| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৫. ৰজিরূপমসুত্তৰণ্ণনা
5. Vajirūpamasuttavaṇṇanā
২৫. পঞ্চমে অরুকূপমচিত্তোতি পুরাণৰণসদিসচিত্তো। ৰিজ্জূপমচিত্তোতি ইত্তরকালোভাসনেন ৰিজ্জুসদিসচিত্তো। ৰজিরূপমচিত্তোতি কিলেসানং মূলঘাতকরণসমত্থতায ৰজিরেন সদিসচিত্তো। অভিসজ্জতীতি লগ্গতি। কুপ্পতীতি কোপৰসেন কুপ্পতি। ব্যাপজ্জতীতি পকতিভাৰং পজহতি, পূতিকো হোতি। পতিত্থীযতীতি থিনভাৰং থদ্ধভাৰং আপজ্জতি। কোপন্তি দুব্বলকোধং। দোসন্তি দুস্সনৰসেন ততো বলৰতরং। অপ্পচ্চযন্তি অতুট্ঠাকারং দোমনস্সং। দুট্ঠারুকোতি পুরাণৰণো। কট্ঠেনাতি দণ্ডককোটিযা। কঠলেনাতি কপালেন। আসৰং দেতীতি অপরাপরং সৰতি। পুরাণৰণো হি অত্তনো ধম্মতাযেৰ পুব্বং লোহিতং যূসন্তি ইমানি তীণি সৰতি, ঘট্টিতো পন তানি অধিকতরং সৰতি।
25. Pañcame arukūpamacittoti purāṇavaṇasadisacitto. Vijjūpamacittoti ittarakālobhāsanena vijjusadisacitto. Vajirūpamacittoti kilesānaṃ mūlaghātakaraṇasamatthatāya vajirena sadisacitto. Abhisajjatīti laggati. Kuppatīti kopavasena kuppati. Byāpajjatīti pakatibhāvaṃ pajahati, pūtiko hoti. Patitthīyatīti thinabhāvaṃ thaddhabhāvaṃ āpajjati. Kopanti dubbalakodhaṃ. Dosanti dussanavasena tato balavataraṃ. Appaccayanti atuṭṭhākāraṃ domanassaṃ. Duṭṭhārukoti purāṇavaṇo. Kaṭṭhenāti daṇḍakakoṭiyā. Kaṭhalenāti kapālena. Āsavaṃ detīti aparāparaṃ savati. Purāṇavaṇo hi attano dhammatāyeva pubbaṃ lohitaṃ yūsanti imāni tīṇi savati, ghaṭṭito pana tāni adhikataraṃ savati.
এৰমেৰ খোতি এত্থ ইদং ওপম্মসংসন্দনং – দুট্ঠারুকো ৰিয হি কোধনপুগ্গলো, তস্স অত্তনো ধম্মতায সৰনং ৰিয কোধনস্সপি অত্তনো ধম্মতায উদ্ধুমাতস্স ৰিয চণ্ডিকতস্স চরণং, কট্ঠেন ৰা কঠলায ৰা ঘট্টনং ৰিয অপ্পমত্তং ৰচনং, ভিয্যোসোমত্তায সৰনং ৰিয ‘‘মাদিসং নাম এস এৰং ৰদতী’’তি ভিয্যোসোমত্তায উদ্ধুমাযনভাৰো দট্ঠব্বো।
Evamevakhoti ettha idaṃ opammasaṃsandanaṃ – duṭṭhāruko viya hi kodhanapuggalo, tassa attano dhammatāya savanaṃ viya kodhanassapi attano dhammatāya uddhumātassa viya caṇḍikatassa caraṇaṃ, kaṭṭhena vā kaṭhalāya vā ghaṭṭanaṃ viya appamattaṃ vacanaṃ, bhiyyosomattāya savanaṃ viya ‘‘mādisaṃ nāma esa evaṃ vadatī’’ti bhiyyosomattāya uddhumāyanabhāvo daṭṭhabbo.
রত্তন্ধকারতিমিসাযন্তি রত্তিং চক্খুৰিঞ্ঞাণুপ্পত্তিনিৰারণেন অন্ধভাৰকরণে বহলতমে। ৰিজ্জন্তরিকাযাতি ৰিজ্জুপ্পত্তিক্খণে। ইধাপি ইদং ওপম্মসংসন্দনং – চক্খুমা পুরিসো ৰিয হি যোগাৰচরো দট্ঠব্বো, অন্ধকারং ৰিয সোতাপত্তিমগ্গৰজ্ঝা কিলেসা, ৰিজ্জুসঞ্চরণং ৰিয সোতাপত্তিমগ্গঞাণস্স উপ্পত্তিকালো, ৰিজ্জন্তরিকায চক্খুমতো পুরিসস্স সমন্তা রূপদস্সনং ৰিয সোতাপত্তিমগ্গক্খণে নিব্বানদস্সনং, পুন অন্ধকারাৰত্থরণং ৰিয সকদাগামিমগ্গৰজ্ঝা কিলেসা, পুন ৰিজ্জুসঞ্চরণং ৰিয সকদাগামিমগ্গঞাণস্স উপ্পাদো, ৰিজ্জন্তরিকায চক্খুমতো পুরিসস্স সমন্তা রূপদস্সনং ৰিয সকদাগামিমগ্গক্খণে নিব্বানদস্সনং, পুন অন্ধকারাৰত্থরণং ৰিয অনাগামিমগ্গৰজ্ঝা কিলেসা, পুন ৰিজ্জুসঞ্চরণং ৰিয অনাগামিমগ্গঞাণস্স উপ্পাদো, ৰিজ্জন্তরিকায চক্খুমতো পুরিসস্স সমন্তা রূপদস্সনং ৰিয অনাগামিমগ্গক্খণে নিব্বানদস্সনং ৰেদিতব্বং।
Rattandhakāratimisāyanti rattiṃ cakkhuviññāṇuppattinivāraṇena andhabhāvakaraṇe bahalatame. Vijjantarikāyāti vijjuppattikkhaṇe. Idhāpi idaṃ opammasaṃsandanaṃ – cakkhumā puriso viya hi yogāvacaro daṭṭhabbo, andhakāraṃ viya sotāpattimaggavajjhā kilesā, vijjusañcaraṇaṃ viya sotāpattimaggañāṇassa uppattikālo, vijjantarikāya cakkhumato purisassa samantā rūpadassanaṃ viya sotāpattimaggakkhaṇe nibbānadassanaṃ, puna andhakārāvattharaṇaṃ viya sakadāgāmimaggavajjhā kilesā, puna vijjusañcaraṇaṃ viya sakadāgāmimaggañāṇassa uppādo, vijjantarikāya cakkhumato purisassa samantā rūpadassanaṃ viya sakadāgāmimaggakkhaṇe nibbānadassanaṃ, puna andhakārāvattharaṇaṃ viya anāgāmimaggavajjhā kilesā, puna vijjusañcaraṇaṃ viya anāgāmimaggañāṇassa uppādo, vijjantarikāya cakkhumato purisassa samantā rūpadassanaṃ viya anāgāmimaggakkhaṇe nibbānadassanaṃ veditabbaṃ.
ৰজিরূপমচিত্ততাযপি ইদং ওপম্মসংসন্দনং – ৰজিরং ৰিয হি অরহত্তমগ্গঞাণং দট্ঠব্বং, মণিগণ্ঠিপাসাণগণ্ঠি ৰিয অরহত্তমগ্গৰজ্ঝা কিলেসা, ৰজিরস্স মণিগণ্ঠিম্পি ৰা পাসাণগণ্ঠিম্পি ৰা ৰিনিৰিজ্ঝিত্ৰা অগমনভাৰস্স নত্থিতা ৰিয অরহত্তমগ্গঞাণেন অচ্ছেজ্জানং কিলেসানং নত্থিভাৰো, ৰজিরেন নিব্বিদ্ধৰেধস্স পুন অপতিপূরণং ৰিয অরহত্তমগ্গেন ছিন্নানং কিলেসানং পুন অনুপ্পাদো দট্ঠব্বোতি।
Vajirūpamacittatāyapi idaṃ opammasaṃsandanaṃ – vajiraṃ viya hi arahattamaggañāṇaṃ daṭṭhabbaṃ, maṇigaṇṭhipāsāṇagaṇṭhi viya arahattamaggavajjhā kilesā, vajirassa maṇigaṇṭhimpi vā pāsāṇagaṇṭhimpi vā vinivijjhitvā agamanabhāvassa natthitā viya arahattamaggañāṇena acchejjānaṃ kilesānaṃ natthibhāvo, vajirena nibbiddhavedhassa puna apatipūraṇaṃ viya arahattamaggena chinnānaṃ kilesānaṃ puna anuppādo daṭṭhabboti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৫. ৰজিরূপমসুত্তং • 5. Vajirūpamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫. ৰজিরূপমসুত্তৰণ্ণনা • 5. Vajirūpamasuttavaṇṇanā
