| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৫. ৰচীভেদকথাৰণ্ণনা
5. Vacībhedakathāvaṇṇanā
৩২৬. সোতি পঠমমগ্গট্ঠো। তস্মাতি যস্মা ‘‘ৰিরজং ৰীতমলং ধম্মচক্খুং উদপাদি ‘যং কিঞ্চি সমুদযধম্মং, সব্বং তং নিরোধধম্ম’’’ন্তি সুত্তস্স অত্থং অঞ্ঞথা গহেত্ৰা উদযব্বযানুপস্সনানিস্সন্দেন মগ্গক্খণেপি দুক্খন্তি ৰিপস্সনা উপট্ঠাতি, তস্মা ‘‘সো দুক্খমিচ্চেৰ ৰাচং ভাসতী’’তি ৰদন্তি।
326. Soti paṭhamamaggaṭṭho. Tasmāti yasmā ‘‘virajaṃ vītamalaṃ dhammacakkhuṃ udapādi ‘yaṃ kiñci samudayadhammaṃ, sabbaṃ taṃ nirodhadhamma’’’nti suttassa atthaṃ aññathā gahetvā udayabbayānupassanānissandena maggakkhaṇepi dukkhanti vipassanā upaṭṭhāti, tasmā ‘‘so dukkhamicceva vācaṃ bhāsatī’’ti vadanti.
৩২৮. ইচ্ছিতেতি পরৰাদিনা সম্পটিচ্ছিতে। আরোপিতেতি যুত্তিনিদ্ধারণেন তস্মিং অত্থে পতিট্ঠাপিতে যুজ্জতি, ৰচীসমুট্ঠাপনক্খণতো পন পচ্ছা তং সদ্দং সুণাতীতি ইচ্ছিতে ন যুজ্জতি সোতৰিঞ্ঞাণস্স পচ্চুপ্পন্নারম্মণত্তাতি অধিপ্পাযো। যস্মা পন অত্তনা নিচ্ছারিতং সদ্দং অত্তনাপি সুণাতি, তস্মা সোতৰিঞ্ঞাণং ‘‘যেন তং সদ্দং সুণাতী’’তি অট্ঠকথাযং ৰুত্তন্তি দট্ঠব্বং।
328. Icchiteti paravādinā sampaṭicchite. Āropiteti yuttiniddhāraṇena tasmiṃ atthe patiṭṭhāpite yujjati, vacīsamuṭṭhāpanakkhaṇato pana pacchā taṃ saddaṃ suṇātīti icchite na yujjati sotaviññāṇassa paccuppannārammaṇattāti adhippāyo. Yasmā pana attanā nicchāritaṃ saddaṃ attanāpi suṇāti, tasmā sotaviññāṇaṃ ‘‘yena taṃ saddaṃ suṇātī’’ti aṭṭhakathāyaṃ vuttanti daṭṭhabbaṃ.
৩৩২. লোকুত্তরমগ্গক্খণেতি পঠমজ্ঝানিকস্স পঠমমগ্গস্স খণে। অভিভূসুত্তাহরণে অধিপ্পাযো ৰত্তব্বোতি এতেন তদাহরণস্স অসম্বন্ধতং দস্সেতি। তেনাহ ‘‘তস্মা অসাধক’’ন্তি।
332. Lokuttaramaggakkhaṇeti paṭhamajjhānikassa paṭhamamaggassa khaṇe. Abhibhūsuttāharaṇe adhippāyo vattabboti etena tadāharaṇassa asambandhataṃ dasseti. Tenāha ‘‘tasmā asādhaka’’nti.
ৰচীভেদকথাৰণ্ণনা নিট্ঠিতা।
Vacībhedakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৪) ৫. ৰচীভেদকথা • (14) 5. Vacībhedakathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৫. ৰচীভেদকথাৰণ্ণনা • 5. Vacībhedakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৫. ৰচীভেদকথাৰণ্ণনা • 5. Vacībhedakathāvaṇṇanā
