| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៧. វច្ឆគោត្តសុត្តវណ្ណនា
7. Vacchagottasuttavaṇṇanā
៥៨. សត្តមេ មហាវិបាកន្តិ ឧឡារផលំ ពហុវិបាកំ។ ធម្មោ នាម កថិតកថា ‘‘អត្ថំ ទហតិ វិទហតី’’តិ កត្វា។ អនុធម្មោ នាម បដិកថនំ ‘‘តំ អនុគតោ ធម្មោ’’តិ កត្វា។ សហ ធម្មេនាតិ សហធម្មោ, សោ ឯវ សហធម្មិកោ។ ធម្មសទ្ទោ ចេត្ថ ការណបរិយាយោតិ អាហ ‘‘សការណោ’’តិ។ វាទស្សាតិ វចនស្ស។ អនុបាតោ អនុបច្ឆា បវត្តិ។
58. Sattame mahāvipākanti uḷāraphalaṃ bahuvipākaṃ. Dhammo nāma kathitakathā ‘‘atthaṃ dahati vidahatī’’ti katvā. Anudhammo nāma paṭikathanaṃ ‘‘taṃ anugato dhammo’’ti katvā. Saha dhammenāti sahadhammo, so eva sahadhammiko. Dhammasaddo cettha kāraṇapariyāyoti āha ‘‘sakāraṇo’’ti. Vādassāti vacanassa. Anupāto anupacchā pavatti.
បរិបន្ថេ តិដ្ឋតីតិ បារិបន្ថិកោ។ បន្ថេ ឋត្វា បរេសំ សាបតេយ្យំ ឆិន្ទនតោ បន្ថទូហនចោរោ។ យទិ បច្ចវេក្ខណញាណំ, កថំ តំ អសេក្ខន្តិ អាហ ‘‘អសេក្ខស្ស បវត្តត្តា’’តិ។ ឥតរានីតិ សីលក្ខន្ធាទីនិ។ សយម្បីតិ បិ-សទ្ទោ ‘‘អសេក្ខស្ស បវត្តា ចា’’តិ ឥមមត្ថំ សម្បិណ្ឌេតិ។
Paripanthe tiṭṭhatīti pāripanthiko. Panthe ṭhatvā paresaṃ sāpateyyaṃ chindanato panthadūhanacoro. Yadi paccavekkhaṇañāṇaṃ, kathaṃ taṃ asekkhanti āha ‘‘asekkhassa pavattattā’’ti. Itarānīti sīlakkhandhādīni. Sayampīti pi-saddo ‘‘asekkhassa pavattā cā’’ti imamatthaṃ sampiṇḍeti.
និព្ពិសេវនោតិ វិសេវនរហិតោ វិគតវិលោមភាវោ។ ន ឧបបរិក្ខន្តីតិ ន វិចារេន្តិ។ ជាតិំ និព្ពត្តិំ យាតិ ឧបគច្ឆតីតិ ជាតិយោ, ជាតោតិ អត្ថោ។ តេនាហ ‘‘យត្ថ កត្ថចិ កុលជាតេ’’តិ។
Nibbisevanoti visevanarahito vigatavilomabhāvo. Na upaparikkhantīti na vicārenti. Jātiṃ nibbattiṃ yāti upagacchatīti jātiyo, jātoti attho. Tenāha ‘‘yattha katthaci kulajāte’’ti.
កេវលីតិ កេវលវា, បារិបូរិមាតិ អត្ថោ។ តេនាហ ‘‘បរិបុណ្ណភាវេន យុត្តោ’’តិ។ ឯតំ កេវលីតិ បទំ។ អភិញ្ញាបារន្តិ អភិជានស្ស បារំ។ បរិយន្តំ គតត្តា បារគូ។ ឯស នយោ សេសបទេសុបិ។ ខេត្តវិនិច្ឆយសវនេនាតិ ‘‘ឥមេហិ សីលាទិគុណសម្បន្នា សទេវកេ លោកេ បុញ្ញស្ស ខេត្តំ, តទញ្ញោ ន ខេត្ត’’ន្តិ ឯវំ ខេត្តវិនិច្ឆយសវនេន រហិតា។
Kevalīti kevalavā, pāripūrimāti attho. Tenāha ‘‘paripuṇṇabhāvena yutto’’ti. Etaṃ kevalīti padaṃ. Abhiññāpāranti abhijānassa pāraṃ. Pariyantaṃ gatattā pāragū. Esa nayo sesapadesupi. Khettavinicchayasavanenāti ‘‘imehi sīlādiguṇasampannā sadevake loke puññassa khettaṃ, tadañño na khetta’’nti evaṃ khettavinicchayasavanena rahitā.
វច្ឆគោត្តសុត្តវណ្ណនា និដ្ឋិតា។
Vacchagottasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៧. វច្ឆគោត្តសុត្តំ • 7. Vacchagottasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៧. វច្ឆគោត្តសុត្តវណ្ណនា • 7. Vacchagottasuttavaṇṇanā
