| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. வசீபே⁴த³கதா²வண்ணனா
5. Vacībhedakathāvaṇṇanā
326. இதா³னி வசீபே⁴த³கதா² நாம ஹோதி. தத்த² யேஸங் ‘‘ஸோதாபத்திமக்³க³க்க²ணே பட²மங் ஜா²னங் ஸமாபன்னஸ்ஸ து³க்க²ந்தி வாசா பி⁴ஜ்ஜதீ’’தி லத்³தி⁴, ஸெய்யதா²பி ஏதரஹி புப்³ப³ஸேலியாதீ³னங்; தே ஸந்தா⁴ய ஸமாபன்னஸ்ஸ அத்தி² வசீபே⁴தோ³தி புச்சா² ஸகவாதி³ஸ்ஸ, லத்³தி⁴யங் ட²த்வா படிஞ்ஞா பரவாதி³ஸ்ஸ. புன ஸப்³ப³த்தா²தி தயோ ப⁴வே ஸந்தா⁴ய புட்டோ² அரூபங் ஸந்தா⁴ய படிக்கி²பதி. ஸப்³ப³தா³தி காலவஸேன புட்டோ² பட²மமக்³க³க்க²ணே பட²மஜ்ஜா²னிகஸமாபத்திதோ அஞ்ஞங் ஸப்³ப³ங் ஸமாபத்திகாலங் ஸந்தா⁴ய படிக்கி²பதி. ஸப்³பே³ஸங் ஸமாபன்னானந்தி புட்டோ² லோகியஸமாபத்தியோ ஸமாபன்னே ஸந்தா⁴ய படிக்கி²பதி. ஸப்³ப³ஸமாபத்தீஸூதி புட்டோ² து³தியஜ்ஜா²னாதி³கங் லோகுத்தரங் ஸப்³ப³ஞ்ச லோகியஸமாபத்திங் ஸந்தா⁴ய படிக்கி²பதி.
326. Idāni vacībhedakathā nāma hoti. Tattha yesaṃ ‘‘sotāpattimaggakkhaṇe paṭhamaṃ jhānaṃ samāpannassa dukkhanti vācā bhijjatī’’ti laddhi, seyyathāpi etarahi pubbaseliyādīnaṃ; te sandhāya samāpannassa atthi vacībhedoti pucchā sakavādissa, laddhiyaṃ ṭhatvā paṭiññā paravādissa. Puna sabbatthāti tayo bhave sandhāya puṭṭho arūpaṃ sandhāya paṭikkhipati. Sabbadāti kālavasena puṭṭho paṭhamamaggakkhaṇe paṭhamajjhānikasamāpattito aññaṃ sabbaṃ samāpattikālaṃ sandhāya paṭikkhipati. Sabbesaṃ samāpannānanti puṭṭho lokiyasamāpattiyo samāpanne sandhāya paṭikkhipati. Sabbasamāpattīsūti puṭṭho dutiyajjhānādikaṃ lokuttaraṃ sabbañca lokiyasamāpattiṃ sandhāya paṭikkhipati.
காயபே⁴தோ³தி அபி⁴க்கமாதி³வஸேன பவத்தகாயவிஞ்ஞத்தி. இத³ங் ‘‘யானி சித்தானி வசீவிஞ்ஞத்திங் ஸமுட்டா²பெந்தி, தானேவ காயவிஞ்ஞத்திங். ஏவங் ஸந்தே கஸ்மா காயபே⁴தோ³பி ந ஹோதீ’’தி சோத³னத்த²ங் புச்ச²தி. இதரோ லத்³தி⁴வஸேன படிக்கி²பதி சேவ படிஜானாதி ச. இதா³னி யதி³ ஸோ மக்³க³க்க²ணே ‘‘து³க்க²’’ந்தி வாசங் பா⁴ஸதி, ‘‘ஸமுத³யோ’’திஆதி³கம்பி பா⁴ஸெய்ய. யதி³ வா தங் ந பா⁴ஸதி, இதரம்பி ந பா⁴ஸெய்யாதி சோத³னத்த²ங் து³க்க²ந்தி ஜானந்தோதிஆத³யோ பஞ்ஹா வுத்தா. இதரோ பன அத்தனோ லத்³தி⁴வஸேனேவ படிஜானாதி சேவ படிக்கி²பதி ச. லோகுத்தரங் பட²மஜ்ஜா²னங் ஸமாபன்னோ து³க்க²து³க்க²ந்தி விபஸ்ஸதீதி ஹிஸ்ஸ லத்³தி⁴.
Kāyabhedoti abhikkamādivasena pavattakāyaviññatti. Idaṃ ‘‘yāni cittāni vacīviññattiṃ samuṭṭhāpenti, tāneva kāyaviññattiṃ. Evaṃ sante kasmā kāyabhedopi na hotī’’ti codanatthaṃ pucchati. Itaro laddhivasena paṭikkhipati ceva paṭijānāti ca. Idāni yadi so maggakkhaṇe ‘‘dukkha’’nti vācaṃ bhāsati, ‘‘samudayo’’tiādikampi bhāseyya. Yadi vā taṃ na bhāsati, itarampi na bhāseyyāti codanatthaṃ dukkhanti jānantotiādayo pañhā vuttā. Itaro pana attano laddhivaseneva paṭijānāti ceva paṭikkhipati ca. Lokuttaraṃ paṭhamajjhānaṃ samāpanno dukkhadukkhanti vipassatīti hissa laddhi.
328. ஞாணந்தி லோகுத்தரங் சதுஸச்சஞாணங். ஸோதந்தி ஸோதவிஞ்ஞாணங் அதி⁴ப்பேதங், யேன தங் ஸத்³த³ங் ஸுணாதி. த்³வின்னங் ப²ஸ்ஸானந்தி ஸோதஸம்ப²ஸ்ஸமனோஸம்ப²ஸ்ஸானங்.
328. Ñāṇanti lokuttaraṃ catusaccañāṇaṃ. Sotanti sotaviññāṇaṃ adhippetaṃ, yena taṃ saddaṃ suṇāti. Dvinnaṃ phassānanti sotasamphassamanosamphassānaṃ.
329. நோ வத ரே வத்தப்³பே³தி யதி³ அவிஸேஸேன யங்கிஞ்சி ஸமாபன்னஸ்ஸ நத்தி² வசீபே⁴தோ³, ந அவிஸேஸேன வத்தப்³ப³ங் ‘‘ஸமாபன்னஸ்ஸ அத்தி² வசீபே⁴தோ³’’தி. ஸேஸமெத்த² உத்தானத்த²மேவ ஸத்³தி⁴ங் ஸுத்தஸாத⁴னாய. யங் பனேதேன ‘‘ஸிகி²ஸ்ஸ ஆனந்த³, ப⁴க³வதோ’’தி பரியோஸானே ஸுத்தங் ஆப⁴தங், தத்த² யேன ஸமாபத்திசித்தேன ஸோ வசீபே⁴தோ³ ஸமுட்டி²தோ, காயபே⁴தோ³பி தேன ஸமுட்டா²தியேவ, ந ச தங் லோகுத்தரங் பட²மஜ்ஜா²னசித்தங், தஸ்மா அஸாத⁴கந்தி.
329. No vata re vattabbeti yadi avisesena yaṃkiñci samāpannassa natthi vacībhedo, na avisesena vattabbaṃ ‘‘samāpannassa atthi vacībhedo’’ti. Sesamettha uttānatthameva saddhiṃ suttasādhanāya. Yaṃ panetena ‘‘sikhissa ānanda, bhagavato’’ti pariyosāne suttaṃ ābhataṃ, tattha yena samāpatticittena so vacībhedo samuṭṭhito, kāyabhedopi tena samuṭṭhātiyeva, na ca taṃ lokuttaraṃ paṭhamajjhānacittaṃ, tasmā asādhakanti.
வசீபே⁴த³கதா²வண்ணனா.
Vacībhedakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (14) 5. வசீபே⁴த³கதா² • (14) 5. Vacībhedakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. வசீபே⁴த³கதா²வண்ணனா • 5. Vacībhedakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. வசீபே⁴த³கதா²வண்ணனா • 5. Vacībhedakathāvaṇṇanā
