| Library / Tipiṭaka / তিপিটক • Tipiṭaka / ধম্মসঙ্গণী-অনুটীকা • Dhammasaṅgaṇī-anuṭīkā |
ৰচীকম্মদ্ৰারকথাৰণ্ণনা
Vacīkammadvārakathāvaṇṇanā
চতূহি অঙ্গেহীতি এত্থ ‘‘সুভাসিতংযেৰ ভাসতি, নো দুব্ভাসিতং। ধম্মংযেৰ, পিযংযেৰ, সচ্চংযেৰ ভাসতি, নো অলিক’’ন্তি (সং॰ নি॰ ১.২১৩; সু॰ নি॰ সুভাসিতসুত্ত) যানি অঙ্গানি সুত্তে ৰুত্তানি, তেসং চেতনাসভাৰং দস্সেতুং ‘‘সুভাসিতভাসনা’’তিআদি ৰুত্তং। তথাপৰত্তাতি সুভাসিতভাসনাদিভাৰেন পৰত্তা। সহ সম্ভূতত্তাতি সহেৰ উপ্পন্নত্তা। ন হি ৰচীৰিঞ্ঞত্তি সদ্দরহিতা অত্থি। তথা হি ‘‘যা তায ৰাচায ৰিঞ্ঞত্তী’’তি ৰুত্তং। ‘‘ৰাচাগিরা ব্যপথো’’তিআদিনা (ধ॰ স॰ ৬৩৬) নাতিসুখুমংযেৰ সদ্দৰাচং ৰত্ৰা ‘‘যা তায ৰাচায ৰিঞ্ঞত্তী’’তি, তায সদ্ধিং যোজেত্ৰা ৰচীৰিঞ্ঞত্তিযা ৰুত্তত্তা রূপাযতনং ৰিয ৰত্থুপরিত্ততাদিনা সদ্দাযতনম্পি অনিন্দ্রিযগোচরো অত্থীতি চ অধিপ্পাযেন ‘‘যা তায…পে॰… ৰিঞ্ঞাযতী’’তি আহ।
Catūhi aṅgehīti ettha ‘‘subhāsitaṃyeva bhāsati, no dubbhāsitaṃ. Dhammaṃyeva, piyaṃyeva, saccaṃyeva bhāsati, no alika’’nti (saṃ. ni. 1.213; su. ni. subhāsitasutta) yāni aṅgāni sutte vuttāni, tesaṃ cetanāsabhāvaṃ dassetuṃ ‘‘subhāsitabhāsanā’’tiādi vuttaṃ. Tathāpavattāti subhāsitabhāsanādibhāvena pavattā. Saha sambhūtattāti saheva uppannattā. Na hi vacīviññatti saddarahitā atthi. Tathā hi ‘‘yā tāya vācāya viññattī’’ti vuttaṃ. ‘‘Vācāgirā byapatho’’tiādinā (dha. sa. 636) nātisukhumaṃyeva saddavācaṃ vatvā ‘‘yā tāya vācāya viññattī’’ti, tāya saddhiṃ yojetvā vacīviññattiyā vuttattā rūpāyatanaṃ viya vatthuparittatādinā saddāyatanampi anindriyagocaro atthīti ca adhippāyena ‘‘yā tāya…pe… viññāyatī’’ti āha.
ইদানি অৰিসেসেন চিত্তসমুট্ঠানসদ্দস্স সোতৰিঞ্ঞাণারম্মণতা পাল়িযং ৰুত্তাতি ৰিতক্কৰিপ্ফারসদ্দো ন সোতৰিঞ্ঞেয্যোতি মহাঅট্ঠকথাৰাদস্স পাল়িযা ৰিরোধং দস্সেতুং ‘‘চিত্তসমুট্ঠান’’ন্তিআদি ৰুত্তং। এৰং সঙ্গহকারস্স অধিপ্পাযে ঠত্ৰা মহাঅট্ঠকথাৰাদস্স পটিসেধেতব্বতং দস্সেত্ৰা ইদানি অত্তনো অধিপ্পাযে ঠত্ৰা তং পরিহরিতুং ‘‘মহাঅট্ঠকথাযং পনা’’তিআদিমাহ। সঙ্ঘট্টনাকারেন পৰত্তানং ভূতানং সদ্দস্স নিস্সযভাৰতো সঙ্ঘট্টনেন সহেৰ সদ্দো উপ্পজ্জতি। তপ্পচ্চযভাৰোতি উপাদিন্নকঘট্টনস্স পচ্চযভাৰো। চিত্তজপথৰীধাতুযা উপাদিন্নকঘট্টনে পচ্চযো ভৰিতুং সমত্থো চিত্তসমুট্ঠানমহাভূতানং একো আকারৰিসেসো অত্থি। তদাকারত্তা হি তেসং পথৰীধাতু উপাদিন্নকং ঘট্টেতীতি ইমমত্থং ৰুত্তানুসারেন ৰেদিতব্বত্তা ‘‘ৰুত্তনযেনেৰ ৰেদিতব্বো’’তি ৰত্ৰা তমেৰ ৰুত্তনযং ‘‘তব্বিকারান’’ন্তিআদিনা ৰিভাৰেতি। তত্থ অঞ্ঞমঞ্ঞস্স পচ্চযভাৰো তপ্পচ্চযভাৰো ৰুত্তোতি অত্থো। অঞ্ঞম্পি সব্বং ৰিধানন্তি ‘‘ন চিত্তসমুট্ঠানাতি এতেন পরমত্থতো অভাৰং দস্সেতী’’তিআদিনা অত্তনা ৰুত্তৰিধানং। অট্ঠকথাযং পন ৰুত্তৰিধানং ‘‘হেট্ঠা ৰুত্তনযেনেৰ ৰেদিতব্ব’’ন্তি অট্ঠকথাযং ৰুত্তমেৰাতি।
Idāni avisesena cittasamuṭṭhānasaddassa sotaviññāṇārammaṇatā pāḷiyaṃ vuttāti vitakkavipphārasaddo na sotaviññeyyoti mahāaṭṭhakathāvādassa pāḷiyā virodhaṃ dassetuṃ ‘‘cittasamuṭṭhāna’’ntiādi vuttaṃ. Evaṃ saṅgahakārassa adhippāye ṭhatvā mahāaṭṭhakathāvādassa paṭisedhetabbataṃ dassetvā idāni attano adhippāye ṭhatvā taṃ pariharituṃ ‘‘mahāaṭṭhakathāyaṃ panā’’tiādimāha. Saṅghaṭṭanākārena pavattānaṃ bhūtānaṃ saddassa nissayabhāvato saṅghaṭṭanena saheva saddo uppajjati. Tappaccayabhāvoti upādinnakaghaṭṭanassa paccayabhāvo. Cittajapathavīdhātuyā upādinnakaghaṭṭane paccayo bhavituṃ samattho cittasamuṭṭhānamahābhūtānaṃ eko ākāraviseso atthi. Tadākārattā hi tesaṃ pathavīdhātu upādinnakaṃ ghaṭṭetīti imamatthaṃ vuttānusārena veditabbattā ‘‘vuttanayeneva veditabbo’’ti vatvā tameva vuttanayaṃ ‘‘tabbikārāna’’ntiādinā vibhāveti. Tattha aññamaññassa paccayabhāvo tappaccayabhāvo vuttoti attho. Aññampi sabbaṃ vidhānanti ‘‘na cittasamuṭṭhānāti etena paramatthato abhāvaṃ dassetī’’tiādinā attanā vuttavidhānaṃ. Aṭṭhakathāyaṃ pana vuttavidhānaṃ ‘‘heṭṭhā vuttanayeneva veditabba’’nti aṭṭhakathāyaṃ vuttamevāti.
অত্তনো অত্তনো পচ্চযুপ্পন্নস্স দেসন্তরে পারম্পরিযেন উপ্পাদনং দেসন্তরুপ্পাদনপরম্পরতা। লদ্ধাসেৰনেনাতি লদ্ধপুব্বাভিসঙ্খারেন। চিত্তেনেৰাতি পঠমচিত্তেনেৰ। ‘‘সত্ত জৰনানি সত্ত অক্খরানি নিব্বত্তেন্তীতি ৰাদং পটিক্খিপিত্ৰা একজৰনৰারপরিযাপন্নানি চিত্তানি একমক্খরং নিব্বত্তেন্তী’’তি ৰদন্তি। কিঞ্চাপি পঠমচিত্তেনপি ঘট্টনা নিপ্ফজ্জতি, একস্সেৰ পন বহুসো পৰত্তনেন অত্থি কোচি ৰিসেসোতি পুরিমজৰনসমুট্ঠিতাহি ঘট্টনাহি পটিলদ্ধাসেৰনেন সত্তমজৰনেন সমুট্ঠিতা ঘট্টনা পরিব্যত্তমক্খরং নিব্বত্তেতীতি উপত্থম্ভনং নত্থীতি ন সক্কা ৰত্তুং। লদ্ধাভিসঙ্খারেন পন পঠমচিত্তেনপি ঘট্টনা বলৰতী হোতীতি অট্ঠকথাযং ‘‘উপত্থম্ভনকিচ্চং নত্থী’’তি ৰুত্তং সিযা, সব্বমেতং ৰীমংসিত্ৰা গহেতব্বং।
Attano attano paccayuppannassa desantare pārampariyena uppādanaṃ desantaruppādanaparamparatā. Laddhāsevanenāti laddhapubbābhisaṅkhārena. Cittenevāti paṭhamacitteneva. ‘‘Satta javanāni satta akkharāni nibbattentīti vādaṃ paṭikkhipitvā ekajavanavārapariyāpannāni cittāni ekamakkharaṃ nibbattentī’’ti vadanti. Kiñcāpi paṭhamacittenapi ghaṭṭanā nipphajjati, ekasseva pana bahuso pavattanena atthi koci visesoti purimajavanasamuṭṭhitāhi ghaṭṭanāhi paṭiladdhāsevanena sattamajavanena samuṭṭhitā ghaṭṭanā paribyattamakkharaṃ nibbattetīti upatthambhanaṃ natthīti na sakkā vattuṃ. Laddhābhisaṅkhārena pana paṭhamacittenapi ghaṭṭanā balavatī hotīti aṭṭhakathāyaṃ ‘‘upatthambhanakiccaṃ natthī’’ti vuttaṃ siyā, sabbametaṃ vīmaṃsitvā gahetabbaṃ.
ৰচীকম্মদ্ৰারকথাৰণ্ণনা নিট্ঠিতা।
Vacīkammadvārakathāvaṇṇanā niṭṭhitā.
Related texts:
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / ৰচীকম্মদ্ৰারকথাৰণ্ণনা • Vacīkammadvārakathāvaṇṇanā
