| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
96. வக்³கா³வக்³க³ஸஞ்ஞீபன்னரஸகங்
96. Vaggāvaggasaññīpannarasakaṃ
173. இத⁴ பன, பி⁴க்க²வே, அஞ்ஞதரஸ்மிங் ஆவாஸே தத³ஹுபோஸதே² ஸம்ப³ஹுலா ஆவாஸிகா பி⁴க்கூ² ஸன்னிபதந்தி சத்தாரோ வா அதிரேகா வா. தே ஜானந்தி ‘‘அத்த²ஞ்ஞே ஆவாஸிகா பி⁴க்கூ² அனாக³தா’’தி. தே த⁴ம்மஸஞ்ஞினோ வினயஸஞ்ஞினோ வக்³கா³ வக்³க³ஸஞ்ஞினோ உபோஸத²ங் கரொந்தி , பாதிமொக்க²ங் உத்³தி³ஸந்தி. தேஹி உத்³தி³ஸ்ஸமானே பாதிமொக்கே², அத²ஞ்ஞே ஆவாஸிகா பி⁴க்கூ² ஆக³ச்ச²ந்தி ப³ஹுதரா. தேஹி, பி⁴க்க²வே, பி⁴க்கூ²ஹி புன பாதிமொக்க²ங் உத்³தி³ஸிதப்³ப³ங். உத்³தே³ஸகானங் ஆபத்தி து³க்கடஸ்ஸ.
173. Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino uposathaṃ karonti , pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pātimokkhaṃ uddisitabbaṃ. Uddesakānaṃ āpatti dukkaṭassa.
இத⁴ பன, பி⁴க்க²வே, அஞ்ஞதரஸ்மிங் ஆவாஸே தத³ஹுபோஸதே² ஸம்ப³ஹுலா ஆவாஸிகா பி⁴க்கூ² ஸன்னிபதந்தி சத்தாரோ வா அதிரேகா வா. தே ஜானந்தி அத்த²ஞ்ஞே ஆவாஸிகா பி⁴க்கூ² அனாக³தாதி, தே த⁴ம்மஸஞ்ஞினோ வினயஸஞ்ஞினோ வக்³கா³ ஸமக்³க³ஸஞ்ஞினோ உபோஸத²ங் கரொந்தி பாதிமொக்க²ங் உத்³தி³ஸந்தி. தேஹி உத்³தி³ஸ்ஸமானே பாதிமொக்கே², அத²ஞ்ஞே ஆவாஸிகா பி⁴க்கூ² ஆக³ச்ச²ந்தி ஸமஸமா . உத்³தி³ட்ட²ங் ஸுஉத்³தி³ட்ட²ங், அவஸேஸங் ஸோதப்³ப³ங். உத்³தே³ஸகானங் ஆபத்தி து³க்கடஸ்ஸ.
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti atthaññe āvāsikā bhikkhū anāgatāti, te dhammasaññino vinayasaññino vaggā samaggasaññino uposathaṃ karonti pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti samasamā . Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
இத⁴ பன, பி⁴க்க²வே, அஞ்ஞதரஸ்மிங் ஆவாஸே தத³ஹுபோஸதே² ஸம்ப³ஹுலா ஆவாஸிகா பி⁴க்கூ² ஸன்னிபதந்தி சத்தாரோ வா அதிரேகா வா. தே ஜானந்தி அத்த²ஞ்ஞே ஆவாஸிகா பி⁴க்கூ² அனாக³தாதி தே த⁴ம்மஸஞ்ஞினோ வினயஸஞ்ஞினோ வக்³கா³ வக்³க³ஸஞ்ஞினோ உபோஸத²ங் கரொந்தி பாதிமொக்க²ங் உத்³தி³ஸந்தி. தேஹி உத்³தி³ஸ்ஸமானே பாதிமொக்கே², அத²ஞ்ஞே ஆவாஸிகா பி⁴க்கூ² ஆக³ச்ச²ந்தி தோ²கதரா. உத்³தி³ட்ட²ங் ஸுஉத்³தி³ட்ட²ங், அவஸேஸங் ஸோதப்³ப³ங். உத்³தே³ஸகானங் ஆபத்தி து³க்கடஸ்ஸ.
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti atthaññe āvāsikā bhikkhū anāgatāti te dhammasaññino vinayasaññino vaggā vaggasaññino uposathaṃ karonti pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti thokatarā. Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
இத⁴ பன, பி⁴க்க²வே, அஞ்ஞதரஸ்மிங் ஆவாஸே தத³ஹுபோஸதே² ஸம்ப³ஹுலா ஆவாஸிகா பி⁴க்கூ² ஸன்னிபதந்தி சத்தாரோ வா அதிரேகா வா. தே ஜானந்தி ‘‘அத்த²ஞ்ஞே ஆவாஸிகா பி⁴க்கூ² அனாக³தா’’தி. தே த⁴ம்மஸஞ்ஞினோ வினயஸஞ்ஞினோ வக்³கா³ வக்³க³ஸஞ்ஞினோ உபோஸத²ங் கரொந்தி, பாதிமொக்க²ங் உத்³தி³ஸந்தி. தேஹி உத்³தி³ட்ட²மத்தே பாதிமொக்கே²…பே॰… அவுட்டி²தாய பரிஸாய…பே॰… ஏகச்சாய வுட்டி²தாய பரிஸாய…பே॰… ஸப்³பா³ய வுட்டி²தாய பரிஸாய அத²ஞ்ஞே ஆவாஸிகா பி⁴க்கூ² ஆக³ச்ச²ந்தி ப³ஹுதரா…பே॰… ஸமஸமா…பே॰… தோ²கதரா. உத்³தி³ட்ட²ங் ஸுஉத்³தி³ட்ட²ங், தேஸங் ஸந்திகே பாரிஸுத்³தி⁴ ஆரோசேதப்³பா³. உத்³தே³ஸகானங் ஆபத்தி து³க்கடஸ்ஸ.
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino uposathaṃ karonti, pātimokkhaṃ uddisanti. Tehi uddiṭṭhamatte pātimokkhe…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya athaññe āvāsikā bhikkhū āgacchanti bahutarā…pe… samasamā…pe… thokatarā. Uddiṭṭhaṃ suuddiṭṭhaṃ, tesaṃ santike pārisuddhi ārocetabbā. Uddesakānaṃ āpatti dukkaṭassa.
வக்³கா³வக்³க³ஸஞ்ஞிபன்னரஸகங் நிட்டி²தங்.
Vaggāvaggasaññipannarasakaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அனாபத்திபன்னரஸகாதி³கதா² • Anāpattipannarasakādikathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனாபத்திபன்னரஸகாதி³கதா²வண்ணனா • Anāpattipannarasakādikathāvaṇṇanā
