| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
வசீகம்மத்³வாரகதா²வண்ணனா
Vacīkammadvārakathāvaṇṇanā
சதூஹி, பி⁴க்க²வே, அங்கே³ஹி ஸமன்னாக³தாதி எத்த² ஸுபா⁴ஸிதபா⁴ஸனஸங்கா²தா அபிஸுணவாசா, த⁴ம்மபா⁴ஸனஸங்கா²தோ அஸம்ப²ப்பலாபோ, பியபா⁴ஸனஸங்கா²தா அப²ருஸவாசா, ஸச்சபா⁴ஸனஸங்கா²தோ அமுஸாவாதோ³ சாதி ஏதா வாசா ததா²பவத்தா சேதனா த³ட்ட²ப்³பா³. ஸஹஸத்³தா³ பனாதி தஸ்ஸ விகாரஸ்ஸ ஸத்³தே³ன ஸஹ ஸம்பூ⁴தத்தா வுத்தங். சித்தானுபரிவத்திதாய பன ஸோ ந யாவ ஸத்³த³பா⁴வீதி த³ட்ட²ப்³போ³, விதக்கவிப்பா²ரஸத்³தோ³ ந ஸோதவிஞ்ஞெய்யோதி பவத்தேன மஹாஅட்ட²கதா²வாதே³ன சித்தஸமுட்டா²னஸத்³தோ³ வினாபி விஞ்ஞத்திக⁴ட்டனேன உப்பஜ்ஜதீதி ஆபஜ்ஜதி. ‘‘யா தாய வாசாய விஞ்ஞத்தீ’’தி (த⁴॰ ஸ॰ 636) ஹி வசனதோ அஸோதவிஞ்ஞெய்யஸத்³தே³ன ஸஹ விஞ்ஞத்தியா உப்பத்தி நத்தீ²தி விஞ்ஞாயதீதி.
Catūhi, bhikkhave, aṅgehi samannāgatāti ettha subhāsitabhāsanasaṅkhātā apisuṇavācā, dhammabhāsanasaṅkhāto asamphappalāpo, piyabhāsanasaṅkhātā apharusavācā, saccabhāsanasaṅkhāto amusāvādo cāti etā vācā tathāpavattā cetanā daṭṭhabbā. Sahasaddā panāti tassa vikārassa saddena saha sambhūtattā vuttaṃ. Cittānuparivattitāya pana so na yāva saddabhāvīti daṭṭhabbo, vitakkavipphārasaddo na sotaviññeyyoti pavattena mahāaṭṭhakathāvādena cittasamuṭṭhānasaddo vināpi viññattighaṭṭanena uppajjatīti āpajjati. ‘‘Yā tāya vācāya viññattī’’ti (dha. sa. 636) hi vacanato asotaviññeyyasaddena saha viññattiyā uppatti natthīti viññāyatīti.
சித்தஸமுட்டா²னங் ஸத்³தா³யதனந்தி எத்த² ச ந கோசி சித்தஸமுட்டா²னோ ஸத்³தோ³ அஸங்க³ஹிதோ நாம அத்தீ²தி அதி⁴ப்பாயேன மஹாஅட்ட²கதா²வாத³ங் படிஸேதே⁴தி. ச²ப்³பி³தே⁴ன ரூபஸங்க³ஹாதீ³ஸு ஹி ‘‘ஸோதவிஞ்ஞெய்ய’’ந்தி ‘‘தி³ட்ட²ங் ஸுத’’ந்தி எத்த² ‘‘ஸுத’’ந்தி ச ந கோசி ஸத்³தோ³ ந ஸங்க³ய்ஹதீதி. மஹாஅட்ட²கதா²யங் பன விஞ்ஞத்திஸஹஜமேவ ஜிவ்ஹாதாலுசலனாதி³கரவிதக்கஸமுட்டி²தங் ஸுகு²மஸத்³த³ங் ‘‘தி³ப்³ப³ஸோதேன ஸுத்வா ஆதி³ஸதீ’’தி ஸுத்தே பட்டா²னே ச ஓளாரிகஸத்³த³ங் ஸந்தா⁴ய ‘‘ஸோதவிஞ்ஞாணஸ்ஸ ஆரம்மணபச்சயேன பச்சயோ’’தி வுத்தந்தி இமினா அதி⁴ப்பாயேன அஸோதவிஞ்ஞெய்யதா வுத்தா ஸியா. ஸத்³தோ³ ச அஸோதவிஞ்ஞெய்யோ சாதி விருத்³த⁴மேதந்தி பன படிக்கே²போ வேதி³தப்³போ³. விஞ்ஞத்திபச்சயா க⁴ட்டனா விஞ்ஞத்திக⁴ட்டனா. விஞ்ஞத்தி ஏவ வா. க⁴ட்டனாகாரப்பவத்தபூ⁴தவிகாரோ ஹி ‘‘க⁴ட்டனா’’தி வுத்தோ. ஸங்க⁴ட்டனேன ஸஹேவ ஸத்³தோ³ உப்பஜ்ஜதி, ந புப்³பா³பரபா⁴வேன. பத²வீதா⁴துயாதி இத³ங் வாயோதா⁴துயா விய சாலனங் பத²வீதா⁴துயா ஸங்க⁴ட்டனங் கிச்சங் அதி⁴கந்தி கத்வா வுத்தங், விகாரஸ்ஸ ச தப்பச்சயபா⁴வோ வுத்தனயேனேவ வேதி³தப்³போ³. தப்³பி³காரானஞ்ஹி பூ⁴தானங் அஞ்ஞமஞ்ஞஸ்ஸ பச்சயபா⁴வோதி. அஞ்ஞம்பி ஸப்³ப³ங் விதா⁴னங் காயவிஞ்ஞத்தியங் விய வேதி³தப்³ப³ங்.
Cittasamuṭṭhānaṃ saddāyatananti ettha ca na koci cittasamuṭṭhāno saddo asaṅgahito nāma atthīti adhippāyena mahāaṭṭhakathāvādaṃ paṭisedheti. Chabbidhena rūpasaṅgahādīsu hi ‘‘sotaviññeyya’’nti ‘‘diṭṭhaṃ suta’’nti ettha ‘‘suta’’nti ca na koci saddo na saṅgayhatīti. Mahāaṭṭhakathāyaṃ pana viññattisahajameva jivhātālucalanādikaravitakkasamuṭṭhitaṃ sukhumasaddaṃ ‘‘dibbasotena sutvā ādisatī’’ti sutte paṭṭhāne ca oḷārikasaddaṃ sandhāya ‘‘sotaviññāṇassa ārammaṇapaccayena paccayo’’ti vuttanti iminā adhippāyena asotaviññeyyatā vuttā siyā. Saddo ca asotaviññeyyo cāti viruddhametanti pana paṭikkhepo veditabbo. Viññattipaccayā ghaṭṭanā viññattighaṭṭanā. Viññatti eva vā. Ghaṭṭanākārappavattabhūtavikāro hi ‘‘ghaṭṭanā’’ti vutto. Saṅghaṭṭanena saheva saddo uppajjati, na pubbāparabhāvena. Pathavīdhātuyāti idaṃ vāyodhātuyā viya cālanaṃ pathavīdhātuyā saṅghaṭṭanaṃ kiccaṃ adhikanti katvā vuttaṃ, vikārassa ca tappaccayabhāvo vuttanayeneva veditabbo. Tabbikārānañhi bhūtānaṃ aññamaññassa paccayabhāvoti. Aññampi sabbaṃ vidhānaṃ kāyaviññattiyaṃ viya veditabbaṃ.
திஸமுட்டா²னிககாயங்…பே॰… ந லப்³ப⁴தி. ந ஹி சாலனங் உபாதி³ன்னக⁴ட்டனந்தி. சாலனஞ்ஹி தே³ஸந்தருப்பாத³னபரம்பரதா, க⁴ட்டனங் பச்சயவிஸேஸேன பூ⁴தகலாபானங் ஆஸன்னதருப்பாதோ³தி. உபத்த²ம்ப⁴னகிச்சம்பி நத்தீ²தி உபத்த²ம்ப⁴னேன வினா பட²மசித்தஸமுட்டா²னாபி க⁴ட்டனாகாரேன பவத்ததீதி க⁴ட்டனத்த²ங் உபத்த²ம்ப⁴னேன பயோஜனங் நத்தி², லத்³தா⁴ஸேவனேன சித்தேனேவ க⁴ட்டனஸ்ஸ ப³லவபா⁴வதோ சாதி அதி⁴ப்பாயோ. உபத்த²ம்ப⁴னங் நத்தி² அத்தீ²தி விசாரெத்வா க³ஹேதப்³ப³ங்.
Tisamuṭṭhānikakāyaṃ…pe… na labbhati. Na hi cālanaṃ upādinnaghaṭṭananti. Cālanañhi desantaruppādanaparamparatā, ghaṭṭanaṃ paccayavisesena bhūtakalāpānaṃ āsannataruppādoti. Upatthambhanakiccampi natthīti upatthambhanena vinā paṭhamacittasamuṭṭhānāpi ghaṭṭanākārena pavattatīti ghaṭṭanatthaṃ upatthambhanena payojanaṃ natthi, laddhāsevanena citteneva ghaṭṭanassa balavabhāvato cāti adhippāyo. Upatthambhanaṃ natthi atthīti vicāretvā gahetabbaṃ.
வசீகம்மத்³வாரகதா²வண்ணனா நிட்டி²தா.
Vacīkammadvārakathāvaṇṇanā niṭṭhitā.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / வசீகம்மத்³வாரகதா²வண்ணனா • Vacīkammadvārakathāvaṇṇanā
