| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
၅. ဝစီဘေဒကထာဝဏ္ဏနာ
5. Vacībhedakathāvaṇṇanā
၃၂၆. သောတိ ပဌမမဂ္ဂဋ္ဌော။ တသ္မာတိ ယသ္မာ ‘‘ဝိရဇံ ဝီတမလံ ဓမ္မစက္ခုံ ဥဒပာဒိ ‘ယံ ကိဉ္စိ သမုဒယဓမ္မံ, သဗ္ဗံ တံ နိရောဓဓမ္မ’’’န္တိ သုတ္တသ္သ အတ္ထံ အညထာ ဂဟေတ္ဝာ ဥဒယဗ္ဗယာနုပသ္သနာနိသ္သန္ဒေန မဂ္ဂက္ခဏေပိ ဒုက္ခန္တိ ဝိပသ္သနာ ဥပဋ္ဌာတိ, တသ္မာ ‘‘သော ဒုက္ခမိစ္စေဝ ဝာစံ ဘာသတီ’’တိ ဝဒန္တိ။
326. Soti paṭhamamaggaṭṭho. Tasmāti yasmā ‘‘virajaṃ vītamalaṃ dhammacakkhuṃ udapādi ‘yaṃ kiñci samudayadhammaṃ, sabbaṃ taṃ nirodhadhamma’’’nti suttassa atthaṃ aññathā gahetvā udayabbayānupassanānissandena maggakkhaṇepi dukkhanti vipassanā upaṭṭhāti, tasmā ‘‘so dukkhamicceva vācaṃ bhāsatī’’ti vadanti.
၃၂၈. ဣစ္ဆိတေတိ ပရဝာဒိနာ သမ္ပဋိစ္ဆိတေ။ အာရောပိတေတိ ယုတ္တိနိဒ္ဓာရဏေန တသ္မိံ အတ္ထေ ပတိဋ္ဌာပိတေ ယုဇ္ဇတိ, ဝစီသမုဋ္ဌာပနက္ခဏတော ပန ပစ္ဆာ တံ သဒ္ဒံ သုဏာတီတိ ဣစ္ဆိတေ န ယုဇ္ဇတိ သောတဝိညာဏသ္သ ပစ္စုပ္ပန္နာရမ္မဏတ္တာတိ အဓိပ္ပာယော။ ယသ္မာ ပန အတ္တနာ နိစ္ဆာရိတံ သဒ္ဒံ အတ္တနာပိ သုဏာတိ, တသ္မာ သောတဝိညာဏံ ‘‘ယေန တံ သဒ္ဒံ သုဏာတီ’’တိ အဋ္ဌကထာယံ ဝုတ္တန္တိ ဒဋ္ဌဗ္ဗံ။
328. Icchiteti paravādinā sampaṭicchite. Āropiteti yuttiniddhāraṇena tasmiṃ atthe patiṭṭhāpite yujjati, vacīsamuṭṭhāpanakkhaṇato pana pacchā taṃ saddaṃ suṇātīti icchite na yujjati sotaviññāṇassa paccuppannārammaṇattāti adhippāyo. Yasmā pana attanā nicchāritaṃ saddaṃ attanāpi suṇāti, tasmā sotaviññāṇaṃ ‘‘yena taṃ saddaṃ suṇātī’’ti aṭṭhakathāyaṃ vuttanti daṭṭhabbaṃ.
၃၃၂. လောကုတ္တရမဂ္ဂက္ခဏေတိ ပဌမဇ္ဈာနိကသ္သ ပဌမမဂ္ဂသ္သ ခဏေ။ အဘိဘူသုတ္တာဟရဏေ အဓိပ္ပာယော ဝတ္တဗ္ဗောတိ ဧတေန တဒာဟရဏသ္သ အသမ္ဗန္ဓတံ ဒသ္သေတိ။ တေနာဟ ‘‘တသ္မာ အသာဓက’’န္တိ။
332. Lokuttaramaggakkhaṇeti paṭhamajjhānikassa paṭhamamaggassa khaṇe. Abhibhūsuttāharaṇe adhippāyo vattabboti etena tadāharaṇassa asambandhataṃ dasseti. Tenāha ‘‘tasmā asādhaka’’nti.
ဝစီဘေဒကထာဝဏ္ဏနာ နိဋ္ဌိတာ။
Vacībhedakathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၄) ၅. ဝစီဘေဒကထာ • (14) 5. Vacībhedakathā
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၅. ဝစီဘေဒကထာဝဏ္ဏနာ • 5. Vacībhedakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၅. ဝစီဘေဒကထာဝဏ္ဏနာ • 5. Vacībhedakathāvaṇṇanā
