṇā’ti vā. Tathāgato ca kho, vaccha, arahaṃ sammāsambuddho na rūpaṃ attato samanupassati, na rūpavantaṃ vā attānaṃ, na attani vā rūpaṃ, na rūpasmiṃ vā attānaṃ. Na vedanaṃ attato samanupassati…pe… na saññaṃ…pe… na saṅkhāre…pe… na viññāṇaṃ attato samanupassati, na viññāṇavantaṃ vā attānaṃ, na attani vā viññāṇaṃ, na viññāṇasmiṃ vā attānaṃ. Tasmā tathāgatassa evaṃ puṭṭhassa na evaṃ veyyākaraṇaṃ hoti – ‘sassato loko’tipi…pe… ‘neva hoti na na hoti tathāgato paraṃ maraṇā’tipī’’ti.
অথ খো ৰচ্ছগোত্তো পরিব্বাজকো উট্ঠাযাসনা যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৰা আযস্মতা মহামোগ্গল্লানেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ৰচ্ছগোত্তো পরিব্বাজকো আযস্মন্তং মহামোগ্গল্লানং এতদৰোচ – ‘‘কিং নু খো, ভো মোগ্গল্লান, সস্সতো লোকো’’তি? অব্যাকতং খো এতং, ৰচ্ছ, ভগৰতা – ‘সস্সতো লোকো’তি…পে॰…। ‘‘কিং পন, ভো মোগ্গল্লান, ‘নেৰ হোতি ন ন হোতি তথাগতো পরং মরণা’’’তি? ‘‘এতম্পি খো, ৰচ্ছ, অব্যাকতং ভগৰতা – ‘নেৰ হোতি ন ন হোতি তথাগতো পরং মরণা’’’তি।
Atha kho vacchagotto paribbājako uṭṭhāyāsanā yenāyasmā mahāmoggallāno tenupasaṅkami; upasaṅkamitvā āyasmatā mahāmoggallānena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako āyasmantaṃ mahāmoggallānaṃ etadavoca – ‘‘kiṃ nu kho, bho moggallāna, sassato loko’’ti? Abyākataṃ kho etaṃ, vaccha, bhagavatā – ‘sassato loko’ti…pe…. ‘‘Kiṃ pana, bho moggallāna, ‘neva hoti na na hoti tathāgato paraṃ maraṇā’’’ti? ‘‘Etampi kho, vaccha, abyākataṃ bhagavatā – ‘neva hoti na na hoti tathāgato paraṃ maraṇā’’’ti.
‘‘কো নু খো, ভো মোগ্গল্লান, হেতু, কো পচ্চযো, যেন অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – ‘সস্সতো লোকো’তি ৰা…পে॰… ‘নেৰ হোতি ন ন হোতি তথাগতো পরং মরণা’তি ৰা? কো পন, ভো মোগ্গল্লান, হেতু, কো পচ্চযো যেন সমণস্স গোতমস্স এৰং পুট্ঠস্স ন এৰং ৰেয্যাকরণং হোতি – ‘সস্সতো লোকো’তিপি…পে॰… ‘নেৰ হোতি ন ন হোতি তথাগতো পরং মরণা’তিপী’’তি?
‘‘Ko nu kho, bho moggallāna, hetu, ko paccayo, yena aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – ‘sassato loko’ti vā…pe… ‘neva hoti na na hoti tathāgato paraṃ maraṇā’ti vā? Ko pana, bho moggallāna, hetu, ko paccayo yena samaṇassa gotamassa evaṃ puṭṭhassa na evaṃ veyyākaraṇaṃ hoti – ‘sassato loko’tipi…pe… ‘neva hoti na na hoti tathāgato paraṃ maraṇā’tipī’’ti?
‘‘অঞ্ঞতিত্থিযা খো, ৰচ্ছ, পরিব্বাজকা রূপং অত্ততো সমনুপস্সন্তি, রূপৰন্তং ৰা অত্তানং, অত্তনি ৰা রূপং, রূপস্মিং ৰা অত্তানং। ৰেদনং অত্ততো সমনুপস্সন্তি…পে॰… সঞ্ঞং…পে॰… সঙ্খারে…পে॰… ৰিঞ্ঞাণং অত্ততো সমনুপস্সন্তি, ৰিঞ্ঞাণৰন্তং ৰা অত্তানং, অত্তনি ৰা ৰিঞ্ঞাণং, ৰিঞ্ঞাণস্মিং ৰা অত্তানং। তস্মা অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – ‘সস্সতো লোকো’তি ৰা…পে॰… ‘নেৰ হোতি ন ন হোতি তথাগতো পরং মরণা’তি ৰা। তথাগতো চ খো, ৰচ্ছ, অরহং সম্মাসম্বুদ্ধো ন রূপং অত্ততো সমনুপস্সতি, ন রূপৰন্তং ৰা অত্তানং, ন অত্তনি ৰা রূপং, ন রূপস্মিং ৰা অত্তানং। ন ৰেদনং অত্ততো সমনুপস্সতি…পে॰… ন সঞ্ঞং…পে॰… ন সঙ্খারে…পে॰… ন ৰিঞ্ঞাণং অত্ততো সমনুপস্সতি, ন ৰিঞ্ঞাণৰন্তং ৰা অত্তানং, ন অত্তনি ৰা ৰিঞ্ঞাণং, ন ৰিঞ্ঞাণস্মিং ৰা অত্তানং। তস্মা তথাগতস্স এৰং পুট্ঠস্স ন এৰং ৰেয্যাকরণং হোতি – ‘সস্সতো লোকো’তিপি, ‘অসস্সতো লোকো’তিপি, ‘অন্তৰা লোকো’তিপি, ‘অনন্তৰা লোকো’তিপি, ‘তং জীৰং তং সরীর’ন্তিপি, ‘অঞ্ঞং জীৰং অঞ্ঞং সরীর’ন্তিপি, ‘হোতি তথাগতো পরং মরণা’তিপি, ‘ন হোতি তথাগতো পরং মরণা’তিপি, ‘হোতি চ ন চ হোতি তথাগতো পরং মরণা’তিপি, ‘নেৰ হোতি ন ন হোতি তথাগতো পরং মরণা’তিপী’’তি।
‘‘Aññatitthiyā kho, vaccha, paribbājakā rūpaṃ attato samanupassanti, rūpavantaṃ vā attānaṃ, attani vā rūpaṃ, rūpasmiṃ vā attānaṃ. Vedanaṃ attato samanupassanti…pe… saññaṃ…pe… saṅkhāre…pe… viññāṇaṃ attato samanupassanti, viññāṇavantaṃ vā attānaṃ, attani vā viññāṇaṃ, viññāṇasmiṃ vā attānaṃ. Tasmā aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – ‘sassato loko’ti vā…pe… ‘neva hoti na na hoti tathāgato paraṃ maraṇā’ti vā. Tathāgato ca kho, vaccha, arahaṃ sammāsambuddho na rūpaṃ attato samanupassati, na rūpavantaṃ vā attānaṃ, na attani vā rūpaṃ, na rūpasmiṃ vā attānaṃ. Na vedanaṃ attato samanupassati…pe… na saññaṃ…pe… na saṅkhāre…pe… na viññāṇaṃ attato samanupassati, na viññāṇavantaṃ vā attānaṃ, na attani vā viññāṇaṃ, na viññāṇasmiṃ vā attānaṃ. Tasmā tathāgatassa evaṃ puṭṭhassa na evaṃ veyyākaraṇaṃ hoti – ‘sassato loko’tipi, ‘asassato loko’tipi, ‘antavā loko’tipi, ‘anantavā loko’tipi, ‘taṃ jīvaṃ taṃ sarīra’ntipi, ‘aññaṃ jīvaṃ aññaṃ sarīra’ntipi, ‘hoti tathāgato paraṃ maraṇā’tipi, ‘na hoti tathāgato paraṃ maraṇā’tipi, ‘hoti ca na ca hoti tathāgato paraṃ maraṇā’tipi, ‘neva hoti na na hoti tathāgato paraṃ maraṇā’tipī’’ti.
‘‘অচ্ছরিযং, ভো মোগ্গল্লান, অব্ভুতং, ভো মোগ্গল্লান! যত্র হি নাম সত্থু চ সাৰকস্স চ অত্থেন অত্থো ব্যঞ্জনেন ব্যঞ্জনং সংসন্দিস্সতি, সমেস্সতি, ন ৰিরোধযিস্সতি, যদিদং অগ্গপদস্মিং। ইদানাহং, ভো মোগ্গল্লান, সমণং গোতমং উপসঙ্কমিত্ৰা এতমত্থং অপুচ্ছিং। সমণোপি মে গোতমো এতেহি পদেহি এতেহি ব্যঞ্জনেহি এতমত্থং ব্যাকাসি, সেয্যথাপি ভৰং মোগ্গল্লানো। অচ্ছরিযং, ভো মোগ্গল্লান, অব্ভুতং, ভো মোগ্গল্লান! যত্র হি নাম সত্থু চ সাৰকস্স চ অত্থেন অত্থো ব্যঞ্জনেন ব্যঞ্জনং সংসন্দিস্সতি সমেস্সতি ন ৰিরোধযিস্সতি, যদিদং অগ্গপদস্মি’’ন্তি। অট্ঠমং।
‘‘Acchariyaṃ, bho moggallāna, abbhutaṃ, bho moggallāna! Yatra hi nāma satthu ca sāvakassa ca atthena attho byañjanena byañjanaṃ saṃsandissati, samessati, na virodhayissati, yadidaṃ aggapadasmiṃ. Idānāhaṃ, bho moggallāna, samaṇaṃ gotamaṃ upasaṅkamitvā etamatthaṃ apucchiṃ. Samaṇopi me gotamo etehi padehi etehi byañjanehi etamatthaṃ byākāsi, seyyathāpi bhavaṃ moggallāno. Acchariyaṃ, bho moggallāna, abbhutaṃ, bho moggallāna! Yatra hi nāma satthu ca sāvakassa ca atthena attho byañjanena byañjanaṃ saṃsandissati samessati na virodhayissati, yadidaṃ aggapadasmi’’nti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩-৮. পঠমসারিপুত্তকোট্ঠিকসুত্তাদিৰণ্ণনা • 3-8. Paṭhamasāriputtakoṭṭhikasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩-৮. পঠমসারিপুত্তকোট্ঠিকসুত্তাদিৰণ্ণনা • 3-8. Paṭhamasāriputtakoṭṭhikasuttādivaṇṇanā
