| Library / Tipiṭaka / ཏིཔིཊཀ • Tipiṭaka / དྷམྨསངྒཎཱི-མཱུལཊཱིཀཱ • Dhammasaṅgaṇī-mūlaṭīkā |
ཝཙཱིཀམྨདྭཱརཀཐཱཝཎྞནཱ
Vacīkammadvārakathāvaṇṇanā
ཙཏཱུཧི, བྷིཀྑཝེ, ཨངྒེཧི སམནྣཱགཏཱཏི ཨེཏྠ སུབྷཱསིཏབྷཱསནསངྑཱཏཱ ཨཔིསུཎཝཱཙཱ, དྷམྨབྷཱསནསངྑཱཏོ ཨསམྥཔྤལཱཔོ, པིཡབྷཱསནསངྑཱཏཱ ཨཕརུསཝཱཙཱ, སཙྩབྷཱསནསངྑཱཏོ ཨམུསཱཝཱདོ ཙཱཏི ཨེཏཱ ཝཱཙཱ ཏཐཱཔཝཏྟཱ ཙེཏནཱ དཊྛབྦཱ། སཧསདྡཱ པནཱཏི ཏསྶ ཝིཀཱརསྶ སདྡེན སཧ སམྦྷཱུཏཏྟཱ ཝུཏྟཾ། ཙིཏྟཱནུཔརིཝཏྟིཏཱཡ པན སོ ན ཡཱཝ སདྡབྷཱཝཱིཏི དཊྛབྦོ, ཝིཏཀྐཝིཔྥཱརསདྡོ ན སོཏཝིཉྙེཡྻོཏི པཝཏྟེན མཧཱཨཊྛཀཐཱཝཱདེན ཙིཏྟསམུཊྛཱནསདྡོ ཝིནཱཔི ཝིཉྙཏྟིགྷཊྚནེན ཨུཔྤཛྫཏཱིཏི ཨཱཔཛྫཏི། ‘‘ཡཱ ཏཱཡ ཝཱཙཱཡ ཝིཉྙཏྟཱི’’ཏི (དྷ॰ ས॰ ༦༣༦) ཧི ཝཙནཏོ ཨསོཏཝིཉྙེཡྻསདྡེན སཧ ཝིཉྙཏྟིཡཱ ཨུཔྤཏྟི ནཏྠཱིཏི ཝིཉྙཱཡཏཱིཏི།
Catūhi, bhikkhave, aṅgehi samannāgatāti ettha subhāsitabhāsanasaṅkhātā apisuṇavācā, dhammabhāsanasaṅkhāto asamphappalāpo, piyabhāsanasaṅkhātā apharusavācā, saccabhāsanasaṅkhāto amusāvādo cāti etā vācā tathāpavattā cetanā daṭṭhabbā. Sahasaddā panāti tassa vikārassa saddena saha sambhūtattā vuttaṃ. Cittānuparivattitāya pana so na yāva saddabhāvīti daṭṭhabbo, vitakkavipphārasaddo na sotaviññeyyoti pavattena mahāaṭṭhakathāvādena cittasamuṭṭhānasaddo vināpi viññattighaṭṭanena uppajjatīti āpajjati. ‘‘Yā tāya vācāya viññattī’’ti (dha. sa. 636) hi vacanato asotaviññeyyasaddena saha viññattiyā uppatti natthīti viññāyatīti.
ཙིཏྟསམུཊྛཱནཾ སདྡཱཡཏནནྟི ཨེཏྠ ཙ ན ཀོཙི ཙིཏྟསམུཊྛཱནོ སདྡོ ཨསངྒཧིཏོ ནཱམ ཨཏྠཱིཏི ཨདྷིཔྤཱཡེན མཧཱཨཊྛཀཐཱཝཱདཾ པཊིསེདྷེཏི། ཚབྦིདྷེན རཱུཔསངྒཧཱདཱིསུ ཧི ‘‘སོཏཝིཉྙེཡྻ’’ནྟི ‘‘དིཊྛཾ སུཏ’’ནྟི ཨེཏྠ ‘‘སུཏ’’ནྟི ཙ ན ཀོཙི སདྡོ ན སངྒཡ྄ཧཏཱིཏི། མཧཱཨཊྛཀཐཱཡཾ པན ཝིཉྙཏྟིསཧཛམེཝ ཛིཝ྄ཧཱཏཱལུཙལནཱདིཀརཝིཏཀྐསམུཊྛིཏཾ སུཁུམསདྡཾ ‘‘དིབྦསོཏེན སུཏྭཱ ཨཱདིསཏཱི’’ཏི སུཏྟེ པཊྛཱནེ ཙ ཨོལཱ༹རིཀསདྡཾ སནྡྷཱཡ ‘‘སོཏཝིཉྙཱཎསྶ ཨཱརམྨཎཔཙྩཡེན པཙྩཡོ’’ཏི ཝུཏྟནྟི ཨིམིནཱ ཨདྷིཔྤཱཡེན ཨསོཏཝིཉྙེཡྻཏཱ ཝུཏྟཱ སིཡཱ། སདྡོ ཙ ཨསོཏཝིཉྙེཡྻོ ཙཱཏི ཝིརུདྡྷམེཏནྟི པན པཊིཀྑེཔོ ཝེདིཏབྦོ། ཝིཉྙཏྟིཔཙྩཡཱ གྷཊྚནཱ ཝིཉྙཏྟིགྷཊྚནཱ། ཝིཉྙཏྟི ཨེཝ ཝཱ། གྷཊྚནཱཀཱརཔྤཝཏྟབྷཱུཏཝིཀཱརོ ཧི ‘‘གྷཊྚནཱ’’ཏི ཝུཏྟོ། སངྒྷཊྚནེན སཧེཝ སདྡོ ཨུཔྤཛྫཏི, ན པུབྦཱཔརབྷཱཝེན། པཐཝཱིདྷཱཏུཡཱཏི ཨིདཾ ཝཱཡོདྷཱཏུཡཱ ཝིཡ ཙཱལནཾ པཐཝཱིདྷཱཏུཡཱ སངྒྷཊྚནཾ ཀིཙྩཾ ཨདྷིཀནྟི ཀཏྭཱ ཝུཏྟཾ, ཝིཀཱརསྶ ཙ ཏཔྤཙྩཡབྷཱཝོ ཝུཏྟནཡེནེཝ ཝེདིཏབྦོ། ཏབྦིཀཱརཱནཉྷི བྷཱུཏཱནཾ ཨཉྙམཉྙསྶ པཙྩཡབྷཱཝོཏི། ཨཉྙམྤི སབྦཾ ཝིདྷཱནཾ ཀཱཡཝིཉྙཏྟིཡཾ ཝིཡ ཝེདིཏབྦཾ།
Cittasamuṭṭhānaṃ saddāyatananti ettha ca na koci cittasamuṭṭhāno saddo asaṅgahito nāma atthīti adhippāyena mahāaṭṭhakathāvādaṃ paṭisedheti. Chabbidhena rūpasaṅgahādīsu hi ‘‘sotaviññeyya’’nti ‘‘diṭṭhaṃ suta’’nti ettha ‘‘suta’’nti ca na koci saddo na saṅgayhatīti. Mahāaṭṭhakathāyaṃ pana viññattisahajameva jivhātālucalanādikaravitakkasamuṭṭhitaṃ sukhumasaddaṃ ‘‘dibbasotena sutvā ādisatī’’ti sutte paṭṭhāne ca oḷārikasaddaṃ sandhāya ‘‘sotaviññāṇassa ārammaṇapaccayena paccayo’’ti vuttanti iminā adhippāyena asotaviññeyyatā vuttā siyā. Saddo ca asotaviññeyyo cāti viruddhametanti pana paṭikkhepo veditabbo. Viññattipaccayā ghaṭṭanā viññattighaṭṭanā. Viññatti eva vā. Ghaṭṭanākārappavattabhūtavikāro hi ‘‘ghaṭṭanā’’ti vutto. Saṅghaṭṭanena saheva saddo uppajjati, na pubbāparabhāvena. Pathavīdhātuyāti idaṃ vāyodhātuyā viya cālanaṃ pathavīdhātuyā saṅghaṭṭanaṃ kiccaṃ adhikanti katvā vuttaṃ, vikārassa ca tappaccayabhāvo vuttanayeneva veditabbo. Tabbikārānañhi bhūtānaṃ aññamaññassa paccayabhāvoti. Aññampi sabbaṃ vidhānaṃ kāyaviññattiyaṃ viya veditabbaṃ.
ཏིསམུཊྛཱནིཀཀཱཡཾ…པེ॰… ན ལབྦྷཏི། ན ཧི ཙཱལནཾ ཨུཔཱདིནྣགྷཊྚནནྟི། ཙཱལནཉྷི དེསནྟརུཔྤཱདནཔརམྤརཏཱ, གྷཊྚནཾ པཙྩཡཝིསེསེན བྷཱུཏཀལཱཔཱནཾ ཨཱསནྣཏརུཔྤཱདོཏི། ཨུཔཏྠམྦྷནཀིཙྩམྤི ནཏྠཱིཏི ཨུཔཏྠམྦྷནེན ཝིནཱ པཋམཙིཏྟསམུཊྛཱནཱཔི གྷཊྚནཱཀཱརེན པཝཏྟཏཱིཏི གྷཊྚནཏྠཾ ཨུཔཏྠམྦྷནེན པཡོཛནཾ ནཏྠི, ལདྡྷཱསེཝནེན ཙིཏྟེནེཝ གྷཊྚནསྶ བལཝབྷཱཝཏོ ཙཱཏི ཨདྷིཔྤཱཡོ། ཨུཔཏྠམྦྷནཾ ནཏྠི ཨཏྠཱིཏི ཝིཙཱརེཏྭཱ གཧེཏབྦཾ།
Tisamuṭṭhānikakāyaṃ…pe… na labbhati. Na hi cālanaṃ upādinnaghaṭṭananti. Cālanañhi desantaruppādanaparamparatā, ghaṭṭanaṃ paccayavisesena bhūtakalāpānaṃ āsannataruppādoti. Upatthambhanakiccampi natthīti upatthambhanena vinā paṭhamacittasamuṭṭhānāpi ghaṭṭanākārena pavattatīti ghaṭṭanatthaṃ upatthambhanena payojanaṃ natthi, laddhāsevanena citteneva ghaṭṭanassa balavabhāvato cāti adhippāyo. Upatthambhanaṃ natthi atthīti vicāretvā gahetabbaṃ.
ཝཙཱིཀམྨདྭཱརཀཐཱཝཎྞནཱ ནིཊྛིཏཱ།
Vacīkammadvārakathāvaṇṇanā niṭṭhitā.
Related texts:
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / དྷམྨསངྒཎཱི-ཨནུཊཱིཀཱ • Dhammasaṅgaṇī-anuṭīkā / ཝཙཱིཀམྨདྭཱརཀཐཱཝཎྞནཱ • Vacīkammadvārakathāvaṇṇanā
