| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৭. ৰচ্ছগোত্তসুত্তৰণ্ণনা
7. Vacchagottasuttavaṇṇanā
৫৮. সত্তমে মহাৰিপাকন্তি উল়ারফলং বহুৰিপাকং। ধম্মো নাম কথিতকথা ‘‘অত্থং দহতি ৰিদহতী’’তি কত্ৰা। অনুধম্মো নাম পটিকথনং ‘‘তং অনুগতো ধম্মো’’তি কত্ৰা। সহ ধম্মেনাতি সহধম্মো, সো এৰ সহধম্মিকো। ধম্মসদ্দো চেত্থ কারণপরিযাযোতি আহ ‘‘সকারণো’’তি। ৰাদস্সাতি ৰচনস্স। অনুপাতো অনুপচ্ছা পৰত্তি।
58. Sattame mahāvipākanti uḷāraphalaṃ bahuvipākaṃ. Dhammo nāma kathitakathā ‘‘atthaṃ dahati vidahatī’’ti katvā. Anudhammo nāma paṭikathanaṃ ‘‘taṃ anugato dhammo’’ti katvā. Saha dhammenāti sahadhammo, so eva sahadhammiko. Dhammasaddo cettha kāraṇapariyāyoti āha ‘‘sakāraṇo’’ti. Vādassāti vacanassa. Anupāto anupacchā pavatti.
পরিপন্থে তিট্ঠতীতি পারিপন্থিকো। পন্থে ঠত্ৰা পরেসং সাপতেয্যং ছিন্দনতো পন্থদূহনচোরো। যদি পচ্চৰেক্খণঞাণং, কথং তং অসেক্খন্তি আহ ‘‘অসেক্খস্স পৰত্তত্তা’’তি। ইতরানীতি সীলক্খন্ধাদীনি। সযম্পীতি পি-সদ্দো ‘‘অসেক্খস্স পৰত্তা চা’’তি ইমমত্থং সম্পিণ্ডেতি।
Paripanthe tiṭṭhatīti pāripanthiko. Panthe ṭhatvā paresaṃ sāpateyyaṃ chindanato panthadūhanacoro. Yadi paccavekkhaṇañāṇaṃ, kathaṃ taṃ asekkhanti āha ‘‘asekkhassa pavattattā’’ti. Itarānīti sīlakkhandhādīni. Sayampīti pi-saddo ‘‘asekkhassa pavattā cā’’ti imamatthaṃ sampiṇḍeti.
নিব্বিসেৰনোতি ৰিসেৰনরহিতো ৰিগতৰিলোমভাৰো। ন উপপরিক্খন্তীতি ন ৰিচারেন্তি। জাতিং নিব্বত্তিং যাতি উপগচ্ছতীতি জাতিযো, জাতোতি অত্থো। তেনাহ ‘‘যত্থ কত্থচি কুলজাতে’’তি।
Nibbisevanoti visevanarahito vigatavilomabhāvo. Na upaparikkhantīti na vicārenti. Jātiṃ nibbattiṃ yāti upagacchatīti jātiyo, jātoti attho. Tenāha ‘‘yattha katthaci kulajāte’’ti.
কেৰলীতি কেৰলৰা, পারিপূরিমাতি অত্থো। তেনাহ ‘‘পরিপুণ্ণভাৰেন যুত্তো’’তি। এতং কেৰলীতি পদং। অভিঞ্ঞাপারন্তি অভিজানস্স পারং। পরিযন্তং গতত্তা পারগূ। এস নযো সেসপদেসুপি। খেত্তৰিনিচ্ছযসৰনেনাতি ‘‘ইমেহি সীলাদিগুণসম্পন্না সদেৰকে লোকে পুঞ্ঞস্স খেত্তং, তদঞ্ঞো ন খেত্ত’’ন্তি এৰং খেত্তৰিনিচ্ছযসৰনেন রহিতা।
Kevalīti kevalavā, pāripūrimāti attho. Tenāha ‘‘paripuṇṇabhāvena yutto’’ti. Etaṃ kevalīti padaṃ. Abhiññāpāranti abhijānassa pāraṃ. Pariyantaṃ gatattā pāragū. Esa nayo sesapadesupi. Khettavinicchayasavanenāti ‘‘imehi sīlādiguṇasampannā sadevake loke puññassa khettaṃ, tadañño na khetta’’nti evaṃ khettavinicchayasavanena rahitā.
ৰচ্ছগোত্তসুত্তৰণ্ণনা নিট্ঠিতা।
Vacchagottasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৭. ৰচ্ছগোত্তসুত্তং • 7. Vacchagottasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. ৰচ্ছগোত্তসুত্তৰণ্ণনা • 7. Vacchagottasuttavaṇṇanā
