| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
129. වග්‌ගාවග්‌ගසඤ්‌ඤීපන්‌නරසකං
129. Vaggāvaggasaññīpannarasakaṃ
223. ඉධ පන, භික්‌ඛවෙ, අඤ්‌ඤතරස්‌මිං ආවාසෙ තදහු පවාරණාය සම්‌බහුලා ආවාසිකා භික්‌ඛූ සන්‌නිපතන්‌ති, පඤ්‌ච වා අතිරෙකා වා. තෙ ජානන්‌ති ‘‘අත්‌ථඤ්‌ඤෙ ආවාසිකා භික්‌ඛූ අනාගතා’’ති. තෙ ධම්‌මසඤ්‌ඤිනො විනයසඤ්‌ඤිනො වග්‌ගා වග්‌ගසඤ්‌ඤිනො පවාරෙන්‌ති. තෙහි පවාරියමානෙ අථඤ්‌ඤෙ ආවාසිකා භික්‌ඛූ ආගච්‌ඡන්‌ති බහුතරා. තෙහි, භික්‌ඛවෙ, භික්‌ඛූහි පුන පවාරෙතබ්‌බං. පවාරිතානං ආපත්‌ති දුක්‌කටස්‌ස.
223. Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pavāretabbaṃ. Pavāritānaṃ āpatti dukkaṭassa.
ඉධ පන, භික්‌ඛවෙ, අඤ්‌ඤතරස්‌මිං ආවාසෙ තදහු පවාරණාය සම්‌බහුලා ආවාසිකා භික්‌ඛූ සන්‌නිපතන්‌ති, පඤ්‌ච වා අතිරෙකා වා. තෙ ජානන්‌ති ‘‘අත්‌ථඤ්‌ඤෙ ආවාසිකා භික්‌ඛූ අනාගතා’’ති. තෙ ධම්‌මසඤ්‌ඤිනො විනයසඤ්‌ඤිනො වග්‌ගා වග්‌ගසඤ්‌ඤිනො පවාරෙන්‌ති. තෙහි පවාරියමානෙ අථඤ්‌ඤෙ ආවාසිකා භික්‌ඛූ ආගච්‌ඡන්‌ති සමසමා. පවාරිතා සුප්‌පවාරිතා, අවසෙසෙහි පවාරෙතබ්‌බං. පවාරිතානං ආපත්‌ති දුක්‌කටස්‌ස.
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti samasamā. Pavāritā suppavāritā, avasesehi pavāretabbaṃ. Pavāritānaṃ āpatti dukkaṭassa.
ඉධ පන, භික්‌ඛවෙ, අඤ්‌ඤතරස්‌මිං ආවාසෙ තදහු පවාරණාය සම්‌බහුලා ආවාසිකා භික්‌ඛූ සන්‌නිපතන්‌ති, පඤ්‌ච වා අතිරෙකා වා. තෙ ජානන්‌ති ‘‘අත්‌ථඤ්‌ඤෙ ආවාසිකා භික්‌ඛූ අනාගතා’’ති. තෙ ධම්‌මසඤ්‌ඤිනො විනයසඤ්‌ඤිනො වග්‌ගා වග්‌ගසඤ්‌ඤිනො පවාරෙන්‌ති. තෙහි පවාරියමානෙ අථඤ්‌ඤෙ ආවාසිකා භික්‌ඛූ ආගච්‌ඡන්‌ති ථොකතරා. පවාරිතා සුප්‌පවාරිතා, අවසෙසෙහි පවාරෙතබ්‌බං. පවාරිතානං ආපත්‌ති දුක්‌කටස්‌ස.
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāriyamāne athaññe āvāsikā bhikkhū āgacchanti thokatarā. Pavāritā suppavāritā, avasesehi pavāretabbaṃ. Pavāritānaṃ āpatti dukkaṭassa.
ඉධ පන, භික්‌ඛවෙ, අඤ්‌ඤතරස්‌මිං ආවාසෙ තදහු පවාරණාය සම්‌බහුලා ආවාසිකා භික්‌ඛූ සන්‌නිපතන්‌ති, පඤ්‌ච වා අතිරෙකා වා. තෙ ජානන්‌ති ‘‘අත්‌ථඤ්‌ඤෙ ආවාසිකා භික්‌ඛූ අනාගතා’’ති. තෙ ධම්‌මසඤ්‌ඤිනො විනයසඤ්‌ඤිනො වග්‌ගා වග්‌ගසඤ්‌ඤිනො පවාරෙන්‌ති. තෙහි පවාරිතමත්‌තෙ,…පෙ.… අවුට්‌ඨිතාය පරිසාය…පෙ.… එකච්‌චාය වුට්‌ඨිතාය පරිසාය…පෙ.… සබ්‌බාය වුට්‌ඨිතාය පරිසාය, අථඤ්‌ඤෙ ආවාසිකා භික්‌ඛූ ආගච්‌ඡන්‌ති බහුතරා…පෙ.… සමසමා…පෙ.… ථොකතරා. පවාරිතා සුප්‌පවාරිතා, තෙසං සන්‌තිකෙ පවාරෙතබ්‌බං. පවාරිතානං ආපත්‌ති දුක්‌කටස්‌ස.
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino pavārenti. Tehi pavāritamatte,…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya, athaññe āvāsikā bhikkhū āgacchanti bahutarā…pe… samasamā…pe… thokatarā. Pavāritā suppavāritā, tesaṃ santike pavāretabbaṃ. Pavāritānaṃ āpatti dukkaṭassa.
වග්‌ගාවග්‌ගසඤ්‌ඤීපන්‌නරසකං නිට්‌ඨිතං.
Vaggāvaggasaññīpannarasakaṃ niṭṭhitaṃ.
