| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
(೯) ೪. ಥೇರವಗ್ಗೋ
(9) 4. Theravaggo
೧. ವಾಹನಸುತ್ತಂ
1. Vāhanasuttaṃ
೮೧. ಏಕಂ ಸಮಯಂ ಭಗವಾ ಚಮ್ಪಾಯಂ ವಿಹರತಿ ಗಗ್ಗರಾಯ ಪೋಕ್ಖರಣಿಯಾ ತೀರೇ। ಅಥ ಖೋ ಆಯಸ್ಮಾ ವಾಹನೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ವಾಹನೋ ಭಗವನ್ತಂ ಏತದವೋಚ – ‘‘ಕತಿಹಿ ನು ಖೋ, ಭನ್ತೇ, ಧಮ್ಮೇಹಿ ತಥಾಗತೋ ನಿಸ್ಸಟೋ ವಿಸಂಯುತ್ತೋ ವಿಪ್ಪಮುತ್ತೋ ವಿಮರಿಯಾದೀಕತೇನ ಚೇತಸಾ ವಿಹರತೀ’’ತಿ?
81. Ekaṃ samayaṃ bhagavā campāyaṃ viharati gaggarāya pokkharaṇiyā tīre. Atha kho āyasmā vāhano yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā vāhano bhagavantaṃ etadavoca – ‘‘katihi nu kho, bhante, dhammehi tathāgato nissaṭo visaṃyutto vippamutto vimariyādīkatena cetasā viharatī’’ti?
‘‘ದಸಹಿ ಖೋ, ವಾಹನ, ಧಮ್ಮೇಹಿ ತಥಾಗತೋ ನಿಸ್ಸಟೋ ವಿಸಂಯುತ್ತೋ ವಿಪ್ಪಮುತ್ತೋ ವಿಮರಿಯಾದೀಕತೇನ ಚೇತಸಾ ವಿಹರತಿ। ಕತಮೇಹಿ ದಸಹಿ? ರೂಪೇನ ಖೋ, ವಾಹನ, ತಥಾಗತೋ ನಿಸ್ಸಟೋ ವಿಸಂಯುತ್ತೋ ವಿಪ್ಪಮುತ್ತೋ ವಿಮರಿಯಾದೀಕತೇನ ಚೇತಸಾ ವಿಹರತಿ, ವೇದನಾಯ ಖೋ, ವಾಹನ…ಪೇ॰… ಸಞ್ಞಾಯ ಖೋ, ವಾಹನ… ಸಙ್ಖಾರೇಹಿ ಖೋ, ವಾಹನ… ವಿಞ್ಞಾಣೇನ ಖೋ, ವಾಹನ… ಜಾತಿಯಾ ಖೋ, ವಾಹನ… ಜರಾಯ ಖೋ, ವಾಹನ… ಮರಣೇನ ಖೋ, ವಾಹನ… ದುಕ್ಖೇಹಿ ಖೋ, ವಾಹನ… ಕಿಲೇಸೇಹಿ ಖೋ, ವಾಹನ, ತಥಾಗತೋ ನಿಸ್ಸಟೋ ವಿಸಂಯುತ್ತೋ ವಿಪ್ಪಮುತ್ತೋ ವಿಮರಿಯಾದೀಕತೇನ ಚೇತಸಾ ವಿಹರತಿ। ಸೇಯ್ಯಥಾಪಿ, ವಾಹನ, ಉಪ್ಪಲಂ ವಾ ಪದುಮಂ ವಾ ಪುಣ್ಡರೀಕಂ ವಾ ಉದಕೇ ಜಾತಂ ಉದಕೇ ಸಂವಡ್ಢಂ ಉದಕಾ ಪಚ್ಚುಗ್ಗಮ್ಮ ಠಿತಂ ಅನುಪಲಿತ್ತಂ ಉದಕೇನ; ಏವಮೇವಂ ಖೋ, ವಾಹನ, ಇಮೇಹಿ ದಸಹಿ ಧಮ್ಮೇಹಿ ತಥಾಗತೋ ನಿಸ್ಸಟೋ ವಿಸಂಯುತ್ತೋ ವಿಪ್ಪಮುತ್ತೋ ವಿಮರಿಯಾದೀಕತೇನ ಚೇತಸಾ ವಿಹರತೀ’’ತಿ। ಪಠಮಂ।
‘‘Dasahi kho, vāhana, dhammehi tathāgato nissaṭo visaṃyutto vippamutto vimariyādīkatena cetasā viharati. Katamehi dasahi? Rūpena kho, vāhana, tathāgato nissaṭo visaṃyutto vippamutto vimariyādīkatena cetasā viharati, vedanāya kho, vāhana…pe… saññāya kho, vāhana… saṅkhārehi kho, vāhana… viññāṇena kho, vāhana… jātiyā kho, vāhana… jarāya kho, vāhana… maraṇena kho, vāhana… dukkhehi kho, vāhana… kilesehi kho, vāhana, tathāgato nissaṭo visaṃyutto vippamutto vimariyādīkatena cetasā viharati. Seyyathāpi, vāhana, uppalaṃ vā padumaṃ vā puṇḍarīkaṃ vā udake jātaṃ udake saṃvaḍḍhaṃ udakā paccuggamma ṭhitaṃ anupalittaṃ udakena; evamevaṃ kho, vāhana, imehi dasahi dhammehi tathāgato nissaṭo visaṃyutto vippamutto vimariyādīkatena cetasā viharatī’’ti. Paṭhamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧-೩. ವಾಹನಸುತ್ತಾದಿವಣ್ಣನಾ • 1-3. Vāhanasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೮. ವಾಹನಸುತ್ತಾದಿವಣ್ಣನಾ • 1-8. Vāhanasuttādivaṇṇanā
