| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၂၉. ဝဂ္ဂာဝဂ္ဂသညီပန္နရသကံ
129. Vaggāvaggasaññīpannarasakaṃ
၂၂၃. ဣဓ ပန, ဘိက္ခဝေ, အညတရသ္မိံ အာဝာသေ တဒဟု ပဝာရဏာယ သမ္ဗဟုလာ အာဝာသိကာ ဘိက္ခူ သန္နိပတန္တိ, ပဉ္စ ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ဓမ္မသညိနော ဝိနယသညိနော ဝဂ္ဂာ ဝဂ္ဂသညိနော ပဝာရေန္တိ။ တေဟိ ပဝာရိယမာနေ အထညေ အာဝာသိကာ ဘိက္ခူ အာဂစ္ဆန္တိ ဗဟုတရာ။ တေဟိ, ဘိက္ခဝေ, ဘိက္ခူဟိ ပုန ပဝာရေတဗ္ဗံ။ ပဝာရိတာနံ အာပတ္တိ ဒုက္ကဋသ္သ။
223. Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pavāretabbaṃ. Pavāritānaṃ āpatti dukkaṭassa.
ဣဓ ပန, ဘိက္ခဝေ, အညတရသ္မိံ အာဝာသေ တဒဟု ပဝာရဏာယ သမ္ဗဟုလာ အာဝာသိကာ ဘိက္ခူ သန္နိပတန္တိ, ပဉ္စ ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ဓမ္မသညိနော ဝိနယသညိနော ဝဂ္ဂာ ဝဂ္ဂသညိနော ပဝာရေန္တိ။ တေဟိ ပဝာရိယမာနေ အထညေ အာဝာသိကာ ဘိက္ခူ အာဂစ္ဆန္တိ သမသမာ။ ပဝာရိတာ သုပ္ပဝာရိတာ, အဝသေသေဟိ ပဝာရေတဗ္ဗံ။ ပဝာရိတာနံ အာပတ္တိ ဒုက္ကဋသ္သ။
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti samasamā. Pavāritā suppavāritā, avasesehi pavāretabbaṃ. Pavāritānaṃ āpatti dukkaṭassa.
ဣဓ ပန, ဘိက္ခဝေ, အညတရသ္မိံ အာဝာသေ တဒဟု ပဝာရဏာယ သမ္ဗဟုလာ အာဝာသိကာ ဘိက္ခူ သန္နိပတန္တိ, ပဉ္စ ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ဓမ္မသညိနော ဝိနယသညိနော ဝဂ္ဂာ ဝဂ္ဂသညိနော ပဝာရေန္တိ။ တေဟိ ပဝာရိယမာနေ အထညေ အာဝာသိကာ ဘိက္ခူ အာဂစ္ဆန္တိ ထောကတရာ။ ပဝာရိတာ သုပ္ပဝာရိတာ, အဝသေသေဟိ ပဝာရေတဗ္ဗံ။ ပဝာရိတာနံ အာပတ္တိ ဒုက္ကဋသ္သ။
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti thokatarā. Pavāritā suppavāritā, avasesehi pavāretabbaṃ. Pavāritānaṃ āpatti dukkaṭassa.
ဣဓ ပန, ဘိက္ခဝေ, အညတရသ္မိံ အာဝာသေ တဒဟု ပဝာရဏာယ သမ္ဗဟုလာ အာဝာသိကာ ဘိက္ခူ သန္နိပတန္တိ, ပဉ္စ ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ဓမ္မသညိနော ဝိနယသညိနော ဝဂ္ဂာ ဝဂ္ဂသညိနော ပဝာရေန္တိ။ တေဟိ ပဝာရိတမတ္တေ,။ပေ.။ အဝုဋ္ဌိတာယ ပရိသာယ။ပေ.။ ဧကစ္စာယ ဝုဋ္ဌိတာယ ပရိသာယ။ပေ.။ သဗ္ဗာယ ဝုဋ္ဌိတာယ ပရိသာယ, အထညေ အာဝာသိကာ ဘိက္ခူ အာဂစ္ဆန္တိ ဗဟုတရာ။ပေ.။ သမသမာ။ပေ.။ ထောကတရာ။ ပဝာရိတာ သုပ္ပဝာရိတာ, တေသံ သန္တိကေ ပဝာရေတဗ္ဗံ။ ပဝာရိတာနံ အာပတ္တိ ဒုက္ကဋသ္သ။
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāritamatte,…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya, athaññe āvāsikā bhikkhū āgacchanti bahutarā…pe… samasamā…pe… thokatarā. Pavāritā suppavāritā, tesaṃ santike pavāretabbaṃ. Pavāritānaṃ āpatti dukkaṭassa.
ဝဂ္ဂာဝဂ္ဂသညီပန္နရသကံ နိဋ္ဌိတံ။
Vaggāvaggasaññīpannarasakaṃ niṭṭhitaṃ.
