| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. வாத³த்தி²கஸுத்தங்
10. Vādatthikasuttaṃ
1110. ‘‘யோ ஹி கோசி, பி⁴க்க²வே, பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி, புரத்தி²மாய சேபி தி³ஸாய ஆக³ச்செ²ய்ய ஸமணோ வா ப்³ராஹ்மணோ வா வாத³த்தி²கோ வாத³க³வேஸீ – ‘வாத³மஸ்ஸ ஆரோபெஸ்ஸாமீ’தி, தங் வத ஸஹத⁴ம்மேன ஸங்கம்பெஸ்ஸதி வா ஸம்பகம்பெஸ்ஸதி வா ஸம்பசாலெஸ்ஸதி வாதி – நேதங் டா²னங் விஜ்ஜதி. பச்சி²மாய சேபி தி³ஸாய…பே॰… உத்தராய சேபி தி³ஸாய…பே॰… த³க்கி²ணாய சேபி தி³ஸாய ஆக³ச்செ²ய்ய ஸமணோ வா ப்³ராஹ்மணோ வா வாத³த்தி²கோ வாத³க³வேஸீ – ‘வாத³மஸ்ஸ ஆரோபெஸ்ஸாமீ’தி, தங் வத ஸஹத⁴ம்மேன ஸங்கம்பெஸ்ஸதி வா ஸம்பகம்பெஸ்ஸதி வா ஸம்பசாலெஸ்ஸதி வாதி – நேதங் டா²னங் விஜ்ஜதி.
1110. ‘‘Yo hi koci, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti, puratthimāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati.
‘‘ஸெய்யதா²பி, பி⁴க்க²வே, ஸிலாயூபோ ஸோளஸ குக்குகோ. தஸ்ஸஸ்ஸு அட்ட² குக்கு ஹெட்டா² நேமங்க³மா, அட்ட² குக்கு உபரினேமஸ்ஸ. புரத்தி²மாய சேபி தி³ஸாய ஆக³ச்செ²ய்ய பு⁴ஸா வாதவுட்டி², நேவ ஸங்கம்பெய்ய ந ஸம்பகம்பெய்ய ந ஸம்பசாலெய்ய; பச்சி²மாய சேபி தி³ஸாய…பே॰… உத்தராய சேபி தி³ஸாய…பே॰… த³க்கி²ணாய சேபி தி³ஸாய ஆக³ச்செ²ய்ய பு⁴ஸா வாதவுட்டி², நேவ ஸங்கம்பெய்ய ந ஸம்பகம்பெய்ய ந ஸம்பசாலெய்ய. தங் கிஸ்ஸ ஹேது? க³ம்பீ⁴ரத்தா, பி⁴க்க²வே, நேமஸ்ஸ ஸுனிகா²தத்தா ஸிலாயூபஸ்ஸ. ஏவமேவ கோ², பி⁴க்க²வே, யோ ஹி கோசி பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி; புரத்தி²மாய சேபி தி³ஸாய ஆக³ச்செ²ய்ய ஸமணோ வா ப்³ராஹ்மணோ வா வாத³த்தி²கோ வாத³க³வேஸீ ‘வாத³மஸ்ஸ ஆரோபெஸ்ஸாமீ’தி, தங் வத ஸஹத⁴ம்மேன ஸங்கம்பெஸ்ஸதி வா ஸம்பகம்பெஸ்ஸதி வா ஸம்பசாலெஸ்ஸதி வாதி – நேதங் டா²னங் விஜ்ஜதி. பச்சி²மாய சேபி தி³ஸாய…பே॰… உத்தராய சேபி தி³ஸாய…பே॰… த³க்கி²ணாய சேபி தி³ஸாய ஆக³ச்செ²ய்ய ஸமணோ வா ப்³ராஹ்மணோ வா வாத³த்தி²கோ வாத³க³வேஸீ – ‘வாத³மஸ்ஸ ஆரோபெஸ்ஸாமீ’தி, தங் வத ஸஹத⁴ம்மேன ஸங்கம்பெஸ்ஸதி வா ஸம்பகம்பெஸ்ஸதி வா ஸம்பசாலெஸ்ஸதி வாதி – நேதங் டா²னங் விஜ்ஜதி. தங் கிஸ்ஸ ஹேது? ஸுதி³ட்ட²த்தா, பி⁴க்க²வே, சதுன்னங் அரியஸச்சானங். கதமேஸங் சதுன்னங்? து³க்க²ஸ்ஸ அரியஸச்சஸ்ஸ…பே॰… து³க்க²னிரோத⁴கா³மினியா படிபதா³ய அரியஸச்சஸ்ஸ.
‘‘Seyyathāpi, bhikkhave, silāyūpo soḷasa kukkuko. Tassassu aṭṭha kukku heṭṭhā nemaṅgamā, aṭṭha kukku uparinemassa. Puratthimāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya; pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya. Taṃ kissa hetu? Gambhīrattā, bhikkhave, nemassa sunikhātattā silāyūpassa. Evameva kho, bhikkhave, yo hi koci bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti; puratthimāya cepi disāya āgaccheyya samaṇo vā brāhmaṇo vā vādatthiko vādagavesī ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Taṃ kissa hetu? Sudiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘தஸ்மாதிஹ , பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. த³ஸமங்.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
ஸீஸபாவனவக்³கோ³ சதுத்தோ².
Sīsapāvanavaggo catuttho.
தஸ்ஸுத்³தா³னங் –
Tassuddānaṃ –
ஸீஸபா க²தி³ரோ த³ண்டோ³, சேலா ஸத்திஸதேன ச;
Sīsapā khadiro daṇḍo, celā sattisatena ca;
பாணா ஸுரியூபமா த்³வேதா⁴, இந்த³கீ²லோ ச வாதி³னோதி.
Pāṇā suriyūpamā dvedhā, indakhīlo ca vādinoti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. வாத³த்தி²கஸுத்தவண்ணனா • 10. Vādatthikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. வாத³த்தி²கஸுத்தவண்ணனா • 10. Vādatthikasuttavaṇṇanā
