| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. வச்ச²கொ³த்தஸுத்தவண்ணனா
7. Vacchagottasuttavaṇṇanā
58. ஸத்தமே மஹப்ப²லந்தி மஹாவிபாகங். த⁴ம்மஸ்ஸ சானுத⁴ம்மங் ப்³யாகரொந்தீதி எத்த² த⁴ம்மோ நாம கதி²தகதா², அனுத⁴ம்மோ நாம கதி²தஸ்ஸ படிகத²னங். ஸஹத⁴ம்மிகோதி ஸகாரணோ ஸஹேதுகோ. வாதா³னுபாதோதி வாத³ஸ்ஸ அனுபாதோ, அனுபதனங் பவத்தீதி அத்தோ². கா³ரய்ஹங் டா²னந்தி க³ரஹிதப்³ப³யுத்தங் காரணங். இத³ங் வுத்தங் ஹோதி – போ⁴தா கோ³தமேன வுத்தா ஸகாரணா வாத³ப்பவத்தி கிஞ்சிபி கா³ரய்ஹங் காரணங் ந ஆக³ச்ச²தீதி. அத² வா தேஹி பரேஹி வுத்தா ஸகாரணா வாத³ப்பவத்தி கிஞ்சி கா³ரய்ஹங் காரணங் ந ஆக³ச்ச²தீதி புச்ச²தி.
58. Sattame mahapphalanti mahāvipākaṃ. Dhammassa cānudhammaṃ byākarontīti ettha dhammo nāma kathitakathā, anudhammo nāma kathitassa paṭikathanaṃ. Sahadhammikoti sakāraṇo sahetuko. Vādānupātoti vādassa anupāto, anupatanaṃ pavattīti attho. Gārayhaṃṭhānanti garahitabbayuttaṃ kāraṇaṃ. Idaṃ vuttaṃ hoti – bhotā gotamena vuttā sakāraṇā vādappavatti kiñcipi gārayhaṃ kāraṇaṃ na āgacchatīti. Atha vā tehi parehi vuttā sakāraṇā vādappavatti kiñci gārayhaṃ kāraṇaṃ na āgacchatīti pucchati.
அந்தராயகரோ ஹோதீதி அந்தராயங் வினாஸங் கிச்ச²லாப⁴கங் விலோமகங் கரோதி. பாரிபந்தி²கோதி பந்த²தூ³ஹனசோரோ. க²தோ ச ஹோதீதி கு³ணக²னநேன க²தோ ஹோதி. உபஹதோதி கு³ணுபகா⁴தேனேவ உபஹதோ.
Antarāyakarohotīti antarāyaṃ vināsaṃ kicchalābhakaṃ vilomakaṃ karoti. Pāripanthikoti panthadūhanacoro. Khato ca hotīti guṇakhananena khato hoti. Upahatoti guṇupaghāteneva upahato.
சந்த³னிகாயாதி அஸுசிகலலகூபே. ஓலிக³ல்லேதி நித்³த⁴மனகலலே. ஸோ சாதி ஸோ ஸீலவாதி வுத்தகீ²ணாஸவோ. ஸீலக்க²ந்தே⁴னாதி ஸீலராஸினா. ஸேஸபதே³ஸுபி ஏஸேவ நயோ. எத்த² ச விமுத்திஞாணத³ஸ்ஸனங் வுச்சதி பச்சவெக்க²ணஞாணங், தங் அஸெக்க²ஸ்ஸ பவத்தத்தா அஸெக்க²ந்தி வுத்தங். இதரானி ஸிக்கா²பரியோஸானப்பத்ததாய ஸயம்பி அஸெக்கா²னேவ. தானி ச பன லோகுத்தரானி, பச்சவெக்க²ணஞாணங் லோகியங்.
Candanikāyāti asucikalalakūpe. Oligalleti niddhamanakalale. So cāti so sīlavāti vuttakhīṇāsavo. Sīlakkhandhenāti sīlarāsinā. Sesapadesupi eseva nayo. Ettha ca vimuttiñāṇadassanaṃ vuccati paccavekkhaṇañāṇaṃ, taṃ asekkhassa pavattattā asekkhanti vuttaṃ. Itarāni sikkhāpariyosānappattatāya sayampi asekkhāneva. Tāni ca pana lokuttarāni, paccavekkhaṇañāṇaṃ lokiyaṃ.
ரோஹிணீஸூதி ரத்தவண்ணாஸு. ஸரூபாஸூதி அத்தனோ வச்ச²கேஹி ஸமானரூபாஸு. பாரேவதாஸூதி கபோதவண்ணாஸு. த³ந்தோதி நிப்³பி³ஸேவனோ. புங்க³வோதி உஸபோ⁴. தோ⁴ரய்ஹோதி து⁴ரவாஹோ. கல்யாணஜவனிக்கமோதி கல்யாணேன உஜுனா ஜவேன க³ந்தா. நாஸ்ஸ வண்ணங் பரிக்க²ரேதி அஸ்ஸ கோ³ணஸ்ஸ ஸரீரவண்ணங் ந உபபரிக்க²ந்தி, து⁴ரவஹனகம்மமேவ பன உபபரிக்க²ந்தி. யஸ்மிங் கஸ்மிஞ்சி ஜாதியேதி யத்த² கத்த²சி குலஜாதே. யாஸு காஸுசி ஏதாஸூதி ஏதாஸு க²த்தியாதி³ப்பபே⁴தா³ஸு யாஸு காஸுசி ஜாதீஸு.
Rohiṇīsūti rattavaṇṇāsu. Sarūpāsūti attano vacchakehi samānarūpāsu. Pārevatāsūti kapotavaṇṇāsu. Dantoti nibbisevano. Puṅgavoti usabho. Dhorayhoti dhuravāho. Kalyāṇajavanikkamoti kalyāṇena ujunā javena gantā. Nāssa vaṇṇaṃ parikkhareti assa goṇassa sarīravaṇṇaṃ na upaparikkhanti, dhuravahanakammameva pana upaparikkhanti. Yasmiṃ kasmiñci jātiyeti yattha katthaci kulajāte. Yāsu kāsuci etāsūti etāsu khattiyādippabhedāsu yāsu kāsuci jātīsu.
ப்³ரஹ்மசரியஸ்ஸ கேவலீதி ப்³ரஹ்மசரியஸ்ஸ கேவலேன ஸமன்னாக³தோ, பரிபுண்ணபா⁴வேன யுத்தோதி அத்தோ². கீ²ணாஸவோ ஹி ஸகலப்³ரஹ்மசாரீ நாம ஹோதி. தேனேதங் வுத்தங். பன்னபா⁴ரோதி ஓரோபிதபா⁴ரோ, க²ந்த⁴பா⁴ரங் கிலேஸபா⁴ரங் காமகு³ணபா⁴ரஞ்ச ஓரோபெத்வா டி²தோதி அத்தோ². கதகிச்சோதி சதூஹி மக்³கே³ஹி கிச்சங் கத்வா டி²தோ. பாரகூ³ ஸப்³ப³த⁴ம்மானந்தி ஸப்³ப³த⁴ம்மா வுச்சந்தி பஞ்சக்க²ந்தா⁴ த்³வாத³ஸாயதனானி அட்டா²ரஸ தா⁴துயோ, தேஸங் ஸப்³ப³த⁴ம்மானங் அபி⁴ஞ்ஞாபாரங், பரிஞ்ஞாபாரங், பஹானபாரங், பா⁴வனாபாரங், ஸச்சி²கிரியாபாரங், ஸமாபத்திபாரஞ்சாதி ச²ப்³பி³த⁴ங் பாரங் க³தத்தா பாரகூ³. அனுபாதா³யாதி அக்³க³ஹெத்வா. நிப்³பு³தோதி கிலேஸஸந்தாபரஹிதோ. விரஜேதி ராக³தோ³ஸமோஹரஜரஹிதே.
Brahmacariyassa kevalīti brahmacariyassa kevalena samannāgato, paripuṇṇabhāvena yuttoti attho. Khīṇāsavo hi sakalabrahmacārī nāma hoti. Tenetaṃ vuttaṃ. Pannabhāroti oropitabhāro, khandhabhāraṃ kilesabhāraṃ kāmaguṇabhārañca oropetvā ṭhitoti attho. Katakiccoti catūhi maggehi kiccaṃ katvā ṭhito. Pāragū sabbadhammānanti sabbadhammā vuccanti pañcakkhandhā dvādasāyatanāni aṭṭhārasa dhātuyo, tesaṃ sabbadhammānaṃ abhiññāpāraṃ, pariññāpāraṃ, pahānapāraṃ, bhāvanāpāraṃ, sacchikiriyāpāraṃ, samāpattipārañcāti chabbidhaṃ pāraṃ gatattā pāragū. Anupādāyāti aggahetvā. Nibbutoti kilesasantāparahito. Virajeti rāgadosamoharajarahite.
அவிஜானந்தாதி கெ²த்தங் அஜானந்தா. து³ம்மேதா⁴தி நிப்பஞ்ஞா. அஸ்ஸுதாவினோதி கெ²த்தவினிச்ச²யஸவனேன ரஹிதா. ப³ஹித்³தா⁴தி இமம்ஹா ஸாஸனா ப³ஹித்³தா⁴. ந ஹி ஸந்தே உபாஸரேதி பு³த்³த⁴பச்சேகபு³த்³த⁴கீ²ணாஸவே உத்தமபுரிஸே ந உபஸங்கமந்தி. தீ⁴ரஸம்மதேதி பண்டி³தேஹி ஸம்மதே ஸம்பா⁴விதே. மூலஜாதா பதிட்டி²தாதி இமினா ஸோதாபன்னஸ்ஸ ஸத்³த⁴ங் த³ஸ்ஸேதி. குலே வா இத⁴ ஜாயரேதி இத⁴ வா மனுஸ்ஸலோகே க²த்தியப்³ராஹ்மணவெஸ்ஸகுலே ஜாயந்தி. அயமேவ ஹி திவிதா⁴ குலஸம்பத்தி நாம. அனுபுப்³பே³ன நிப்³பா³னங், அதி⁴க³ச்ச²ந்தீதி ஸீலஸமாதி⁴பஞ்ஞாதி இமே கு³ணே பூரெத்வா அனுக்கமேன நிப்³பா³னங் அதி⁴க³ச்ச²ந்தீதி.
Avijānantāti khettaṃ ajānantā. Dummedhāti nippaññā. Assutāvinoti khettavinicchayasavanena rahitā. Bahiddhāti imamhā sāsanā bahiddhā. Na hi sante upāsareti buddhapaccekabuddhakhīṇāsave uttamapurise na upasaṅkamanti. Dhīrasammateti paṇḍitehi sammate sambhāvite. Mūlajātā patiṭṭhitāti iminā sotāpannassa saddhaṃ dasseti. Kule vā idha jāyareti idha vā manussaloke khattiyabrāhmaṇavessakule jāyanti. Ayameva hi tividhā kulasampatti nāma. Anupubbena nibbānaṃ, adhigacchantīti sīlasamādhipaññāti ime guṇe pūretvā anukkamena nibbānaṃ adhigacchantīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. வச்ச²கொ³த்தஸுத்தங் • 7. Vacchagottasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. வச்ச²கொ³த்தஸுத்தவண்ணனா • 7. Vacchagottasuttavaṇṇanā
