| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১৩৯. ৰজ্জনীযপুগ্গলসন্দস্সনা
139. Vajjanīyapuggalasandassanā
২৩৩. ন, ভিক্খৰে, ভিক্খুনিযা নিসিন্নপরিসায পৰারেতব্বং। যো পৰারেয্য, আপত্তি দুক্কটস্স। ন, ভিক্খৰে, সিক্খমানায…পে॰… ন সামণেরস্স…পে॰… ন সামণেরিযা…পে॰… ন সিক্খং পচ্চক্খাতকস্স…পে॰… ন অন্তিমৰত্থুং অজ্ঝাপন্নকস্স নিসিন্নপরিসায পৰারেতব্বং। যো পৰারেয্য, আপত্তি দুক্কটস্স ।
233. Na, bhikkhave, bhikkhuniyā nisinnaparisāya pavāretabbaṃ. Yo pavāreyya, āpatti dukkaṭassa. Na, bhikkhave, sikkhamānāya…pe… na sāmaṇerassa…pe… na sāmaṇeriyā…pe… na sikkhaṃ paccakkhātakassa…pe… na antimavatthuṃ ajjhāpannakassa nisinnaparisāya pavāretabbaṃ. Yo pavāreyya, āpatti dukkaṭassa .
ন আপত্তিযা অদস্সনে উক্খিত্তকস্স নিসিন্নপরিসায পৰারেতব্বং। যো পৰারেয্য, যথাধম্মো কারেতব্বো। ন আপত্তিযা অপ্পটিকম্মে উক্খিত্তকস্স…পে॰… ন পাপিকায দিট্ঠিযা অপ্পটিনিস্সগ্গে উক্খিত্তকস্স নিসিন্নপরিসায পৰারেতব্বং। যো পৰারেয্য, যথাধম্মো কারেতব্বো।
Na āpattiyā adassane ukkhittakassa nisinnaparisāya pavāretabbaṃ. Yo pavāreyya, yathādhammo kāretabbo. Na āpattiyā appaṭikamme ukkhittakassa…pe… na pāpikāya diṭṭhiyā appaṭinissagge ukkhittakassa nisinnaparisāya pavāretabbaṃ. Yo pavāreyya, yathādhammo kāretabbo.
ন পণ্ডকস্স নিসিন্নপরিসায পৰারেতব্বং। যো পৰারেয্য, আপত্তি দুক্কটস্স। ন থেয্যসংৰাসকস্স…পে॰… ন তিত্থিযপক্কন্তকস্স…পে॰… ন তিরচ্ছানগতস্স…পে॰… ন মাতুঘাতকস্স…পে॰… ন পিতুঘাতকস্স…পে॰… ন অরহন্তঘাতকস্স…পে॰… ন ভিক্খুনিদূসকস্স …পে॰… ন সঙ্ঘভেদকস্স…পে॰… ন লোহিতুপ্পাদকস্স …পে॰… ন উভতোব্যঞ্জনকস্স নিসিন্নপরিসায পৰারেতব্বং। যো পৰারেয্য, আপত্তি দুক্কটস্স।
Na paṇḍakassa nisinnaparisāya pavāretabbaṃ. Yo pavāreyya, āpatti dukkaṭassa. Na theyyasaṃvāsakassa…pe… na titthiyapakkantakassa…pe… na tiracchānagatassa…pe… na mātughātakassa…pe… na pitughātakassa…pe… na arahantaghātakassa…pe… na bhikkhunidūsakassa …pe… na saṅghabhedakassa…pe… na lohituppādakassa …pe… na ubhatobyañjanakassa nisinnaparisāya pavāretabbaṃ. Yo pavāreyya, āpatti dukkaṭassa.
ন, ভিক্খৰে, পারিৰাসিকপৰারণাদানেন পৰারেতব্বং, অঞ্ঞত্র অৰুট্ঠিতায পরিসায। ন চ, ভিক্খৰে, অপ্পৰারণায পৰারেতব্বং, অঞ্ঞত্র সঙ্ঘসামগ্গিযাতি।
Na, bhikkhave, pārivāsikapavāraṇādānena pavāretabbaṃ, aññatra avuṭṭhitāya parisāya. Na ca, bhikkhave, appavāraṇāya pavāretabbaṃ, aññatra saṅghasāmaggiyāti.
ৰজ্জনীযপুগ্গলসন্দস্সনা নিট্ঠিতা।
Vajjanīyapuggalasandassanā niṭṭhitā.
দুতিযভাণৰারো নিট্ঠিতো।
Dutiyabhāṇavāro niṭṭhito.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অনাপত্তিপন্নরসকাদিকথা • Anāpattipannarasakādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১২১. পৰারণাভেদকথা • 121. Pavāraṇābhedakathā
