| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. වග්‌ගුලිඞ්‌ගපඤ්‌හො
7. Vagguliṅgapañho
7. ‘‘භන්‌තෙ නාගසෙන, ‘වග්‌ගුලිස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, වග්‌ගුලි ගෙහං පවිසිත්‌වා විචරිත්‌වා නික්‌ඛමති, න තත්‌ථ පලිබුද්‌ධති, එවමෙව ඛො, මහාරාජ, යොගිනා යොගාවචරෙන ගාමං පිණ්‌ඩාය පවිසිත්‌වා සපදානං විචරිත්‌වා පටිලද්‌ධලාභෙන ඛිප්‌පමෙව නික්‌ඛමිතබ්‌බං, න තත්‌ථ පලිබුද්‌ධෙන භවිතබ්‌බං. ඉදං, මහාරාජ, වග්‌ගුලිස්‌ස පඨමං අඞ්‌ගං ගහෙතබ්‌බං.
7. ‘‘Bhante nāgasena, ‘vaggulissa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, vagguli gehaṃ pavisitvā vicaritvā nikkhamati, na tattha palibuddhati, evameva kho, mahārāja, yoginā yogāvacarena gāmaṃ piṇḍāya pavisitvā sapadānaṃ vicaritvā paṭiladdhalābhena khippameva nikkhamitabbaṃ, na tattha palibuddhena bhavitabbaṃ. Idaṃ, mahārāja, vaggulissa paṭhamaṃ aṅgaṃ gahetabbaṃ.
‘‘පුන චපරං, මහාරාජ, වග්‌ගුලි පරගෙහෙ වසමානො න තෙසං පරිහානිං කරොති, එවමෙව ඛො, මහාරාජ, යොගිනා යොගාවචරෙන කුලානි උපසඞ්‌කමිත්‌වා අතියාචනාය වා විඤ්‌ඤත්‌තිබහුලතාය වා කායදොසබහුලතාය වා අතිභාණිතාය වා සමානසුඛදුක්‌ඛතාය වා න තෙසං කොචි විප්‌පටිසාරො කරණීයො, නපි තෙසං මූලකම්‌මං පරිහාපෙතබ්‌බං, සබ්‌බථා වඩ්‌ඪි යෙව ඉච්‌ඡිතබ්‌බා. ඉදං, මහාරාජ, වග්‌ගුලිස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන දීඝනිකායවරෙ ලක්‌ඛණසුත්‌තන්‌තෙ –
‘‘Puna caparaṃ, mahārāja, vagguli paragehe vasamāno na tesaṃ parihāniṃ karoti, evameva kho, mahārāja, yoginā yogāvacarena kulāni upasaṅkamitvā atiyācanāya vā viññattibahulatāya vā kāyadosabahulatāya vā atibhāṇitāya vā samānasukhadukkhatāya vā na tesaṃ koci vippaṭisāro karaṇīyo, napi tesaṃ mūlakammaṃ parihāpetabbaṃ, sabbathā vaḍḍhi yeva icchitabbā. Idaṃ, mahārāja, vaggulissa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena dīghanikāyavare lakkhaṇasuttante –
‘‘‘සුද්‌ධාය සීලෙන සුතෙන බුද්‌ධියා, චාගෙන ධම්‌මෙන බහූහි සාධුහි;
‘‘‘Suddhāya sīlena sutena buddhiyā, cāgena dhammena bahūhi sādhuhi;
ධනෙන ධඤ්‌ඤෙන ච ඛෙත්‌තවත්‌ථුනා, පුත්‌තෙහි දාරෙහි චතුප්‌පදෙහි ච.
Dhanena dhaññena ca khettavatthunā, puttehi dārehi catuppadehi ca.
‘‘‘ඤාතීහි මිත්‌තෙහි ච බන්‌ධවෙහි, බලෙන වණ්‌ණෙන සුඛෙන චූභයං;
‘‘‘Ñātīhi mittehi ca bandhavehi, balena vaṇṇena sukhena cūbhayaṃ;
කථං න හායෙය්‍යුං පරෙති ඉච්‌ඡති, අත්‌ථසමිද්‌ධිඤ්‌ච පනාභිකඞ්‌ඛතී’’’ති.
Kathaṃ na hāyeyyuṃ pareti icchati, atthasamiddhiñca panābhikaṅkhatī’’’ti.
වග්‌ගුලිඞ්‌ගපඤ්‌හො සත්‌තමො.
Vagguliṅgapañho sattamo.
