| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
(৯) ৪. থেরৰগ্গো
(9) 4. Theravaggo
১. ৰাহনসুত্তং
1. Vāhanasuttaṃ
৮১. একং সমযং ভগৰা চম্পাযং ৰিহরতি গগ্গরায পোক্খরণিযা তীরে। অথ খো আযস্মা ৰাহনো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা ৰাহনো ভগৰন্তং এতদৰোচ – ‘‘কতিহি নু খো, ভন্তে, ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতী’’তি?
81. Ekaṃ samayaṃ bhagavā campāyaṃ viharati gaggarāya pokkharaṇiyā tīre. Atha kho āyasmā vāhano yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā vāhano bhagavantaṃ etadavoca – ‘‘katihi nu kho, bhante, dhammehi tathāgato nissaṭo visaṃyutto vippamutto vimariyādīkatena cetasā viharatī’’ti?
‘‘দসহি খো, ৰাহন, ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি। কতমেহি দসহি? রূপেন খো, ৰাহন, তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি, ৰেদনায খো, ৰাহন…পে॰… সঞ্ঞায খো, ৰাহন… সঙ্খারেহি খো, ৰাহন… ৰিঞ্ঞাণেন খো, ৰাহন… জাতিযা খো, ৰাহন… জরায খো, ৰাহন… মরণেন খো, ৰাহন… দুক্খেহি খো, ৰাহন… কিলেসেহি খো, ৰাহন, তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি। সেয্যথাপি, ৰাহন, উপ্পলং ৰা পদুমং ৰা পুণ্ডরীকং ৰা উদকে জাতং উদকে সংৰড্ঢং উদকা পচ্চুগ্গম্ম ঠিতং অনুপলিত্তং উদকেন; এৰমেৰং খো, ৰাহন, ইমেহি দসহি ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতী’’তি। পঠমং।
‘‘Dasahi kho, vāhana, dhammehi tathāgato nissaṭo visaṃyutto vippamutto vimariyādīkatena cetasā viharati. Katamehi dasahi? Rūpena kho, vāhana, tathāgato nissaṭo visaṃyutto vippamutto vimariyādīkatena cetasā viharati, vedanāya kho, vāhana…pe… saññāya kho, vāhana… saṅkhārehi kho, vāhana… viññāṇena kho, vāhana… jātiyā kho, vāhana… jarāya kho, vāhana… maraṇena kho, vāhana… dukkhehi kho, vāhana… kilesehi kho, vāhana, tathāgato nissaṭo visaṃyutto vippamutto vimariyādīkatena cetasā viharati. Seyyathāpi, vāhana, uppalaṃ vā padumaṃ vā puṇḍarīkaṃ vā udake jātaṃ udake saṃvaḍḍhaṃ udakā paccuggamma ṭhitaṃ anupalittaṃ udakena; evamevaṃ kho, vāhana, imehi dasahi dhammehi tathāgato nissaṭo visaṃyutto vippamutto vimariyādīkatena cetasā viharatī’’ti. Paṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১-৩. ৰাহনসুত্তাদিৰণ্ণনা • 1-3. Vāhanasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৮. ৰাহনসুত্তাদিৰণ্ণনা • 1-8. Vāhanasuttādivaṇṇanā
