| Library / Tipiṭaka / திபிடக • Tipiṭaka / த⁴ம்மஸங்க³ணீ-அனுடீகா • Dhammasaṅgaṇī-anuṭīkā |
வசீகம்மத்³வாரகதா²வண்ணனா
Vacīkammadvārakathāvaṇṇanā
சதூஹி அங்கே³ஹீதி எத்த² ‘‘ஸுபா⁴ஸிதங்யேவ பா⁴ஸதி, நோ து³ப்³பா⁴ஸிதங். த⁴ம்மங்யேவ, பியங்யேவ, ஸச்சங்யேவ பா⁴ஸதி, நோ அலிக’’ந்தி (ஸங்॰ நி॰ 1.213; ஸு॰ நி॰ ஸுபா⁴ஸிதஸுத்த) யானி அங்கா³னி ஸுத்தே வுத்தானி, தேஸங் சேதனாஸபா⁴வங் த³ஸ்ஸேதுங் ‘‘ஸுபா⁴ஸிதபா⁴ஸனா’’திஆதி³ வுத்தங். ததா²பவத்தாதி ஸுபா⁴ஸிதபா⁴ஸனாதி³பா⁴வேன பவத்தா. ஸஹ ஸம்பூ⁴தத்தாதி ஸஹேவ உப்பன்னத்தா. ந ஹி வசீவிஞ்ஞத்தி ஸத்³த³ரஹிதா அத்தி². ததா² ஹி ‘‘யா தாய வாசாய விஞ்ஞத்தீ’’தி வுத்தங். ‘‘வாசாகி³ரா ப்³யபதோ²’’திஆதி³னா (த⁴॰ ஸ॰ 636) நாதிஸுகு²மங்யேவ ஸத்³த³வாசங் வத்வா ‘‘யா தாய வாசாய விஞ்ஞத்தீ’’தி, தாய ஸத்³தி⁴ங் யோஜெத்வா வசீவிஞ்ஞத்தியா வுத்தத்தா ரூபாயதனங் விய வத்து²பரித்ததாதி³னா ஸத்³தா³யதனம்பி அனிந்த்³ரியகோ³சரோ அத்தீ²தி ச அதி⁴ப்பாயேன ‘‘யா தாய…பே॰… விஞ்ஞாயதீ’’தி ஆஹ.
Catūhi aṅgehīti ettha ‘‘subhāsitaṃyeva bhāsati, no dubbhāsitaṃ. Dhammaṃyeva, piyaṃyeva, saccaṃyeva bhāsati, no alika’’nti (saṃ. ni. 1.213; su. ni. subhāsitasutta) yāni aṅgāni sutte vuttāni, tesaṃ cetanāsabhāvaṃ dassetuṃ ‘‘subhāsitabhāsanā’’tiādi vuttaṃ. Tathāpavattāti subhāsitabhāsanādibhāvena pavattā. Saha sambhūtattāti saheva uppannattā. Na hi vacīviññatti saddarahitā atthi. Tathā hi ‘‘yā tāya vācāya viññattī’’ti vuttaṃ. ‘‘Vācāgirā byapatho’’tiādinā (dha. sa. 636) nātisukhumaṃyeva saddavācaṃ vatvā ‘‘yā tāya vācāya viññattī’’ti, tāya saddhiṃ yojetvā vacīviññattiyā vuttattā rūpāyatanaṃ viya vatthuparittatādinā saddāyatanampi anindriyagocaro atthīti ca adhippāyena ‘‘yā tāya…pe… viññāyatī’’ti āha.
இதா³னி அவிஸேஸேன சித்தஸமுட்டா²னஸத்³த³ஸ்ஸ ஸோதவிஞ்ஞாணாரம்மணதா பாளியங் வுத்தாதி விதக்கவிப்பா²ரஸத்³தோ³ ந ஸோதவிஞ்ஞெய்யோதி மஹாஅட்ட²கதா²வாத³ஸ்ஸ பாளியா விரோத⁴ங் த³ஸ்ஸேதுங் ‘‘சித்தஸமுட்டா²ன’’ந்திஆதி³ வுத்தங். ஏவங் ஸங்க³ஹகாரஸ்ஸ அதி⁴ப்பாயே ட²த்வா மஹாஅட்ட²கதா²வாத³ஸ்ஸ படிஸேதே⁴தப்³ப³தங் த³ஸ்ஸெத்வா இதா³னி அத்தனோ அதி⁴ப்பாயே ட²த்வா தங் பரிஹரிதுங் ‘‘மஹாஅட்ட²கதா²யங் பனா’’திஆதி³மாஹ. ஸங்க⁴ட்டனாகாரேன பவத்தானங் பூ⁴தானங் ஸத்³த³ஸ்ஸ நிஸ்ஸயபா⁴வதோ ஸங்க⁴ட்டனேன ஸஹேவ ஸத்³தோ³ உப்பஜ்ஜதி. தப்பச்சயபா⁴வோதி உபாதி³ன்னகக⁴ட்டனஸ்ஸ பச்சயபா⁴வோ. சித்தஜபத²வீதா⁴துயா உபாதி³ன்னகக⁴ட்டனே பச்சயோ ப⁴விதுங் ஸமத்தோ² சித்தஸமுட்டா²னமஹாபூ⁴தானங் ஏகோ ஆகாரவிஸேஸோ அத்தி². ததா³காரத்தா ஹி தேஸங் பத²வீதா⁴து உபாதி³ன்னகங் க⁴ட்டேதீதி இமமத்த²ங் வுத்தானுஸாரேன வேதி³தப்³ப³த்தா ‘‘வுத்தனயேனேவ வேதி³தப்³போ³’’தி வத்வா தமேவ வுத்தனயங் ‘‘தப்³பி³காரான’’ந்திஆதி³னா விபா⁴வேதி. தத்த² அஞ்ஞமஞ்ஞஸ்ஸ பச்சயபா⁴வோ தப்பச்சயபா⁴வோ வுத்தோதி அத்தோ². அஞ்ஞம்பி ஸப்³ப³ங் விதா⁴னந்தி ‘‘ந சித்தஸமுட்டா²னாதி ஏதேன பரமத்த²தோ அபா⁴வங் த³ஸ்ஸேதீ’’திஆதி³னா அத்தனா வுத்தவிதா⁴னங். அட்ட²கதா²யங் பன வுத்தவிதா⁴னங் ‘‘ஹெட்டா² வுத்தனயேனேவ வேதி³தப்³ப³’’ந்தி அட்ட²கதா²யங் வுத்தமேவாதி.
Idāni avisesena cittasamuṭṭhānasaddassa sotaviññāṇārammaṇatā pāḷiyaṃ vuttāti vitakkavipphārasaddo na sotaviññeyyoti mahāaṭṭhakathāvādassa pāḷiyā virodhaṃ dassetuṃ ‘‘cittasamuṭṭhāna’’ntiādi vuttaṃ. Evaṃ saṅgahakārassa adhippāye ṭhatvā mahāaṭṭhakathāvādassa paṭisedhetabbataṃ dassetvā idāni attano adhippāye ṭhatvā taṃ pariharituṃ ‘‘mahāaṭṭhakathāyaṃ panā’’tiādimāha. Saṅghaṭṭanākārena pavattānaṃ bhūtānaṃ saddassa nissayabhāvato saṅghaṭṭanena saheva saddo uppajjati. Tappaccayabhāvoti upādinnakaghaṭṭanassa paccayabhāvo. Cittajapathavīdhātuyā upādinnakaghaṭṭane paccayo bhavituṃ samattho cittasamuṭṭhānamahābhūtānaṃ eko ākāraviseso atthi. Tadākārattā hi tesaṃ pathavīdhātu upādinnakaṃ ghaṭṭetīti imamatthaṃ vuttānusārena veditabbattā ‘‘vuttanayeneva veditabbo’’ti vatvā tameva vuttanayaṃ ‘‘tabbikārāna’’ntiādinā vibhāveti. Tattha aññamaññassa paccayabhāvo tappaccayabhāvo vuttoti attho. Aññampi sabbaṃ vidhānanti ‘‘na cittasamuṭṭhānāti etena paramatthato abhāvaṃ dassetī’’tiādinā attanā vuttavidhānaṃ. Aṭṭhakathāyaṃ pana vuttavidhānaṃ ‘‘heṭṭhā vuttanayeneva veditabba’’nti aṭṭhakathāyaṃ vuttamevāti.
அத்தனோ அத்தனோ பச்சயுப்பன்னஸ்ஸ தே³ஸந்தரே பாரம்பரியேன உப்பாத³னங் தே³ஸந்தருப்பாத³னபரம்பரதா. லத்³தா⁴ஸேவனேனாதி லத்³த⁴புப்³பா³பி⁴ஸங்கா²ரேன. சித்தேனேவாதி பட²மசித்தேனேவ. ‘‘ஸத்த ஜவனானி ஸத்த அக்க²ரானி நிப்³ப³த்தெந்தீதி வாத³ங் படிக்கி²பித்வா ஏகஜவனவாரபரியாபன்னானி சித்தானி ஏகமக்க²ரங் நிப்³ப³த்தெந்தீ’’தி வத³ந்தி. கிஞ்சாபி பட²மசித்தேனபி க⁴ட்டனா நிப்ப²ஜ்ஜதி, ஏகஸ்ஸேவ பன ப³ஹுஸோ பவத்தனேன அத்தி² கோசி விஸேஸோதி புரிமஜவனஸமுட்டி²தாஹி க⁴ட்டனாஹி படிலத்³தா⁴ஸேவனேன ஸத்தமஜவனேன ஸமுட்டி²தா க⁴ட்டனா பரிப்³யத்தமக்க²ரங் நிப்³ப³த்தேதீதி உபத்த²ம்ப⁴னங் நத்தீ²தி ந ஸக்கா வத்துங். லத்³தா⁴பி⁴ஸங்கா²ரேன பன பட²மசித்தேனபி க⁴ட்டனா ப³லவதீ ஹோதீதி அட்ட²கதா²யங் ‘‘உபத்த²ம்ப⁴னகிச்சங் நத்தீ²’’தி வுத்தங் ஸியா, ஸப்³ப³மேதங் வீமங்ஸித்வா க³ஹேதப்³ப³ங்.
Attano attano paccayuppannassa desantare pārampariyena uppādanaṃ desantaruppādanaparamparatā. Laddhāsevanenāti laddhapubbābhisaṅkhārena. Cittenevāti paṭhamacitteneva. ‘‘Satta javanāni satta akkharāni nibbattentīti vādaṃ paṭikkhipitvā ekajavanavārapariyāpannāni cittāni ekamakkharaṃ nibbattentī’’ti vadanti. Kiñcāpi paṭhamacittenapi ghaṭṭanā nipphajjati, ekasseva pana bahuso pavattanena atthi koci visesoti purimajavanasamuṭṭhitāhi ghaṭṭanāhi paṭiladdhāsevanena sattamajavanena samuṭṭhitā ghaṭṭanā paribyattamakkharaṃ nibbattetīti upatthambhanaṃ natthīti na sakkā vattuṃ. Laddhābhisaṅkhārena pana paṭhamacittenapi ghaṭṭanā balavatī hotīti aṭṭhakathāyaṃ ‘‘upatthambhanakiccaṃ natthī’’ti vuttaṃ siyā, sabbametaṃ vīmaṃsitvā gahetabbaṃ.
வசீகம்மத்³வாரகதா²வண்ணனா நிட்டி²தா.
Vacīkammadvārakathāvaṇṇanā niṭṭhitā.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / வசீகம்மத்³வாரகதா²வண்ணனா • Vacīkammadvārakathāvaṇṇanā
