| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๗. วจฺฉโคตฺตสุตฺตวณฺณนา
7. Vacchagottasuttavaṇṇanā
๕๘. สตฺตเม มหาวิปากนฺติ อุฬารผลํ พหุวิปากํฯ ธโมฺม นาม กถิตกถา ‘‘อตฺถํ ทหติ วิทหตี’’ติ กตฺวาฯ อนุธโมฺม นาม ปฎิกถนํ ‘‘ตํ อนุคโต ธโมฺม’’ติ กตฺวาฯ สห ธเมฺมนาติ สหธโมฺม, โส เอว สหธมฺมิโกฯ ธมฺมสโทฺท เจตฺถ การณปริยาโยติ อาห ‘‘สการโณ’’ติฯ วาทสฺสาติ วจนสฺสฯ อนุปาโต อนุปจฺฉา ปวตฺติฯ
58. Sattame mahāvipākanti uḷāraphalaṃ bahuvipākaṃ. Dhammo nāma kathitakathā ‘‘atthaṃ dahati vidahatī’’ti katvā. Anudhammo nāma paṭikathanaṃ ‘‘taṃ anugato dhammo’’ti katvā. Saha dhammenāti sahadhammo, so eva sahadhammiko. Dhammasaddo cettha kāraṇapariyāyoti āha ‘‘sakāraṇo’’ti. Vādassāti vacanassa. Anupāto anupacchā pavatti.
ปริปเนฺถ ติฎฺฐตีติ ปาริปนฺถิโกฯ ปเนฺถ ฐตฺวา ปเรสํ สาปเตยฺยํ ฉินฺทนโต ปนฺถทูหนโจโรฯ ยทิ ปจฺจเวกฺขณญาณํ, กถํ ตํ อเสกฺขนฺติ อาห ‘‘อเสกฺขสฺส ปวตฺตตฺตา’’ติฯ อิตรานีติ สีลกฺขนฺธาทีนิฯ สยมฺปีติ ปิ-สโทฺท ‘‘อเสกฺขสฺส ปวตฺตา จา’’ติ อิมมตฺถํ สมฺปิเณฺฑติฯ
Paripanthe tiṭṭhatīti pāripanthiko. Panthe ṭhatvā paresaṃ sāpateyyaṃ chindanato panthadūhanacoro. Yadi paccavekkhaṇañāṇaṃ, kathaṃ taṃ asekkhanti āha ‘‘asekkhassa pavattattā’’ti. Itarānīti sīlakkhandhādīni. Sayampīti pi-saddo ‘‘asekkhassa pavattā cā’’ti imamatthaṃ sampiṇḍeti.
นิพฺพิเสวโนติ วิเสวนรหิโต วิคตวิโลมภาโวฯ น อุปปริกฺขนฺตีติ น วิจาเรนฺติฯ ชาติํ นิพฺพตฺติํ ยาติ อุปคจฺฉตีติ ชาติโย, ชาโตติ อโตฺถฯ เตนาห ‘‘ยตฺถ กตฺถจิ กุลชาเต’’ติฯ
Nibbisevanoti visevanarahito vigatavilomabhāvo. Na upaparikkhantīti na vicārenti. Jātiṃ nibbattiṃ yāti upagacchatīti jātiyo, jātoti attho. Tenāha ‘‘yattha katthaci kulajāte’’ti.
เกวลีติ เกวลวา, ปาริปูริมาติ อโตฺถฯ เตนาห ‘‘ปริปุณฺณภาเวน ยุโตฺต’’ติฯ เอตํ เกวลีติ ปทํฯ อภิญฺญาปารนฺติ อภิชานสฺส ปารํฯ ปริยนฺตํ คตตฺตา ปารคูฯ เอส นโย เสสปเทสุปิฯ เขตฺตวินิจฺฉยสวเนนาติ ‘‘อิเมหิ สีลาทิคุณสมฺปนฺนา สเทวเก โลเก ปุญฺญสฺส เขตฺตํ, ตทโญฺญ น เขตฺต’’นฺติ เอวํ เขตฺตวินิจฺฉยสวเนน รหิตาฯ
Kevalīti kevalavā, pāripūrimāti attho. Tenāha ‘‘paripuṇṇabhāvena yutto’’ti. Etaṃ kevalīti padaṃ. Abhiññāpāranti abhijānassa pāraṃ. Pariyantaṃ gatattā pāragū. Esa nayo sesapadesupi. Khettavinicchayasavanenāti ‘‘imehi sīlādiguṇasampannā sadevake loke puññassa khettaṃ, tadañño na khetta’’nti evaṃ khettavinicchayasavanena rahitā.
วจฺฉโคตฺตสุตฺตวณฺณนา นิฎฺฐิตาฯ
Vacchagottasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๗. วจฺฉโคตฺตสุตฺตํ • 7. Vacchagottasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๗. วจฺฉโคตฺตสุตฺตวณฺณนา • 7. Vacchagottasuttavaṇṇanā
