| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
105. වජ්‌ජනීයපුග්‌ගලසන්‌දස්‌සනා
105. Vajjanīyapuggalasandassanā
183. න, භික්‌ඛවෙ, භික්‌ඛුනියා නිසින්‌නපරිසාය පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, ආපත්‌ති දුක්‌කටස්‌ස. න සික්‌ඛමානාය…පෙ.… න සාමණෙරස්‌ස …පෙ.… න සාමණෙරියා…පෙ.… න සික්‌ඛාපච්‌චක්‌ඛාතකස්‌ස…පෙ.… න අන්‌තිමවත්‌ථුං අජ්‌ඣාපන්‌නකස්‌ස නිසින්‌නපරිසාය පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, ආපත්‌ති දුක්‌කටස්‌ස.
183. Na, bhikkhave, bhikkhuniyā nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa. Na sikkhamānāya…pe… na sāmaṇerassa …pe… na sāmaṇeriyā…pe… na sikkhāpaccakkhātakassa…pe… na antimavatthuṃ ajjhāpannakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa.
න ආපත්‌තියා අදස්‌සනෙ උක්‌ඛිත්‌තකස්‌ස නිසින්‌නපරිසාය පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, යථාධම්‌මො කාරෙතබ්‌බො. න ආපත්‌තියා අප්‌පටිකම්‌මෙ උක්‌ඛිත්‌තකස්‌ස නිසින්‌නපරිසාය…පෙ.… න පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිත්‌තකස්‌ස නිසින්‌නපරිසාය පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, යථාධම්‌මො කාරෙතබ්‌බො.
Na āpattiyā adassane ukkhittakassa nisinnaparisāya pātimokkhaṃ uddisitabbaṃ. Yo uddiseyya, yathādhammo kāretabbo. Na āpattiyā appaṭikamme ukkhittakassa nisinnaparisāya…pe… na pāpikāya diṭṭhiyā appaṭinissagge ukkhittakassa nisinnaparisāya pātimokkhaṃ uddisitabbaṃ. Yo uddiseyya, yathādhammo kāretabbo.
න පණ්‌ඩකස්‌ස නිසින්‌නපරිසාය පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, ආපත්‌ති දුක්‌කටස්‌ස. න ථෙය්‍යසංවාසකස්‌ස…පෙ.… න තිත්‌ථියපක්‌කන්‌තකස්‌ස…පෙ.… න තිරච්‌ඡානගතස්‌ස…පෙ.… න මාතුඝාතකස්‌ස…පෙ.… න පිතුඝාතකස්‌ස…පෙ.… න අරහන්‌තඝාතකස්‌ස…පෙ.… න භික්‌ඛුනිදූසකස්‌ස…පෙ.… න සඞ්‌ඝභෙදකස්‌ස…පෙ.… න ලොහිතුප්‌පාදකස්‌ස…පෙ.… න උභතොබ්‍යඤ්‌ජනකස්‌ස නිසින්‌නපරිසාය පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, ආපත්‌ති දුක්‌කටස්‌ස.
Na paṇḍakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa. Na theyyasaṃvāsakassa…pe… na titthiyapakkantakassa…pe… na tiracchānagatassa…pe… na mātughātakassa…pe… na pitughātakassa…pe… na arahantaghātakassa…pe… na bhikkhunidūsakassa…pe… na saṅghabhedakassa…pe… na lohituppādakassa…pe… na ubhatobyañjanakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa.
න, භික්‌ඛවෙ, පාරිවාසිකපාරිසුද්‌ධිදානෙන උපොසථො කාතබ්‌බො, අඤ්‌ඤත්‍ර අවුට්‌ඨිතාය පරිසාය. න ච, භික්‌ඛවෙ, අනුපොසථෙ උපොසථො කාතබ්‌බො, අඤ්‌ඤත්‍ර සඞ්‌ඝසාමග්‌ගියාති.
Na, bhikkhave, pārivāsikapārisuddhidānena uposatho kātabbo, aññatra avuṭṭhitāya parisāya. Na ca, bhikkhave, anuposathe uposatho kātabbo, aññatra saṅghasāmaggiyāti.
වජ්‌ජනීයපුග්‌ගලසන්‌දස්‌සනා නිට්‌ඨිතා.
Vajjanīyapuggalasandassanā niṭṭhitā.
තතියභාණවාරො නිට්‌ඨිතො.
Tatiyabhāṇavāro niṭṭhito.
උපොසථක්‌ඛන්‌ධකො දුතියො.
Uposathakkhandhako dutiyo.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / වජ්‌ජනීයපුග්‌ගලසන්‌දස්‌සනකථා • Vajjanīyapuggalasandassanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / වජ්‌ජනීයපුග්‌ගලසන්‌දස්‌සනකථාවණ්‌ණනා • Vajjanīyapuggalasandassanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / වජ්‌ජනීයපුග්‌ගලසන්‌දස්‌සනකථාවණ්‌ණනා • Vajjanīyapuggalasandassanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ලිඞ්‌ගාදිදස්‌සනකථාදිවණ්‌ණනා • Liṅgādidassanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 105. වජ්‌ජනීයපුග්‌ගලසන්‌දස්‌සනකථා • 105. Vajjanīyapuggalasandassanakathā
