| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
6. වජ්‌ජප්‌පටිච්‌ඡාදිකාසික්‌ඛාපදවණ්‌ණනා
6. Vajjappaṭicchādikāsikkhāpadavaṇṇanā
පාරාජිකං ධම්‌මං අජ්‌ඣාපන්‌නන්‌ති භික්‌ඛූහි සාධාරණානං චතුන්‌නං, අසාධාරණානං චතුන්‌නඤ්‌චාති අට්‌ඨන්‌නමඤ්‌ඤතරං අජ්‌ඣාපන්‌නං. ඉදඤ්‌ච පාරාජිකං (පාචි. අට්‌ඨ. 666) පච්‌ඡා පඤ්‌ඤත්‌තං, සඞ්‌ගීතිකාරකාචරියෙහි පන පුරිමෙන සද්‌ධිං යුගළං කත්‌වා ඉමස්‌මිං ඔකාසෙ ඨපිතන්‌ති වෙදිතබ්‌බං. ‘‘අට්‌ඨන්‌නං පාරාජිකානං අඤ්‌ඤතර’’න්‌ති (පාචි. 666) වචනතො පන වජ්‌ජප්‌පටිච්‌ඡාදිකං යා පටිච්‌ඡාදෙති, සාපි වජ්‌ජප්‌පටිච්‌ඡාදිකා එවාති දට්‌ඨබ්‌බං. කිඤ්‌චාපි වජ්‌ජප්‌පටිච්‌ඡාදනං පෙමවසෙන හොති, තථාපි සික්‌ඛාපදවීතික්‌කමචිත්‌තං දොමනස්‌සමෙව හොතීති කත්‌වා දුක්‌ඛවෙදනං හොතීති ‘‘තත්‍ර හි පාචිත්‌තියං…පෙ.… සෙසං තාදිසමෙවා’’ති වුත්‌තං.
Pārājikaṃ dhammaṃ ajjhāpannanti bhikkhūhi sādhāraṇānaṃ catunnaṃ, asādhāraṇānaṃ catunnañcāti aṭṭhannamaññataraṃ ajjhāpannaṃ. Idañca pārājikaṃ (pāci. aṭṭha. 666) pacchā paññattaṃ, saṅgītikārakācariyehi pana purimena saddhiṃ yugaḷaṃ katvā imasmiṃ okāse ṭhapitanti veditabbaṃ. ‘‘Aṭṭhannaṃ pārājikānaṃ aññatara’’nti (pāci. 666) vacanato pana vajjappaṭicchādikaṃ yā paṭicchādeti, sāpi vajjappaṭicchādikā evāti daṭṭhabbaṃ. Kiñcāpi vajjappaṭicchādanaṃ pemavasena hoti, tathāpi sikkhāpadavītikkamacittaṃ domanassameva hotīti katvā dukkhavedanaṃ hotīti ‘‘tatra hi pācittiyaṃ…pe… sesaṃ tādisamevā’’ti vuttaṃ.
වජ්‌ජප්‌පටිච්‌ඡාදිකාසික්‌ඛාපදවණ්‌ණනා නිට්‌ඨිතා.
Vajjappaṭicchādikāsikkhāpadavaṇṇanā niṭṭhitā.
