| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๔. วฑฺฒิสุตฺตํ
4. Vaḍḍhisuttaṃ
๗๔. ‘‘ทสหิ , ภิกฺขเว, วฑฺฒีหิ วฑฺฒมาโน อริยสาวโก อริยาย วฑฺฒิยา วฑฺฒติ, สาราทายี จ โหติ วราทายี กายสฺสฯ กตเมหิ ทสหิ? เขตฺตวตฺถูหิ วฑฺฒติ, ธนธเญฺญน วฑฺฒติ, ปุตฺตทาเรหิ วฑฺฒติ, ทาสกมฺมกรโปริเสหิ วฑฺฒติ, จตุปฺปเทหิ วฑฺฒติ, สทฺธาย วฑฺฒติ, สีเลน วฑฺฒติ, สุเตน วฑฺฒติ, จาเคน วฑฺฒติ, ปญฺญาย วฑฺฒติ – อิเมหิ โข, ภิกฺขเว, ทสหิ วฑฺฒีหิ วฑฺฒมาโน อริยสาวโก อริยาย วฑฺฒิยา วฑฺฒติ, สาราทายี จ โหติ วราทายี กายสฺสาติฯ
74. ‘‘Dasahi , bhikkhave, vaḍḍhīhi vaḍḍhamāno ariyasāvako ariyāya vaḍḍhiyā vaḍḍhati, sārādāyī ca hoti varādāyī kāyassa. Katamehi dasahi? Khettavatthūhi vaḍḍhati, dhanadhaññena vaḍḍhati, puttadārehi vaḍḍhati, dāsakammakaraporisehi vaḍḍhati, catuppadehi vaḍḍhati, saddhāya vaḍḍhati, sīlena vaḍḍhati, sutena vaḍḍhati, cāgena vaḍḍhati, paññāya vaḍḍhati – imehi kho, bhikkhave, dasahi vaḍḍhīhi vaḍḍhamāno ariyasāvako ariyāya vaḍḍhiyā vaḍḍhati, sārādāyī ca hoti varādāyī kāyassāti.
‘‘ธเนน ธเญฺญน จ โยธ วฑฺฒติ,
‘‘Dhanena dhaññena ca yodha vaḍḍhati,
ปุเตฺตหิ ทาเรหิ จตุปฺปเทหิ จ;
Puttehi dārehi catuppadehi ca;
ส โภควา โหติ ยสสฺสิ ปูชิโต,
Sa bhogavā hoti yasassi pūjito,
ญาตีหิ มิเตฺตหิ อโถปิ ราชุภิฯ
Ñātīhi mittehi athopi rājubhi.
‘‘สทฺธาย สีเลน จ โยธ วฑฺฒติ,
‘‘Saddhāya sīlena ca yodha vaḍḍhati,
ปญฺญาย จาเคน สุเตน จูภยํ;
Paññāya cāgena sutena cūbhayaṃ;
โส ตาทิโส สปฺปุริโส วิจกฺขโณ,
So tādiso sappuriso vicakkhaṇo,
ทิเฎฺฐว ธเมฺม อุภเยน วฑฺฒตี’’ติฯ จตุตฺถํ;
Diṭṭheva dhamme ubhayena vaḍḍhatī’’ti. catutthaṃ;
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๓-๔. อิฎฺฐธมฺมสุตฺตาทิวณฺณนา • 3-4. Iṭṭhadhammasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๔. อากงฺขสุตฺตาทิวณฺณนา • 1-4. Ākaṅkhasuttādivaṇṇanā
