| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
139. வஜ்ஜனீயபுக்³க³லஸந்த³ஸ்ஸனா
139. Vajjanīyapuggalasandassanā
233. ந, பி⁴க்க²வே, பி⁴க்கு²னியா நிஸின்னபரிஸாய பவாரேதப்³ப³ங். யோ பவாரெய்ய, ஆபத்தி து³க்கடஸ்ஸ. ந, பி⁴க்க²வே, ஸிக்க²மானாய…பே॰… ந ஸாமணேரஸ்ஸ…பே॰… ந ஸாமணேரியா…பே॰… ந ஸிக்க²ங் பச்சக்கா²தகஸ்ஸ…பே॰… ந அந்திமவத்து²ங் அஜ்ஜா²பன்னகஸ்ஸ நிஸின்னபரிஸாய பவாரேதப்³ப³ங். யோ பவாரெய்ய, ஆபத்தி து³க்கடஸ்ஸ .
233. Na, bhikkhave, bhikkhuniyā nisinnaparisāya pavāretabbaṃ. Yo pavāreyya, āpatti dukkaṭassa. Na, bhikkhave, sikkhamānāya…pe… na sāmaṇerassa…pe… na sāmaṇeriyā…pe… na sikkhaṃ paccakkhātakassa…pe… na antimavatthuṃ ajjhāpannakassa nisinnaparisāya pavāretabbaṃ. Yo pavāreyya, āpatti dukkaṭassa .
ந ஆபத்தியா அத³ஸ்ஸனே உக்கி²த்தகஸ்ஸ நிஸின்னபரிஸாய பவாரேதப்³ப³ங். யோ பவாரெய்ய, யதா²த⁴ம்மோ காரேதப்³போ³. ந ஆபத்தியா அப்படிகம்மே உக்கி²த்தகஸ்ஸ…பே॰… ந பாபிகாய தி³ட்டி²யா அப்படினிஸ்ஸக்³கே³ உக்கி²த்தகஸ்ஸ நிஸின்னபரிஸாய பவாரேதப்³ப³ங். யோ பவாரெய்ய, யதா²த⁴ம்மோ காரேதப்³போ³.
Na āpattiyā adassane ukkhittakassa nisinnaparisāya pavāretabbaṃ. Yo pavāreyya, yathādhammo kāretabbo. Na āpattiyā appaṭikamme ukkhittakassa…pe… na pāpikāya diṭṭhiyā appaṭinissagge ukkhittakassa nisinnaparisāya pavāretabbaṃ. Yo pavāreyya, yathādhammo kāretabbo.
ந பண்ட³கஸ்ஸ நிஸின்னபரிஸாய பவாரேதப்³ப³ங். யோ பவாரெய்ய, ஆபத்தி து³க்கடஸ்ஸ. ந தெ²ய்யஸங்வாஸகஸ்ஸ…பே॰… ந தித்தி²யபக்கந்தகஸ்ஸ…பே॰… ந திரச்சா²னக³தஸ்ஸ…பே॰… ந மாதுகா⁴தகஸ்ஸ…பே॰… ந பிதுகா⁴தகஸ்ஸ…பே॰… ந அரஹந்தகா⁴தகஸ்ஸ…பே॰… ந பி⁴க்கு²னிதூ³ஸகஸ்ஸ …பே॰… ந ஸங்க⁴பே⁴த³கஸ்ஸ…பே॰… ந லோஹிதுப்பாத³கஸ்ஸ …பே॰… ந உப⁴தொப்³யஞ்ஜனகஸ்ஸ நிஸின்னபரிஸாய பவாரேதப்³ப³ங். யோ பவாரெய்ய, ஆபத்தி து³க்கடஸ்ஸ.
Na paṇḍakassa nisinnaparisāya pavāretabbaṃ. Yo pavāreyya, āpatti dukkaṭassa. Na theyyasaṃvāsakassa…pe… na titthiyapakkantakassa…pe… na tiracchānagatassa…pe… na mātughātakassa…pe… na pitughātakassa…pe… na arahantaghātakassa…pe… na bhikkhunidūsakassa …pe… na saṅghabhedakassa…pe… na lohituppādakassa …pe… na ubhatobyañjanakassa nisinnaparisāya pavāretabbaṃ. Yo pavāreyya, āpatti dukkaṭassa.
ந, பி⁴க்க²வே, பாரிவாஸிகபவாரணாதா³னேன பவாரேதப்³ப³ங், அஞ்ஞத்ர அவுட்டி²தாய பரிஸாய. ந ச, பி⁴க்க²வே, அப்பவாரணாய பவாரேதப்³ப³ங், அஞ்ஞத்ர ஸங்க⁴ஸாமக்³கி³யாதி.
Na, bhikkhave, pārivāsikapavāraṇādānena pavāretabbaṃ, aññatra avuṭṭhitāya parisāya. Na ca, bhikkhave, appavāraṇāya pavāretabbaṃ, aññatra saṅghasāmaggiyāti.
வஜ்ஜனீயபுக்³க³லஸந்த³ஸ்ஸனா நிட்டி²தா.
Vajjanīyapuggalasandassanā niṭṭhitā.
து³தியபா⁴ணவாரோ நிட்டி²தோ.
Dutiyabhāṇavāro niṭṭhito.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அனாபத்திபன்னரஸகாதி³கதா² • Anāpattipannarasakādikathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 121. பவாரணாபே⁴த³கதா² • 121. Pavāraṇābhedakathā
