| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. වාදත්‌ථිකසුත්‌තං
10. Vādatthikasuttaṃ
1110. ‘‘යො හි කොචි, භික්‌ඛවෙ, භික්‌ඛු ‘ඉදං දුක්‌ඛ’න්‌ති යථාභූතං පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානාති, පුරත්‌ථිමාය චෙපි දිසාය ආගච්‌ඡෙය්‍ය සමණො වා බ්‍රාහ්‌මණො වා වාදත්‌ථිකො වාදගවෙසී – ‘වාදමස්‌ස ආරොපෙස්‌සාමී’ති, තං වත සහධම්‌මෙන සඞ්‌කම්‌පෙස්‌සති වා සම්‌පකම්‌පෙස්‌සති වා සම්‌පචාලෙස්‌සති වාති – නෙතං ඨානං විජ්‌ජති. පච්‌ඡිමාය චෙපි දිසාය…පෙ.… උත්‌තරාය චෙපි දිසාය…පෙ.… දක්‌ඛිණාය චෙපි දිසාය ආගච්‌ඡෙය්‍ය සමණො වා බ්‍රාහ්‌මණො වා වාදත්‌ථිකො වාදගවෙසී – ‘වාදමස්‌ස ආරොපෙස්‌සාමී’ති, තං වත සහධම්‌මෙන සඞ්‌කම්‌පෙස්‌සති වා සම්‌පකම්‌පෙස්‌සති වා සම්‌පචාලෙස්‌සති වාති – නෙතං ඨානං විජ්‌ජති.
1110. ‘‘Yo hi koci, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti, puratthimāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati.
‘‘සෙය්‍යථාපි, භික්‌ඛවෙ, සිලායූපො සොළස කුක්‌කුකො. තස්‌සස්‌සු අට්‌ඨ කුක්‌කු හෙට්‌ඨා නෙමඞ්‌ගමා, අට්‌ඨ කුක්‌කු උපරිනෙමස්‌ස. පුරත්‌ථිමාය චෙපි දිසාය ආගච්‌ඡෙය්‍ය භුසා වාතවුට්‌ඨි, නෙව සඞ්‌කම්‌පෙය්‍ය න සම්‌පකම්‌පෙය්‍ය න සම්‌පචාලෙය්‍ය; පච්‌ඡිමාය චෙපි දිසාය…පෙ.… උත්‌තරාය චෙපි දිසාය…පෙ.… දක්‌ඛිණාය චෙපි දිසාය ආගච්‌ඡෙය්‍ය භුසා වාතවුට්‌ඨි, නෙව සඞ්‌කම්‌පෙය්‍ය න සම්‌පකම්‌පෙය්‍ය න සම්‌පචාලෙය්‍ය. තං කිස්‌ස හෙතු? ගම්‌භීරත්‌තා, භික්‌ඛවෙ, නෙමස්‌ස සුනිඛාතත්‌තා සිලායූපස්‌ස. එවමෙව ඛො, භික්‌ඛවෙ, යො හි කොචි භික්‌ඛු ‘ඉදං දුක්‌ඛ’න්‌ති යථාභූතං පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානාති; පුරත්‌ථිමාය චෙපි දිසාය ආගච්‌ඡෙය්‍ය සමණො වා බ්‍රාහ්‌මණො වා වාදත්‌ථිකො වාදගවෙසී ‘වාදමස්‌ස ආරොපෙස්‌සාමී’ති, තං වත සහධම්‌මෙන සඞ්‌කම්‌පෙස්‌සති වා සම්‌පකම්‌පෙස්‌සති වා සම්‌පචාලෙස්‌සති වාති – නෙතං ඨානං විජ්‌ජති. පච්‌ඡිමාය චෙපි දිසාය…පෙ.… උත්‌තරාය චෙපි දිසාය…පෙ.… දක්‌ඛිණාය චෙපි දිසාය ආගච්‌ඡෙය්‍ය සමණො වා බ්‍රාහ්‌මණො වා වාදත්‌ථිකො වාදගවෙසී – ‘වාදමස්‌ස ආරොපෙස්‌සාමී’ති, තං වත සහධම්‌මෙන සඞ්‌කම්‌පෙස්‌සති වා සම්‌පකම්‌පෙස්‌සති වා සම්‌පචාලෙස්‌සති වාති – නෙතං ඨානං විජ්‌ජති. තං කිස්‌ස හෙතු? සුදිට්‌ඨත්‌තා, භික්‌ඛවෙ, චතුන්‌නං අරියසච්‌චානං. කතමෙසං චතුන්‌නං? දුක්‌ඛස්‌ස අරියසච්‌චස්‌ස…පෙ.… දුක්‌ඛනිරොධගාමිනියා පටිපදාය අරියසච්‌චස්‌ස.
‘‘Seyyathāpi, bhikkhave, silāyūpo soḷasa kukkuko. Tassassu aṭṭha kukku heṭṭhā nemaṅgamā, aṭṭha kukku uparinemassa. Puratthimāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya; pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya. Taṃ kissa hetu? Gambhīrattā, bhikkhave, nemassa sunikhātattā silāyūpassa. Evameva kho, bhikkhave, yo hi koci bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti; puratthimāya cepi disāya āgaccheyya samaṇo vā brāhmaṇo vā vādatthiko vādagavesī ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Taṃ kissa hetu? Sudiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘තස්‌මාතිහ , භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. දසමං.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
සීසපාවනවග්‌ගො චතුත්‌ථො.
Sīsapāvanavaggo catuttho.
තස්‌සුද්‌දානං –
Tassuddānaṃ –
සීසපා ඛදිරො දණ්‌ඩො, චෙලා සත්‌තිසතෙන ච;
Sīsapā khadiro daṇḍo, celā sattisatena ca;
පාණා සුරියූපමා ද්‌වෙධා, ඉන්‌දඛීලො ච වාදිනොති.
Pāṇā suriyūpamā dvedhā, indakhīlo ca vādinoti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. වාදත්‌ථිකසුත්‌තවණ්‌ණනා • 10. Vādatthikasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. වාදත්‌ථිකසුත්‌තවණ්‌ණනා • 10. Vādatthikasuttavaṇṇanā
