| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
வஜ்ஜனீயபுக்³க³லஸந்த³ஸ்ஸனகதா²வண்ணனா
Vajjanīyapuggalasandassanakathāvaṇṇanā
183. ‘‘அந்திமவத்து²ங் அஜ்ஜா²பன்னஸ்ஸ நிஸின்னபரிஸாய கலஹாதி³ப⁴யேன நாஹங் கரிஸ்ஸாமீ’’தி சித்தங் உப்பாதெ³த்வா நிஸீதி³துங் வட்டதி. அஞ்ஞகம்மே தஸ்ஸ நிஸின்னபரிஸாய ஆபத்தி நத்தீ²தி ஏகே. ‘‘ந ச, பி⁴க்க²வே, அனுபோஸதே² உபோஸதோ² காதப்³போ³ அஞ்ஞத்ர ஸங்க⁴ஸாமக்³கி³யா’’தி (மஹாவ॰ 183) வசனதோ ஸாமக்³கீ³தி³வஸோ அனுபோஸத²தி³வஸோதி அத்த²தோ வுத்தங் விய தி³ஸ்ஸதி. ‘‘த்³வேமே, பி⁴க்க²வே, உபோஸதா²’’தி வுத்தவசனவஸேனேதங் வுத்தங், அஞ்ஞதா² பரிவாரபாளியா விருஜ்ஜ²தீதி ஆசரியா. சாதுத்³த³ஸியங், பன்னரஸியங் வா சே ஸங்கோ⁴ ஸமக்³கோ³ ஹோதி, ‘‘அஜ்ஜுபோஸதோ² ஸாமக்³கீ³’’தி அவத்வா பகதினீஹாரேனேவ கத்தப்³ப³ந்தி த³ஸ்ஸனத்த²ங் யதா²தே³ஸனா கதாதி நோ தக்கோ. அஞ்ஞதா² யதா²வுத்தத்³வயே சே ஸாமக்³கீ³ ஹோதி, தத்த² உபோஸத²ங் அகத்வா அனுபோஸத²தி³வஸே ஏவ ஸாமக்³கீ³உபோஸதோ² காதப்³போ³தி ஆபஜ்ஜதி. அஞ்ஞதா² புப்³பே³ படிஸித்³த⁴த்தா இதா³னி படிஸேத⁴னகிச்சங் நத்தி². ‘‘ந, பி⁴க்க²வே, தே³வஸிகங் பாதிமொக்க²ங் உத்³தி³ஸிதப்³ப³’’ந்தி (மஹாவ॰ 136) புப்³பே³ ஹி வுத்தங். அத² வா ‘‘அனுஜானாமி, பி⁴க்க²வே, உபோஸதே² பாதிமொக்க²ங் உத்³தி³ஸிது’’ந்தி புப்³பே³ வுத்தத்தா ‘‘ஸகிங் பக்க²ஸ்ஸ சாதுத்³த³ஸே வா பன்னரஸே வா’’தி ச ‘‘த்³வேமே, பி⁴க்க²வே, உபோஸதா²’’தி (மஹாவ॰ 149) ச பச்சா² வுத்தத்தா ததோ அஞ்ஞஸ்மிங் தி³வஸே உபோஸதோ² ந காதப்³போ³தி அத்த²தோ ஆபன்னங் அனிட்ட²ங், ஸதி ஸங்க⁴ஸாமக்³கி³யா அஞ்ஞோ தி³வஸோ பகதிவஸேன அனுபோஸதோ²பி உபோஸத²தி³வஸோ நாம ஹோதீதி த³ஸ்ஸனவஸேன நிவாரேதும்பி ஏவங்தே³ஸனா கதாதி வேதி³தப்³பா³.
183. ‘‘Antimavatthuṃ ajjhāpannassa nisinnaparisāya kalahādibhayena nāhaṃ karissāmī’’ti cittaṃ uppādetvā nisīdituṃ vaṭṭati. Aññakamme tassa nisinnaparisāya āpatti natthīti eke. ‘‘Na ca, bhikkhave, anuposathe uposatho kātabbo aññatra saṅghasāmaggiyā’’ti (mahāva. 183) vacanato sāmaggīdivaso anuposathadivasoti atthato vuttaṃ viya dissati. ‘‘Dveme, bhikkhave, uposathā’’ti vuttavacanavasenetaṃ vuttaṃ, aññathā parivārapāḷiyā virujjhatīti ācariyā. Cātuddasiyaṃ, pannarasiyaṃ vā ce saṅgho samaggo hoti, ‘‘ajjuposatho sāmaggī’’ti avatvā pakatinīhāreneva kattabbanti dassanatthaṃ yathādesanā katāti no takko. Aññathā yathāvuttadvaye ce sāmaggī hoti, tattha uposathaṃ akatvā anuposathadivase eva sāmaggīuposatho kātabboti āpajjati. Aññathā pubbe paṭisiddhattā idāni paṭisedhanakiccaṃ natthi. ‘‘Na, bhikkhave, devasikaṃ pātimokkhaṃ uddisitabba’’nti (mahāva. 136) pubbe hi vuttaṃ. Atha vā ‘‘anujānāmi, bhikkhave, uposathe pātimokkhaṃ uddisitu’’nti pubbe vuttattā ‘‘sakiṃ pakkhassa cātuddase vā pannarase vā’’ti ca ‘‘dveme, bhikkhave, uposathā’’ti (mahāva. 149) ca pacchā vuttattā tato aññasmiṃ divase uposatho na kātabboti atthato āpannaṃ aniṭṭhaṃ, sati saṅghasāmaggiyā añño divaso pakativasena anuposathopi uposathadivaso nāma hotīti dassanavasena nivāretumpi evaṃdesanā katāti veditabbā.
உபோஸத²க்க²ந்த⁴கவண்ணனா நிட்டி²தா.
Uposathakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 105. வஜ்ஜனீயபுக்³க³லஸந்த³ஸ்ஸனா • 105. Vajjanīyapuggalasandassanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / வஜ்ஜனீயபுக்³க³லஸந்த³ஸ்ஸனகதா² • Vajjanīyapuggalasandassanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வஜ்ஜனீயபுக்³க³லஸந்த³ஸ்ஸனகதா²வண்ணனா • Vajjanīyapuggalasandassanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / லிங்கா³தி³த³ஸ்ஸனகதா²தி³வண்ணனா • Liṅgādidassanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 105. வஜ்ஜனீயபுக்³க³லஸந்த³ஸ்ஸனகதா² • 105. Vajjanīyapuggalasandassanakathā
