| Library / Tipiṭaka / तिपिटक • Tipiṭaka / महावग्गपाळि • Mahāvaggapāḷi |
१३९. वज्जनीयपुग्गलसन्दस्सना
139. Vajjanīyapuggalasandassanā
२३३. न, भिक्खवे, भिक्खुनिया निसिन्नपरिसाय पवारेतब्बं। यो पवारेय्य, आपत्ति दुक्कटस्स। न, भिक्खवे, सिक्खमानाय…पे॰… न सामणेरस्स…पे॰… न सामणेरिया…पे॰… न सिक्खं पच्चक्खातकस्स…पे॰… न अन्तिमवत्थुं अज्झापन्नकस्स निसिन्नपरिसाय पवारेतब्बं। यो पवारेय्य, आपत्ति दुक्कटस्स ।
233. Na, bhikkhave, bhikkhuniyā nisinnaparisāya pavāretabbaṃ. Yo pavāreyya, āpatti dukkaṭassa. Na, bhikkhave, sikkhamānāya…pe… na sāmaṇerassa…pe… na sāmaṇeriyā…pe… na sikkhaṃ paccakkhātakassa…pe… na antimavatthuṃ ajjhāpannakassa nisinnaparisāya pavāretabbaṃ. Yo pavāreyya, āpatti dukkaṭassa .
न आपत्तिया अदस्सने उक्खित्तकस्स निसिन्नपरिसाय पवारेतब्बं। यो पवारेय्य, यथाधम्मो कारेतब्बो। न आपत्तिया अप्पटिकम्मे उक्खित्तकस्स…पे॰… न पापिकाय दिट्ठिया अप्पटिनिस्सग्गे उक्खित्तकस्स निसिन्नपरिसाय पवारेतब्बं। यो पवारेय्य, यथाधम्मो कारेतब्बो।
Na āpattiyā adassane ukkhittakassa nisinnaparisāya pavāretabbaṃ. Yo pavāreyya, yathādhammo kāretabbo. Na āpattiyā appaṭikamme ukkhittakassa…pe… na pāpikāya diṭṭhiyā appaṭinissagge ukkhittakassa nisinnaparisāya pavāretabbaṃ. Yo pavāreyya, yathādhammo kāretabbo.
न पण्डकस्स निसिन्नपरिसाय पवारेतब्बं। यो पवारेय्य, आपत्ति दुक्कटस्स। न थेय्यसंवासकस्स…पे॰… न तित्थियपक्कन्तकस्स…पे॰… न तिरच्छानगतस्स…पे॰… न मातुघातकस्स…पे॰… न पितुघातकस्स…पे॰… न अरहन्तघातकस्स…पे॰… न भिक्खुनिदूसकस्स …पे॰… न सङ्घभेदकस्स…पे॰… न लोहितुप्पादकस्स …पे॰… न उभतोब्यञ्जनकस्स निसिन्नपरिसाय पवारेतब्बं। यो पवारेय्य, आपत्ति दुक्कटस्स।
Na paṇḍakassa nisinnaparisāya pavāretabbaṃ. Yo pavāreyya, āpatti dukkaṭassa. Na theyyasaṃvāsakassa…pe… na titthiyapakkantakassa…pe… na tiracchānagatassa…pe… na mātughātakassa…pe… na pitughātakassa…pe… na arahantaghātakassa…pe… na bhikkhunidūsakassa …pe… na saṅghabhedakassa…pe… na lohituppādakassa …pe… na ubhatobyañjanakassa nisinnaparisāya pavāretabbaṃ. Yo pavāreyya, āpatti dukkaṭassa.
न, भिक्खवे, पारिवासिकपवारणादानेन पवारेतब्बं, अञ्ञत्र अवुट्ठिताय परिसाय। न च, भिक्खवे, अप्पवारणाय पवारेतब्बं, अञ्ञत्र सङ्घसामग्गियाति।
Na, bhikkhave, pārivāsikapavāraṇādānena pavāretabbaṃ, aññatra avuṭṭhitāya parisāya. Na ca, bhikkhave, appavāraṇāya pavāretabbaṃ, aññatra saṅghasāmaggiyāti.
वज्जनीयपुग्गलसन्दस्सना निट्ठिता।
Vajjanīyapuggalasandassanā niṭṭhitā.
दुतियभाणवारो निट्ठितो।
Dutiyabhāṇavāro niṭṭhito.
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / अनापत्तिपन्नरसकादिकथा • Anāpattipannarasakādikathā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १२१. पवारणाभेदकथा • 121. Pavāraṇābhedakathā
