| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
॥ ਨਮੋ ਤਸ੍ਸ ਭਗવਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ॥
Namo tassa bhagavato arahato sammāsambuddhassa
ਅਙ੍ਗੁਤ੍ਤਰਨਿਕਾਯੇ
Aṅguttaranikāye
ਦੁਕਨਿਪਾਤ-ਅਟ੍ਠਕਥਾ
Dukanipāta-aṭṭhakathā
੧. ਪਠਮਪਣ੍ਣਾਸਕਂ
1. Paṭhamapaṇṇāsakaṃ
੧. ਕਮ੍ਮਕਾਰਣવਗ੍ਗੋ
1. Kammakāraṇavaggo
੧. વਜ੍ਜਸੁਤ੍ਤવਣ੍ਣਨਾ
1. Vajjasuttavaṇṇanā
੧. ਦੁਕਨਿਪਾਤਸ੍ਸ ਪਠਮੇ વਜ੍ਜਾਨੀਤਿ ਦੋਸਾ ਅਪਰਾਧਾ। ਦਿਟ੍ਠਧਮ੍ਮਿਕਨ੍ਤਿ ਦਿਟ੍ਠੇવ ਧਮ੍ਮੇ ਇਮਸ੍ਮਿਂਯੇવ ਅਤ੍ਤਭਾવੇ ਉਪ੍ਪਨ੍ਨਫਲਂ। ਸਮ੍ਪਰਾਯਿਕਨ੍ਤਿ ਸਮ੍ਪਰਾਯੇ ਅਨਾਗਤੇ ਅਤ੍ਤਭਾવੇ ਉਪ੍ਪਨ੍ਨਫਲਂ। ਆਗੁਚਾਰਿਨ੍ਤਿ ਪਾਪਕਾਰਿਂ ਅਪਰਾਧਕਾਰਕਂ। ਰਾਜਾਨੋ ਗਹੇਤ੍વਾ વਿવਿਧਾ ਕਮ੍ਮਕਾਰਣਾ ਕਾਰੇਨ੍ਤੇਤਿ ਚੋਰਂ ਗਹੇਤ੍વਾ વਿવਿਧਾ ਕਮ੍ਮਕਾਰਣਾ ਰਾਜਪੁਰਿਸਾ ਕਰੋਨ੍ਤਿ, ਰਾਜਾਨੋ ਪਨ ਤਾ ਕਾਰੇਨ੍ਤਿ ਨਾਮ। ਤਂ ਚੋਰਂ ਏવਂ ਕਮ੍ਮਕਾਰਣਾ ਕਾਰਿਯਮਾਨਂ ਏਸ ਪਸ੍ਸਤਿ। ਤੇਨ વੁਤ੍ਤਂ – ‘‘ਪਸ੍ਸਤਿ ਚੋਰਂ ਆਗੁਚਾਰਿਂ ਰਾਜਾਨੋ ਗਹੇਤ੍વਾ વਿવਿਧਾ ਕਮ੍ਮਕਾਰਣਾ ਕਾਰੇਨ੍ਤੇ’’ਤਿ। ਅਦ੍ਧਦਣ੍ਡਕੇਹੀਤਿ ਮੁਗ੍ਗਰੇਹਿ, ਪਹਾਰਸਾਧਨਤ੍ਥਂ વਾ ਚਤੁਹਤ੍ਥਦਣ੍ਡਂ ਦ੍વੇਧਾ ਛੇਤ੍વਾ ਗਹਿਤਦਣ੍ਡਕੇਹਿ। ਬਿਲਙ੍ਗਥਾਲਿਕਨ੍ਤਿ ਕਞ੍ਜਿਯਉਕ੍ਖਲਿਕਕਮ੍ਮਕਾਰਣਂ। ਤਂ ਕਰੋਨ੍ਤਾ ਸੀਸਕਟਾਹਂ ਉਪ੍ਪਾਟੇਤ੍વਾ ਤਤ੍ਤਂ ਅਯੋਗੁਲ਼ਂ ਸਣ੍ਡਾਸੇਨ ਗਹੇਤ੍વਾ ਤਤ੍ਥ ਪਕ੍ਖਿਪਨ੍ਤਿ, ਤੇਨ ਮਤ੍ਥਲੁਙ੍ਗਂ ਪਕ੍ਕੁਥਿਤ੍વਾ ਉਤ੍ਤਰਤਿ। ਸਙ੍ਖਮੁਣ੍ਡਿਕਨ੍ਤਿ ਸਙ੍ਖਮੁਣ੍ਡਕਮ੍ਮਕਾਰਣਂ। ਤਂ ਕਰੋਨ੍ਤਾ ਉਤ੍ਤਰੋਟ੍ਠਉਭਤੋਕਣ੍ਣਚੂਲ਼ਿਕਗਲવਾਟਕਪਰਿਚ੍ਛੇਦੇਨ ਚਮ੍ਮਂ ਛਿਨ੍ਦਿਤ੍વਾ ਸਬ੍ਬਕੇਸੇ ਏਕਤੋ ਗਣ੍ਠਿਂ ਕਤ੍વਾ ਦਣ੍ਡਕੇਨ વੇਠੇਤ੍વਾ ਉਪ੍ਪਾਟੇਨ੍ਤਿ, ਸਹ ਕੇਸੇਹਿ ਚਮ੍ਮਂ ਉਟ੍ਠਹਤਿ। ਤਤੋ ਸੀਸਕਟਾਹਂ ਥੂਲਸਕ੍ਖਰਾਹਿ ਘਂਸਿਤ੍વਾ ਧੋવਨ੍ਤਾ ਸਙ੍ਖવਣ੍ਣਂ ਕਰੋਨ੍ਤਿ। ਰਾਹੁਮੁਖਨ੍ਤਿ ਰਾਹੁਮੁਖਕਮ੍ਮਕਾਰਣਂ। ਤਂ ਕਰੋਨ੍ਤਾ ਸਙ੍ਕੁਨਾ ਮੁਖਂ વਿવਰਿਤ੍વਾ ਅਨ੍ਤੋਮੁਖੇ ਦੀਪਂ ਜਾਲੇਨ੍ਤਿ, ਕਣ੍ਣਚੂਲ਼ਿਕਾਹਿ વਾ ਪਟ੍ਠਾਯ ਮੁਖਂ ਨਿਖਾਦਨੇਨ ਖਨਨ੍ਤਿ, ਲੋਹਿਤਂ ਪਗ੍ਘਰਿਤ੍વਾ ਮੁਖਂ ਪੂਰੇਤਿ।
1. Dukanipātassa paṭhame vajjānīti dosā aparādhā. Diṭṭhadhammikanti diṭṭheva dhamme imasmiṃyeva attabhāve uppannaphalaṃ. Samparāyikanti samparāye anāgate attabhāve uppannaphalaṃ. Āgucārinti pāpakāriṃ aparādhakārakaṃ. Rājāno gahetvā vividhā kammakāraṇā kārenteti coraṃ gahetvā vividhā kammakāraṇā rājapurisā karonti, rājāno pana tā kārenti nāma. Taṃ coraṃ evaṃ kammakāraṇā kāriyamānaṃ esa passati. Tena vuttaṃ – ‘‘passati coraṃ āgucāriṃ rājāno gahetvā vividhā kammakāraṇā kārente’’ti. Addhadaṇḍakehīti muggarehi, pahārasādhanatthaṃ vā catuhatthadaṇḍaṃ dvedhā chetvā gahitadaṇḍakehi. Bilaṅgathālikanti kañjiyaukkhalikakammakāraṇaṃ. Taṃ karontā sīsakaṭāhaṃ uppāṭetvā tattaṃ ayoguḷaṃ saṇḍāsena gahetvā tattha pakkhipanti, tena matthaluṅgaṃ pakkuthitvā uttarati. Saṅkhamuṇḍikanti saṅkhamuṇḍakammakāraṇaṃ. Taṃ karontā uttaroṭṭhaubhatokaṇṇacūḷikagalavāṭakaparicchedena cammaṃ chinditvā sabbakese ekato gaṇṭhiṃ katvā daṇḍakena veṭhetvā uppāṭenti, saha kesehi cammaṃ uṭṭhahati. Tato sīsakaṭāhaṃ thūlasakkharāhi ghaṃsitvā dhovantā saṅkhavaṇṇaṃ karonti. Rāhumukhanti rāhumukhakammakāraṇaṃ. Taṃ karontā saṅkunā mukhaṃ vivaritvā antomukhe dīpaṃ jālenti, kaṇṇacūḷikāhi vā paṭṭhāya mukhaṃ nikhādanena khananti, lohitaṃ paggharitvā mukhaṃ pūreti.
ਜੋਤਿਮਾਲਿਕਨ੍ਤਿ ਸਕਲਸਰੀਰਂ ਤੇਲਪਿਲੋਤਿਕਾਯ વੇਠੇਤ੍વਾ ਆਲਿਮ੍ਪੇਨ੍ਤਿ। ਹਤ੍ਥਪਜ੍ਜੋਤਿਕਨ੍ਤਿ ਹਤ੍ਥੇ ਤੇਲਪਿਲੋਤਿਕਾਯ વੇਠੇਤ੍વਾ ਦੀਪਂ વਿਯ ਪਜ੍ਜਾਲੇਨ੍ਤਿ। ਏਰਕવਤ੍ਤਿਕਨ੍ਤਿ ਏਰਕવਤ੍ਤਕਮ੍ਮਕਾਰਣਂ। ਤਂ ਕਰੋਨ੍ਤਾ ਹੇਟ੍ਠਾਗੀવਤੋ ਪਟ੍ਠਾਯ ਚਮ੍ਮવਟ੍ਟੇ ਕਨ੍ਤਿਤ੍વਾ ਗੋਪ੍ਫਕੇ ਠਪੇਨ੍ਤਿ, ਅਥ ਨਂ ਯੋਤ੍ਤੇਹਿ ਬਨ੍ਧਿਤ੍વਾ ਕਡ੍ਢਨ੍ਤਿ। ਸੋ ਅਤ੍ਤਨੋ ਚਮ੍ਮવਟ੍ਟੇ ਅਕ੍ਕਮਿਤ੍વਾ ਅਕ੍ਕਮਿਤ੍વਾ ਪਤਤਿ। ਚੀਰਕવਾਸਿਕਨ੍ਤਿ ਚੀਰਕવਾਸਿਕਕਮ੍ਮਕਾਰਣਂ। ਤਂ ਕਰੋਨ੍ਤਾ ਤਥੇવ ਚਮ੍ਮવਟ੍ਟੇ ਕਨ੍ਤਿਤ੍વਾ ਕਟਿਯਂ ਠਪੇਨ੍ਤਿ, ਕਟਿਤੋ ਪਟ੍ਠਾਯ ਕਨ੍ਤਿਤ੍વਾ ਗੋਪ੍ਫਕੇਸੁ ਠਪੇਨ੍ਤਿ, ਉਪਰਿਮੇਹਿ ਹੇਟ੍ਠਿਮਸਰੀਰਂ ਚੀਰਕਨਿવਾਸਨਨਿવਤ੍ਥਂ વਿਯ ਹੋਤਿ। ਏਣੇਯ੍ਯਕਨ੍ਤਿ ਏਣੇਯ੍ਯਕਕਮ੍ਮਕਾਰਣਂ। ਤਂ ਕਰੋਨ੍ਤਾ ਉਭੋਸੁ ਕਪ੍ਪਰੇਸੁ ਚ ਉਭੋਸੁ ਜਾਣੁਕੇਸੁ ਚ ਅਯવਲਯਾਨਿ ਦਤ੍વਾ ਅਯਸੂਲਾਨਿ ਕੋਟ੍ਟੇਨ੍ਤਿ। ਸੋ ਚਤੂਹਿ ਅਯਸੂਲੇਹਿ ਭੂਮਿਯਂ ਪਤਿਟ੍ਠਹਤਿ। ਅਥ ਨਂ ਪਰਿવਾਰੇਤ੍વਾ ਅਗ੍ਗਿਂ ਕਰੋਨ੍ਤਿ। ‘‘ਏਣੇਯ੍ਯਕੋ ਜੋਤਿਪਰਿਗ੍ਗਹੋ ਯਥਾ’’ਤਿ ਆਗਤਟ੍ਠਾਨੇਪਿ ਇਦਮੇવ વੁਤ੍ਤਂ। ਤਂ ਕਾਲੇਨ ਕਾਲਂ ਸੂਲਾਨਿ ਅਪਨੇਤ੍વਾ ਚਤੂਹਿ ਅਟ੍ਠਿਕੋਟੀਹਿਯੇવ ਠਪੇਨ੍ਤਿ। ਏવਰੂਪਾ ਕਮ੍ਮਕਾਰਣਾ ਨਾਮ ਨਤ੍ਥਿ।
Jotimālikanti sakalasarīraṃ telapilotikāya veṭhetvā ālimpenti. Hatthapajjotikanti hatthe telapilotikāya veṭhetvā dīpaṃ viya pajjālenti. Erakavattikanti erakavattakammakāraṇaṃ. Taṃ karontā heṭṭhāgīvato paṭṭhāya cammavaṭṭe kantitvā gopphake ṭhapenti, atha naṃ yottehi bandhitvā kaḍḍhanti. So attano cammavaṭṭe akkamitvā akkamitvā patati. Cīrakavāsikanti cīrakavāsikakammakāraṇaṃ. Taṃ karontā tatheva cammavaṭṭe kantitvā kaṭiyaṃ ṭhapenti, kaṭito paṭṭhāya kantitvā gopphakesu ṭhapenti, uparimehi heṭṭhimasarīraṃ cīrakanivāsananivatthaṃ viya hoti. Eṇeyyakanti eṇeyyakakammakāraṇaṃ. Taṃ karontā ubhosu kapparesu ca ubhosu jāṇukesu ca ayavalayāni datvā ayasūlāni koṭṭenti. So catūhi ayasūlehi bhūmiyaṃ patiṭṭhahati. Atha naṃ parivāretvā aggiṃ karonti. ‘‘Eṇeyyako jotipariggaho yathā’’ti āgataṭṭhānepi idameva vuttaṃ. Taṃ kālena kālaṃ sūlāni apanetvā catūhi aṭṭhikoṭīhiyeva ṭhapenti. Evarūpā kammakāraṇā nāma natthi.
ਬਲ਼ਿਸਮਂਸਿਕਨ੍ਤਿ ਉਭਤੋਮੁਖੇਹਿ ਬਲ਼ਿਸੇਹਿ ਪਹਰਿਤ੍વਾ ਚਮ੍ਮਮਂਸਨ੍ਹਾਰੂਨਿ ਉਪ੍ਪਾਟੇਨ੍ਤਿ। ਕਹਾਪਣਿਕਨ੍ਤਿ ਸਕਲਸਰੀਰਂ ਤਿਣ੍ਹਾਹਿ વਾਸੀਹਿ ਕੋਟਿਤੋ ਪਟ੍ਠਾਯ ਕਹਾਪਣਮਤ੍ਤਂ, ਕਹਾਪਣਮਤ੍ਤਂ ਪਾਤੇਨ੍ਤਾ ਕੋਟ੍ਟੇਨ੍ਤਿ। ਖਾਰਾਪਤਚ੍ਛਿਕਨ੍ਤਿ ਸਰੀਰਂ ਤਤ੍ਥ ਤਤ੍ਥ ਆવੁਧੇਹਿ ਪਹਰਿਤ੍વਾ ਕੋਚ੍ਛੇਹਿ ਖਾਰਂ ਘਂਸਨ੍ਤਿ, ਚਮ੍ਮਮਂਸਨ੍ਹਾਰੂਨਿ ਪਗ੍ਘਰਿਤ੍વਾ ਅਟ੍ਠਿਕਸਙ੍ਖਲਿਕਾવ ਤਿਟ੍ਠਤਿ। ਪਲਿਘਪਰਿવਤ੍ਤਿਕਨ੍ਤਿ ਏਕੇਨ ਪਸ੍ਸੇਨ ਨਿਪਜ੍ਜਾਪੇਤ੍વਾ ਕਣ੍ਣਚ੍ਛਿਦ੍ਦੇਨ ਅਯਸੂਲਂ ਕੋਟ੍ਟੇਤ੍વਾ ਪਥવਿਯਾ ਏਕਾਬਦ੍ਧਂ ਕਰੋਨ੍ਤਿ। ਅਥ ਨਂ ਪਾਦੇ ਗਹੇਤ੍વਾ ਆવਿਞ੍ਛਨ੍ਤਿ। ਪਲਾਲਪੀਠਕਨ੍ਤਿ ਛੇਕੋ ਕਾਰਣਿਕੋ ਛવਿਚਮ੍ਮਂ ਅਚ੍ਛਿਨ੍ਦਿਤ੍વਾ ਨਿਸਦਪੋਤੇਹਿ ਅਟ੍ਠੀਨਿ ਭਿਨ੍ਦਿਤ੍વਾ ਕੇਸੇਸੁ ਗਹੇਤ੍વਾ ਉਕ੍ਖਿਪਤਿ, ਮਂਸਰਾਸਿਯੇવ ਹੋਤਿ। ਅਥ ਨਂ ਕੇਸੇਹੇવ ਪਰਿਯੋਨਨ੍ਧਿਤ੍વਾ ਗਣ੍ਹਨ੍ਤਿ, ਪਲਾਲવਟ੍ਟਿਂ વਿਯ ਕਤ੍વਾ ਪੁਨ વੇਠੇਨ੍ਤਿ। ਸੁਨਖੇਹਿਪੀਤਿ ਕਤਿਪਯਾਨਿ ਦਿવਸਾਨਿ ਆਹਾਰਂ ਅਦਤ੍વਾ ਛਾਤਕਸੁਨਖੇਹਿ ਖਾਦਾਪੇਨ੍ਤਿ। ਤੇ ਮੁਹੁਤ੍ਤੇਨ ਅਟ੍ਠਿਕਸਙ੍ਖਲਿਕਮੇવ ਕਰੋਨ੍ਤਿ। ਸੂਲੇ ਉਤ੍ਤਾਸੇਨ੍ਤੇਤਿ ਸੂਲੇ ਆਰੋਪੇਨ੍ਤੇ।
Baḷisamaṃsikanti ubhatomukhehi baḷisehi paharitvā cammamaṃsanhārūni uppāṭenti. Kahāpaṇikanti sakalasarīraṃ tiṇhāhi vāsīhi koṭito paṭṭhāya kahāpaṇamattaṃ, kahāpaṇamattaṃ pātentā koṭṭenti. Khārāpatacchikanti sarīraṃ tattha tattha āvudhehi paharitvā kocchehi khāraṃ ghaṃsanti, cammamaṃsanhārūni paggharitvā aṭṭhikasaṅkhalikāva tiṭṭhati. Palighaparivattikanti ekena passena nipajjāpetvā kaṇṇacchiddena ayasūlaṃ koṭṭetvā pathaviyā ekābaddhaṃ karonti. Atha naṃ pāde gahetvā āviñchanti. Palālapīṭhakanti cheko kāraṇiko chavicammaṃ acchinditvā nisadapotehi aṭṭhīni bhinditvā kesesu gahetvā ukkhipati, maṃsarāsiyeva hoti. Atha naṃ keseheva pariyonandhitvā gaṇhanti, palālavaṭṭiṃ viya katvā puna veṭhenti. Sunakhehipīti katipayāni divasāni āhāraṃ adatvā chātakasunakhehi khādāpenti. Te muhuttena aṭṭhikasaṅkhalikameva karonti. Sūle uttāsenteti sūle āropente.
ਨ ਪਰੇਸਂ ਪਾਭਤਂ વਿਲੁਮ੍ਪਨ੍ਤੋ ਚਰਤੀਤਿ ਪਰੇਸਂ ਸਨ੍ਤਕਂ ਭਣ੍ਡਂ ਪਰਮ੍ਮੁਖਂ ਆਭਤਂ ਅਨ੍ਤਮਸੋ ਅਨ੍ਤਰવੀਥਿਯਂ ਪਤਿਤਂ ਸਹਸ੍ਸਭਣ੍ਡਿਕਮ੍ਪਿ ਦਿਸ੍વਾ ‘‘ਇਮਿਨਾ ਜੀવਿਸ੍ਸਾਮੀ’’ਤਿ વਿਲੁਮ੍ਪਨ੍ਤੋ ਨ વਿਚਰਤਿ, ਕੋ ਇਮਿਨਾ ਅਤ੍ਥੋਤਿ ਪਿਟ੍ਠਿਪਾਦੇਨ વਾ ਪવਟ੍ਟੇਤ੍વਾ ਗਚ੍ਛਤਿ।
Na paresaṃ pābhataṃ vilumpanto caratīti paresaṃ santakaṃ bhaṇḍaṃ parammukhaṃ ābhataṃ antamaso antaravīthiyaṃ patitaṃ sahassabhaṇḍikampi disvā ‘‘iminā jīvissāmī’’ti vilumpanto na vicarati, ko iminā atthoti piṭṭhipādena vā pavaṭṭetvā gacchati.
ਪਾਪਕੋਤਿ ਲਾਮਕੋ। ਦੁਕ੍ਖੋਤਿ ਅਨਿਟ੍ਠੋ। ਕਿਞ੍ਚ ਤਨ੍ਤਿ ਕਿਂ ਨਾਮ ਤਂ ਕਾਰਣਂ ਭવੇਯ੍ਯ। ਯਾਹਨ੍ਤਿ ਯੇਨ ਅਹਂ। ਕਾਯਦੁਚ੍ਚਰਿਤਨ੍ਤਿ ਪਾਣਾਤਿਪਾਤਾਦਿ ਤਿવਿਧਂ ਅਕੁਸਲਂ ਕਾਯਕਮ੍ਮਂ। ਕਾਯਸੁਚਰਿਤਨ੍ਤਿ ਤਸ੍ਸ ਪਟਿਪਕ੍ਖਭੂਤਂ ਤਿવਿਧਂ ਕੁਸਲਕਮ੍ਮਂ। વਚੀਦੁਚ੍ਚਰਿਤਨ੍ਤਿ ਮੁਸਾવਾਦਾਦਿ ਚਤੁਬ੍ਬਿਧਂ ਅਕੁਸਲਂ વਚੀਕਮ੍ਮਂ। વਚੀਸੁਚਰਿਤਨ੍ਤਿ ਤਸ੍ਸ ਪਟਿਪਕ੍ਖਭੂਤਂ ਚਤੁਬ੍ਬਿਧਂ ਕੁਸਲਕਮ੍ਮਂ। ਮਨੋਦੁਚ੍ਚਰਿਤਨ੍ਤਿ ਅਭਿਜ੍ਝਾਦਿ ਤਿવਿਧਂ ਅਕੁਸਲਕਮ੍ਮਂ। ਮਨੋਸੁਚਰਿਤਨ੍ਤਿ ਤਸ੍ਸ ਪਟਿਪਕ੍ਖਭੂਤਂ ਤਿવਿਧਂ ਕੁਸਲਕਮ੍ਮਂ। ਸੁਦ੍ਧਂ ਅਤ੍ਤਾਨਂ ਪਰਿਹਰਤੀਤਿ ਏਤ੍ਥ ਦੁવਿਧਾ ਸੁਦ੍ਧਿ – ਪਰਿਯਾਯਤੋ ਚ ਨਿਪ੍ਪਰਿਯਾਯਤੋ ਚ। ਸਰਣਗਮਨੇਨ ਹਿ ਪਰਿਯਾਯੇਨ ਸੁਦ੍ਧਂ ਅਤ੍ਤਾਨਂ ਪਰਿਹਰਤਿ ਨਾਮ। ਤਥਾ ਪਞ੍ਚਹਿ ਸੀਲੇਹਿ, ਦਸਹਿ ਸੀਲੇਹਿ – ਚਤੁਪਾਰਿਸੁਦ੍ਧਿਸੀਲੇਨ, ਪਠਮਜ੍ਝਾਨੇਨ…ਪੇ॰… ਨੇવਸਞ੍ਞਾਨਾਸਞ੍ਞਾਯਤਨੇਨ, ਸੋਤਾਪਤ੍ਤਿਮਗ੍ਗੇਨ, ਸੋਤਾਪਤ੍ਤਿਫਲੇਨ…ਪੇ॰… ਅਰਹਤ੍ਤਮਗ੍ਗੇਨ ਪਰਿਯਾਯੇਨ ਸੁਦ੍ਧਂ ਅਤ੍ਤਾਨਂ ਪਰਿਹਰਤਿ ਨਾਮ। ਅਰਹਤ੍ਤਫਲੇ ਪਤਿਟ੍ਠਿਤੋ ਪਨ ਖੀਣਾਸવੋ ਛਿਨ੍ਨਮੂਲਕੇ ਪਞ੍ਚਕ੍ਖਨ੍ਧੇ ਨ੍ਹਾਪੇਨ੍ਤੋਪਿ ਖਾਦਾਪੇਨ੍ਤੋਪਿ ਭੁਞ੍ਜਾਪੇਨ੍ਤੋਪਿ ਨਿਸੀਦਾਪੇਨ੍ਤੋਪਿ ਨਿਪਜ੍ਜਾਪੇਨ੍ਤੋਪਿ ਨਿਪ੍ਪਰਿਯਾਯੇਨੇવ ਸੁਦ੍ਧਂ ਨਿਮ੍ਮਲਂ ਅਤ੍ਤਾਨਂ ਪਰਿਹਰਤਿ ਪਟਿਜਗ੍ਗਤੀਤਿ વੇਦਿਤਬ੍ਬੋ।
Pāpakoti lāmako. Dukkhoti aniṭṭho. Kiñca tanti kiṃ nāma taṃ kāraṇaṃ bhaveyya. Yāhanti yena ahaṃ. Kāyaduccaritanti pāṇātipātādi tividhaṃ akusalaṃ kāyakammaṃ. Kāyasucaritanti tassa paṭipakkhabhūtaṃ tividhaṃ kusalakammaṃ. Vacīduccaritanti musāvādādi catubbidhaṃ akusalaṃ vacīkammaṃ. Vacīsucaritanti tassa paṭipakkhabhūtaṃ catubbidhaṃ kusalakammaṃ. Manoduccaritanti abhijjhādi tividhaṃ akusalakammaṃ. Manosucaritanti tassa paṭipakkhabhūtaṃ tividhaṃ kusalakammaṃ. Suddhaṃ attānaṃ pariharatīti ettha duvidhā suddhi – pariyāyato ca nippariyāyato ca. Saraṇagamanena hi pariyāyena suddhaṃ attānaṃ pariharati nāma. Tathā pañcahi sīlehi, dasahi sīlehi – catupārisuddhisīlena, paṭhamajjhānena…pe… nevasaññānāsaññāyatanena, sotāpattimaggena, sotāpattiphalena…pe… arahattamaggena pariyāyena suddhaṃ attānaṃ pariharati nāma. Arahattaphale patiṭṭhito pana khīṇāsavo chinnamūlake pañcakkhandhe nhāpentopi khādāpentopi bhuñjāpentopi nisīdāpentopi nipajjāpentopi nippariyāyeneva suddhaṃ nimmalaṃ attānaṃ pariharati paṭijaggatīti veditabbo.
ਤਸ੍ਮਾਤਿ ਯਸ੍ਮਾ ਇਮਾਨਿ ਦ੍વੇ વਜ੍ਜਾਨੇવ, ਨੋ ਨ વਜ੍ਜਾਨਿ, ਤਸ੍ਮਾ। વਜ੍ਜਭੀਰੁਨੋਤਿ વਜ੍ਜਭੀਰੁਕਾ। વਜ੍ਜਭਯਦਸ੍ਸਾવਿਨੋਤਿ વਜ੍ਜਾਨਿ ਭਯਤੋ ਦਸ੍ਸਨਸੀਲਾ। ਏਤਂ ਪਾਟਿਕਙ੍ਖਨ੍ਤਿ ਏਤਂ ਇਚ੍ਛਿਤਬ੍ਬਂ, ਏਤਂ ਅવਸ੍ਸਂਭਾવੀਤਿ ਅਤ੍ਥੋ। ਯਨ੍ਤਿ ਨਿਪਾਤਮਤ੍ਤਂ, ਕਾਰਣવਚਨਂ વਾ ਯੇਨ ਕਾਰਣੇਨ ਪਰਿਮੁਚ੍ਚਿਸ੍ਸਤਿ ਸਬ੍ਬવਜ੍ਜੇਹਿ । ਕੇਨ ਪਨ ਕਾਰਣੇਨ ਪਰਿਮੁਚ੍ਚਿਸ੍ਸਤੀਤਿ? ਚਤੁਤ੍ਥਮਗ੍ਗੇਨ ਚੇવ ਚਤੁਤ੍ਥਫਲੇਨ ਚ। ਮਗ੍ਗੇਨ ਹਿ ਪਰਿਮੁਚ੍ਚਤਿ ਨਾਮ, ਫਲਂ ਪਤ੍ਤੋ ਪਰਿਮੁਤ੍ਤੋ ਨਾਮ ਹੋਤੀਤਿ। ਕਿਂ ਪਨ ਖੀਣਾਸવਸ੍ਸ ਅਕੁਸਲਂ ਨ વਿਪਚ੍ਚਤੀਤਿ? વਿਪਚ੍ਚਤਿ, ਤਂ ਪਨ ਖੀਣਾਸવਭਾવਤੋ ਪੁਬ੍ਬੇ ਕਤਂ। ਤਞ੍ਚ ਖੋ ਇਮਸ੍ਮਿਂਯੇવ ਅਤ੍ਤਭਾવੇ, ਸਮ੍ਪਰਾਯੇ ਪਨਸ੍ਸ ਕਮ੍ਮਫਲਂ ਨਾਮ ਨਤ੍ਥੀਤਿ। ਪਠਮਂ।
Tasmāti yasmā imāni dve vajjāneva, no na vajjāni, tasmā. Vajjabhīrunoti vajjabhīrukā. Vajjabhayadassāvinoti vajjāni bhayato dassanasīlā. Etaṃ pāṭikaṅkhanti etaṃ icchitabbaṃ, etaṃ avassaṃbhāvīti attho. Yanti nipātamattaṃ, kāraṇavacanaṃ vā yena kāraṇena parimuccissati sabbavajjehi . Kena pana kāraṇena parimuccissatīti? Catutthamaggena ceva catutthaphalena ca. Maggena hi parimuccati nāma, phalaṃ patto parimutto nāma hotīti. Kiṃ pana khīṇāsavassa akusalaṃ na vipaccatīti? Vipaccati, taṃ pana khīṇāsavabhāvato pubbe kataṃ. Tañca kho imasmiṃyeva attabhāve, samparāye panassa kammaphalaṃ nāma natthīti. Paṭhamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧. વਜ੍ਜਸੁਤ੍ਤਂ • 1. Vajjasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧. વਜ੍ਜਸੁਤ੍ਤવਣ੍ਣਨਾ • 1. Vajjasuttavaṇṇanā
