| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༠༥. ཝཛྫནཱིཡཔུགྒལསནྡསྶནཱ
105. Vajjanīyapuggalasandassanā
༡༨༣. ན, བྷིཀྑཝེ, བྷིཀྑུནིཡཱ ནིསིནྣཔརིསཱཡ པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཨཱཔཏྟི དུཀྐཊསྶ། ན སིཀྑམཱནཱཡ…པེ॰… ན སཱམཎེརསྶ …པེ॰… ན སཱམཎེརིཡཱ…པེ॰… ན སིཀྑཱཔཙྩཀྑཱཏཀསྶ…པེ॰… ན ཨནྟིམཝཏྠུཾ ཨཛ྄ཛྷཱཔནྣཀསྶ ནིསིནྣཔརིསཱཡ པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཨཱཔཏྟི དུཀྐཊསྶ།
183. Na, bhikkhave, bhikkhuniyā nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa. Na sikkhamānāya…pe… na sāmaṇerassa …pe… na sāmaṇeriyā…pe… na sikkhāpaccakkhātakassa…pe… na antimavatthuṃ ajjhāpannakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa.
ན ཨཱཔཏྟིཡཱ ཨདསྶནེ ཨུཀྑིཏྟཀསྶ ནིསིནྣཔརིསཱཡ པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཡཐཱདྷམྨོ ཀཱརེཏབྦོ། ན ཨཱཔཏྟིཡཱ ཨཔྤཊིཀམྨེ ཨུཀྑིཏྟཀསྶ ནིསིནྣཔརིསཱཡ…པེ॰… ན པཱཔིཀཱཡ དིཊྛིཡཱ ཨཔྤཊིནིསྶགྒེ ཨུཀྑིཏྟཀསྶ ནིསིནྣཔརིསཱཡ པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཡཐཱདྷམྨོ ཀཱརེཏབྦོ།
Na āpattiyā adassane ukkhittakassa nisinnaparisāya pātimokkhaṃ uddisitabbaṃ. Yo uddiseyya, yathādhammo kāretabbo. Na āpattiyā appaṭikamme ukkhittakassa nisinnaparisāya…pe… na pāpikāya diṭṭhiyā appaṭinissagge ukkhittakassa nisinnaparisāya pātimokkhaṃ uddisitabbaṃ. Yo uddiseyya, yathādhammo kāretabbo.
ན པཎྜཀསྶ ནིསིནྣཔརིསཱཡ པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཨཱཔཏྟི དུཀྐཊསྶ། ན ཐེཡྻསཾཝཱསཀསྶ…པེ॰… ན ཏིཏྠིཡཔཀྐནྟཀསྶ…པེ॰… ན ཏིརཙྪཱནགཏསྶ…པེ॰… ན མཱཏུགྷཱཏཀསྶ…པེ॰… ན པིཏུགྷཱཏཀསྶ…པེ॰… ན ཨརཧནྟགྷཱཏཀསྶ…པེ॰… ན བྷིཀྑུནིདཱུསཀསྶ…པེ॰… ན སངྒྷབྷེདཀསྶ…པེ॰… ན ལོཧིཏུཔྤཱདཀསྶ…པེ॰… ན ཨུབྷཏོབྱཉྫནཀསྶ ནིསིནྣཔརིསཱཡ པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཨཱཔཏྟི དུཀྐཊསྶ།
Na paṇḍakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa. Na theyyasaṃvāsakassa…pe… na titthiyapakkantakassa…pe… na tiracchānagatassa…pe… na mātughātakassa…pe… na pitughātakassa…pe… na arahantaghātakassa…pe… na bhikkhunidūsakassa…pe… na saṅghabhedakassa…pe… na lohituppādakassa…pe… na ubhatobyañjanakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa.
ན, བྷིཀྑཝེ, པཱརིཝཱསིཀཔཱརིསུདྡྷིདཱནེན ཨུཔོསཐོ ཀཱཏབྦོ, ཨཉྙཏྲ ཨཝུཊྛིཏཱཡ པརིསཱཡ། ན ཙ, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ, ཨཉྙཏྲ སངྒྷསཱམགྒིཡཱཏི།
Na, bhikkhave, pārivāsikapārisuddhidānena uposatho kātabbo, aññatra avuṭṭhitāya parisāya. Na ca, bhikkhave, anuposathe uposatho kātabbo, aññatra saṅghasāmaggiyāti.
ཝཛྫནཱིཡཔུགྒལསནྡསྶནཱ ནིཊྛིཏཱ།
Vajjanīyapuggalasandassanā niṭṭhitā.
ཏཏིཡབྷཱཎཝཱརོ ནིཊྛིཏོ།
Tatiyabhāṇavāro niṭṭhito.
ཨུཔོསཐཀྑནྡྷཀོ དུཏིཡོ།
Uposathakkhandhako dutiyo.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཝཛྫནཱིཡཔུགྒལསནྡསྶནཀཐཱ • Vajjanīyapuggalasandassanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཝཛྫནཱིཡཔུགྒལསནྡསྶནཀཐཱཝཎྞནཱ • Vajjanīyapuggalasandassanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཝཛྫནཱིཡཔུགྒལསནྡསྶནཀཐཱཝཎྞནཱ • Vajjanīyapuggalasandassanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ལིངྒཱདིདསྶནཀཐཱདིཝཎྞནཱ • Liṅgādidassanakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠༥. ཝཛྫནཱིཡཔུགྒལསནྡསྶནཀཐཱ • 105. Vajjanīyapuggalasandassanakathā
