| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১২৯. ৰগ্গাৰগ্গসঞ্ঞীপন্নরসকং
129. Vaggāvaggasaññīpannarasakaṃ
২২৩. ইধ পন, ভিক্খৰে, অঞ্ঞতরস্মিং আৰাসে তদহু পৰারণায সম্বহুলা আৰাসিকা ভিক্খূ সন্নিপতন্তি, পঞ্চ ৰা অতিরেকা ৰা। তে জানন্তি ‘‘অত্থঞ্ঞে আৰাসিকা ভিক্খূ অনাগতা’’তি। তে ধম্মসঞ্ঞিনো ৰিনযসঞ্ঞিনো ৰগ্গা ৰগ্গসঞ্ঞিনো পৰারেন্তি। তেহি পৰারিযমানে অথঞ্ঞে আৰাসিকা ভিক্খূ আগচ্ছন্তি বহুতরা। তেহি, ভিক্খৰে, ভিক্খূহি পুন পৰারেতব্বং। পৰারিতানং আপত্তি দুক্কটস্স।
223. Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pavāretabbaṃ. Pavāritānaṃ āpatti dukkaṭassa.
ইধ পন, ভিক্খৰে, অঞ্ঞতরস্মিং আৰাসে তদহু পৰারণায সম্বহুলা আৰাসিকা ভিক্খূ সন্নিপতন্তি, পঞ্চ ৰা অতিরেকা ৰা। তে জানন্তি ‘‘অত্থঞ্ঞে আৰাসিকা ভিক্খূ অনাগতা’’তি। তে ধম্মসঞ্ঞিনো ৰিনযসঞ্ঞিনো ৰগ্গা ৰগ্গসঞ্ঞিনো পৰারেন্তি। তেহি পৰারিযমানে অথঞ্ঞে আৰাসিকা ভিক্খূ আগচ্ছন্তি সমসমা। পৰারিতা সুপ্পৰারিতা, অৰসেসেহি পৰারেতব্বং। পৰারিতানং আপত্তি দুক্কটস্স।
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti samasamā. Pavāritā suppavāritā, avasesehi pavāretabbaṃ. Pavāritānaṃ āpatti dukkaṭassa.
ইধ পন, ভিক্খৰে, অঞ্ঞতরস্মিং আৰাসে তদহু পৰারণায সম্বহুলা আৰাসিকা ভিক্খূ সন্নিপতন্তি, পঞ্চ ৰা অতিরেকা ৰা। তে জানন্তি ‘‘অত্থঞ্ঞে আৰাসিকা ভিক্খূ অনাগতা’’তি। তে ধম্মসঞ্ঞিনো ৰিনযসঞ্ঞিনো ৰগ্গা ৰগ্গসঞ্ঞিনো পৰারেন্তি। তেহি পৰারিযমানে অথঞ্ঞে আৰাসিকা ভিক্খূ আগচ্ছন্তি থোকতরা। পৰারিতা সুপ্পৰারিতা, অৰসেসেহি পৰারেতব্বং। পৰারিতানং আপত্তি দুক্কটস্স।
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti thokatarā. Pavāritā suppavāritā, avasesehi pavāretabbaṃ. Pavāritānaṃ āpatti dukkaṭassa.
ইধ পন, ভিক্খৰে, অঞ্ঞতরস্মিং আৰাসে তদহু পৰারণায সম্বহুলা আৰাসিকা ভিক্খূ সন্নিপতন্তি, পঞ্চ ৰা অতিরেকা ৰা। তে জানন্তি ‘‘অত্থঞ্ঞে আৰাসিকা ভিক্খূ অনাগতা’’তি। তে ধম্মসঞ্ঞিনো ৰিনযসঞ্ঞিনো ৰগ্গা ৰগ্গসঞ্ঞিনো পৰারেন্তি। তেহি পৰারিতমত্তে,…পে॰… অৰুট্ঠিতায পরিসায…পে॰… একচ্চায ৰুট্ঠিতায পরিসায…পে॰… সব্বায ৰুট্ঠিতায পরিসায, অথঞ্ঞে আৰাসিকা ভিক্খূ আগচ্ছন্তি বহুতরা…পে॰… সমসমা…পে॰… থোকতরা। পৰারিতা সুপ্পৰারিতা, তেসং সন্তিকে পৰারেতব্বং। পৰারিতানং আপত্তি দুক্কটস্স।
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāritamatte,…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya, athaññe āvāsikā bhikkhū āgacchanti bahutarā…pe… samasamā…pe… thokatarā. Pavāritā suppavāritā, tesaṃ santike pavāretabbaṃ. Pavāritānaṃ āpatti dukkaṭassa.
ৰগ্গাৰগ্গসঞ্ঞীপন্নরসকং নিট্ঠিতং।
Vaggāvaggasaññīpannarasakaṃ niṭṭhitaṃ.
