| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
7. වච්‌ඡගොත්‌තසුත්‌තවණ්‌ණනා
7. Vacchagottasuttavaṇṇanā
58. සත්‌තමෙ මහාවිපාකන්‌ති උළාරඵලං බහුවිපාකං. ධම්‌මො නාම කථිතකථා ‘‘අත්‌ථං දහති විදහතී’’ති කත්‌වා. අනුධම්‌මො නාම පටිකථනං ‘‘තං අනුගතො ධම්‌මො’’ති කත්‌වා. සහ ධම්‌මෙනාති සහධම්‌මො, සො එව සහධම්‌මිකො. ධම්‌මසද්‌දො චෙත්‌ථ කාරණපරියායොති ආහ ‘‘සකාරණො’’ති. වාදස්‌සාති වචනස්‌ස. අනුපාතො අනුපච්‌ඡා පවත්‌ති.
58. Sattame mahāvipākanti uḷāraphalaṃ bahuvipākaṃ. Dhammo nāma kathitakathā ‘‘atthaṃ dahati vidahatī’’ti katvā. Anudhammo nāma paṭikathanaṃ ‘‘taṃ anugato dhammo’’ti katvā. Saha dhammenāti sahadhammo, so eva sahadhammiko. Dhammasaddo cettha kāraṇapariyāyoti āha ‘‘sakāraṇo’’ti. Vādassāti vacanassa. Anupāto anupacchā pavatti.
පරිපන්‌ථෙ තිට්‌ඨතීති පාරිපන්‌ථිකො. පන්‌ථෙ ඨත්‌වා පරෙසං සාපතෙය්‍යං ඡින්‌දනතො පන්‌ථදූහනචොරො. යදි පච්‌චවෙක්‌ඛණඤාණං, කථං තං අසෙක්‌ඛන්‌ති ආහ ‘‘අසෙක්‌ඛස්‌ස පවත්‌තත්‌තා’’ති. ඉතරානීති සීලක්‌ඛන්‌ධාදීනි. සයම්‌පීති පි-සද්‌දො ‘‘අසෙක්‌ඛස්‌ස පවත්‌තා චා’’ති ඉමමත්‌ථං සම්‌පිණ්‌ඩෙති.
Paripanthe tiṭṭhatīti pāripanthiko. Panthe ṭhatvā paresaṃ sāpateyyaṃ chindanato panthadūhanacoro. Yadi paccavekkhaṇañāṇaṃ, kathaṃ taṃ asekkhanti āha ‘‘asekkhassa pavattattā’’ti. Itarānīti sīlakkhandhādīni. Sayampīti pi-saddo ‘‘asekkhassa pavattā cā’’ti imamatthaṃ sampiṇḍeti.
නිබ්‌බිසෙවනොති විසෙවනරහිතො විගතවිලොමභාවො. න උපපරික්‌ඛන්‌තීති න විචාරෙන්‌ති. ජාතිං නිබ්‌බත්‌තිං යාති උපගච්‌ඡතීති ජාතියො, ජාතොති අත්‌ථො. තෙනාහ ‘‘යත්‌ථ කත්‌ථචි කුලජාතෙ’’ති.
Nibbisevanoti visevanarahito vigatavilomabhāvo. Na upaparikkhantīti na vicārenti. Jātiṃ nibbattiṃ yāti upagacchatīti jātiyo, jātoti attho. Tenāha ‘‘yattha katthaci kulajāte’’ti.
කෙවලීති කෙවලවා, පාරිපූරිමාති අත්‌ථො. තෙනාහ ‘‘පරිපුණ්‌ණභාවෙන යුත්‌තො’’ති. එතං කෙවලීති පදං. අභිඤ්‌ඤාපාරන්‌ති අභිජානස්‌ස පාරං. පරියන්‌තං ගතත්‌තා පාරගූ. එස නයො සෙසපදෙසුපි. ඛෙත්‌තවිනිච්‌ඡයසවනෙනාති ‘‘ඉමෙහි සීලාදිගුණසම්‌පන්‌නා සදෙවකෙ ලොකෙ පුඤ්‌ඤස්‌ස ඛෙත්‌තං, තදඤ්‌ඤො න ඛෙත්‌ත’’න්‌ති එවං ඛෙත්‌තවිනිච්‌ඡයසවනෙන රහිතා.
Kevalīti kevalavā, pāripūrimāti attho. Tenāha ‘‘paripuṇṇabhāvena yutto’’ti. Etaṃ kevalīti padaṃ. Abhiññāpāranti abhijānassa pāraṃ. Pariyantaṃ gatattā pāragū. Esa nayo sesapadesupi. Khettavinicchayasavanenāti ‘‘imehi sīlādiguṇasampannā sadevake loke puññassa khettaṃ, tadañño na khetta’’nti evaṃ khettavinicchayasavanena rahitā.
වච්‌ඡගොත්‌තසුත්‌තවණ්‌ණනා නිට්‌ඨිතා.
Vacchagottasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. වච්‌ඡගොත්‌තසුත්‌තං • 7. Vacchagottasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. වච්‌ඡගොත්‌තසුත්‌තවණ්‌ණනා • 7. Vacchagottasuttavaṇṇanā
