| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. ဝာဒီသုတ္တံ
10. Vādīsuttaṃ
၁၄၀. ‘‘စတ္တာရောမေ , ဘိက္ခဝေ, ဝာဒီ။ ကတမေ စတ္တာရော? အတ္ထိ , ဘိက္ခဝေ, ဝာဒီ အတ္ထတော ပရိယာဒာနံ ဂစ္ဆတိ, နော ဗ္ယဉ္ဇနတော; အတ္ထိ, ဘိက္ခဝေ, ဝာဒီ ဗ္ယဉ္ဇနတော ပရိယာဒာနံ ဂစ္ဆတိ, နော အတ္ထတော; အတ္ထိ, ဘိက္ခဝေ, ဝာဒီ အတ္ထတော စ ဗ္ယဉ္ဇနတော စ ပရိယာဒာနံ ဂစ္ဆတိ; အတ္ထိ, ဘိက္ခဝေ, ဝာဒီ နေဝတ္ထတော နော ဗ္ယဉ္ဇနတော ပရိယာဒာနံ ဂစ္ဆတိ။ ဣမေ ခော, ဘိက္ခဝေ, စတ္တာရော ဝာဒီ။ အဋ္ဌာနမေတံ, ဘိက္ခဝေ, အနဝကာသော ယံ စတူဟိ ပဋိသမ္ဘိဒာဟိ သမန္နာဂတော 1 အတ္ထတော ဝာ ဗ္ယဉ္ဇနတော ဝာ ပရိယာဒာနံ ဂစ္ဆေယ္ယာ’’တိ။ ဒသမံ။
140. ‘‘Cattārome , bhikkhave, vādī. Katame cattāro? Atthi , bhikkhave, vādī atthato pariyādānaṃ gacchati, no byañjanato; atthi, bhikkhave, vādī byañjanato pariyādānaṃ gacchati, no atthato; atthi, bhikkhave, vādī atthato ca byañjanato ca pariyādānaṃ gacchati; atthi, bhikkhave, vādī nevatthato no byañjanato pariyādānaṃ gacchati. Ime kho, bhikkhave, cattāro vādī. Aṭṭhānametaṃ, bhikkhave, anavakāso yaṃ catūhi paṭisambhidāhi samannāgato 2 atthato vā byañjanato vā pariyādānaṃ gaccheyyā’’ti. Dasamaṃ.
ပုဂ္ဂလဝဂ္ဂော စတုတ္ထော။
Puggalavaggo catuttho.
တသ္သုဒ္ဒာနံ –
Tassuddānaṃ –
သံယောဇနံ ပဋိဘာနော၊ ဥဂ္ဃဋိတညု ဥဋ္ဌာနံ။
Saṃyojanaṃ paṭibhāno, ugghaṭitaññu uṭṭhānaṃ;
သာဝဇ္ဇော ဒ္ဝေ စ သီလာနိ၊ နိကဋ္ဌ ဓမ္မ ဝာဒီ စာတိ။
Sāvajjo dve ca sīlāni, nikaṭṭha dhamma vādī cāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. ဝာဒီသုတ္တဝဏ္ဏနာ • 10. Vādīsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၉-၁၀. ဓမ္မကထိကသုတ္တာဒိဝဏ္ဏနာ • 9-10. Dhammakathikasuttādivaṇṇanā
