| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೭. ವಚ್ಛಗೋತ್ತಸುತ್ತವಣ್ಣನಾ
7. Vacchagottasuttavaṇṇanā
೫೮. ಸತ್ತಮೇ ಮಹಾವಿಪಾಕನ್ತಿ ಉಳಾರಫಲಂ ಬಹುವಿಪಾಕಂ। ಧಮ್ಮೋ ನಾಮ ಕಥಿತಕಥಾ ‘‘ಅತ್ಥಂ ದಹತಿ ವಿದಹತೀ’’ತಿ ಕತ್ವಾ। ಅನುಧಮ್ಮೋ ನಾಮ ಪಟಿಕಥನಂ ‘‘ತಂ ಅನುಗತೋ ಧಮ್ಮೋ’’ತಿ ಕತ್ವಾ। ಸಹ ಧಮ್ಮೇನಾತಿ ಸಹಧಮ್ಮೋ, ಸೋ ಏವ ಸಹಧಮ್ಮಿಕೋ। ಧಮ್ಮಸದ್ದೋ ಚೇತ್ಥ ಕಾರಣಪರಿಯಾಯೋತಿ ಆಹ ‘‘ಸಕಾರಣೋ’’ತಿ। ವಾದಸ್ಸಾತಿ ವಚನಸ್ಸ। ಅನುಪಾತೋ ಅನುಪಚ್ಛಾ ಪವತ್ತಿ।
58. Sattame mahāvipākanti uḷāraphalaṃ bahuvipākaṃ. Dhammo nāma kathitakathā ‘‘atthaṃ dahati vidahatī’’ti katvā. Anudhammo nāma paṭikathanaṃ ‘‘taṃ anugato dhammo’’ti katvā. Saha dhammenāti sahadhammo, so eva sahadhammiko. Dhammasaddo cettha kāraṇapariyāyoti āha ‘‘sakāraṇo’’ti. Vādassāti vacanassa. Anupāto anupacchā pavatti.
ಪರಿಪನ್ಥೇ ತಿಟ್ಠತೀತಿ ಪಾರಿಪನ್ಥಿಕೋ। ಪನ್ಥೇ ಠತ್ವಾ ಪರೇಸಂ ಸಾಪತೇಯ್ಯಂ ಛಿನ್ದನತೋ ಪನ್ಥದೂಹನಚೋರೋ। ಯದಿ ಪಚ್ಚವೇಕ್ಖಣಞಾಣಂ, ಕಥಂ ತಂ ಅಸೇಕ್ಖನ್ತಿ ಆಹ ‘‘ಅಸೇಕ್ಖಸ್ಸ ಪವತ್ತತ್ತಾ’’ತಿ। ಇತರಾನೀತಿ ಸೀಲಕ್ಖನ್ಧಾದೀನಿ। ಸಯಮ್ಪೀತಿ ಪಿ-ಸದ್ದೋ ‘‘ಅಸೇಕ್ಖಸ್ಸ ಪವತ್ತಾ ಚಾ’’ತಿ ಇಮಮತ್ಥಂ ಸಮ್ಪಿಣ್ಡೇತಿ।
Paripanthe tiṭṭhatīti pāripanthiko. Panthe ṭhatvā paresaṃ sāpateyyaṃ chindanato panthadūhanacoro. Yadi paccavekkhaṇañāṇaṃ, kathaṃ taṃ asekkhanti āha ‘‘asekkhassa pavattattā’’ti. Itarānīti sīlakkhandhādīni. Sayampīti pi-saddo ‘‘asekkhassa pavattā cā’’ti imamatthaṃ sampiṇḍeti.
ನಿಬ್ಬಿಸೇವನೋತಿ ವಿಸೇವನರಹಿತೋ ವಿಗತವಿಲೋಮಭಾವೋ। ನ ಉಪಪರಿಕ್ಖನ್ತೀತಿ ನ ವಿಚಾರೇನ್ತಿ। ಜಾತಿಂ ನಿಬ್ಬತ್ತಿಂ ಯಾತಿ ಉಪಗಚ್ಛತೀತಿ ಜಾತಿಯೋ, ಜಾತೋತಿ ಅತ್ಥೋ। ತೇನಾಹ ‘‘ಯತ್ಥ ಕತ್ಥಚಿ ಕುಲಜಾತೇ’’ತಿ।
Nibbisevanoti visevanarahito vigatavilomabhāvo. Na upaparikkhantīti na vicārenti. Jātiṃ nibbattiṃ yāti upagacchatīti jātiyo, jātoti attho. Tenāha ‘‘yattha katthaci kulajāte’’ti.
ಕೇವಲೀತಿ ಕೇವಲವಾ, ಪಾರಿಪೂರಿಮಾತಿ ಅತ್ಥೋ। ತೇನಾಹ ‘‘ಪರಿಪುಣ್ಣಭಾವೇನ ಯುತ್ತೋ’’ತಿ। ಏತಂ ಕೇವಲೀತಿ ಪದಂ। ಅಭಿಞ್ಞಾಪಾರನ್ತಿ ಅಭಿಜಾನಸ್ಸ ಪಾರಂ। ಪರಿಯನ್ತಂ ಗತತ್ತಾ ಪಾರಗೂ। ಏಸ ನಯೋ ಸೇಸಪದೇಸುಪಿ। ಖೇತ್ತವಿನಿಚ್ಛಯಸವನೇನಾತಿ ‘‘ಇಮೇಹಿ ಸೀಲಾದಿಗುಣಸಮ್ಪನ್ನಾ ಸದೇವಕೇ ಲೋಕೇ ಪುಞ್ಞಸ್ಸ ಖೇತ್ತಂ, ತದಞ್ಞೋ ನ ಖೇತ್ತ’’ನ್ತಿ ಏವಂ ಖೇತ್ತವಿನಿಚ್ಛಯಸವನೇನ ರಹಿತಾ।
Kevalīti kevalavā, pāripūrimāti attho. Tenāha ‘‘paripuṇṇabhāvena yutto’’ti. Etaṃ kevalīti padaṃ. Abhiññāpāranti abhijānassa pāraṃ. Pariyantaṃ gatattā pāragū. Esa nayo sesapadesupi. Khettavinicchayasavanenāti ‘‘imehi sīlādiguṇasampannā sadevake loke puññassa khettaṃ, tadañño na khetta’’nti evaṃ khettavinicchayasavanena rahitā.
ವಚ್ಛಗೋತ್ತಸುತ್ತವಣ್ಣನಾ ನಿಟ್ಠಿತಾ।
Vacchagottasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ವಚ್ಛಗೋತ್ತಸುತ್ತಂ • 7. Vacchagottasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೭. ವಚ್ಛಗೋತ್ತಸುತ್ತವಣ್ಣನಾ • 7. Vacchagottasuttavaṇṇanā
