| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ವಜ್ಜಿಪುತ್ತಸುತ್ತಂ
4. Vajjiputtasuttaṃ
೮೫. ಏಕಂ ಸಮಯಂ ಭಗವಾ ವೇಸಾಲಿಯಂ ವಿಹರತಿ ಮಹಾವನೇ ಕೂಟಾಗಾರಸಾಲಾಯಂ। ಅಥ ಖೋ ಅಞ್ಞತರೋ ವಜ್ಜಿಪುತ್ತಕೋ ಭಿಕ್ಖು ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಸೋ ವಜ್ಜಿಪುತ್ತಕೋ ಭಿಕ್ಖು ಭಗವನ್ತಂ ಏತದವೋಚ – ‘‘ಸಾಧಿಕಮಿದಂ, ಭನ್ತೇ, ದಿಯಡ್ಢಸಿಕ್ಖಾಪದಸತಂ 1 ಅನ್ವದ್ಧಮಾಸಂ ಉದ್ದೇಸಂ ಆಗಚ್ಛತಿ। ನಾಹಂ , ಭನ್ತೇ, ಏತ್ಥ ಸಕ್ಕೋಮಿ ಸಿಕ್ಖಿತು’’ನ್ತಿ। ‘‘ಸಕ್ಖಿಸ್ಸಸಿ ಪನ ತ್ವಂ, ಭಿಕ್ಖು, ತೀಸು ಸಿಕ್ಖಾಸು ಸಿಕ್ಖಿತುಂ – ಅಧಿಸೀಲಸಿಕ್ಖಾಯ, ಅಧಿಚಿತ್ತಸಿಕ್ಖಾಯ ಅಧಿಪಞ್ಞಾಸಿಕ್ಖಾಯಾ’’ತಿ? ‘‘ಸಕ್ಕೋಮಹಂ, ಭನ್ತೇ, ತೀಸು ಸಿಕ್ಖಾಸು ಸಿಕ್ಖಿತುಂ – ಅಧಿಸೀಲಸಿಕ್ಖಾಯ, ಅಧಿಚಿತ್ತಸಿಕ್ಖಾಯ, ಅಧಿಪಞ್ಞಾಸಿಕ್ಖಾಯಾ’’ತಿ। ‘‘ತಸ್ಮಾತಿಹ ತ್ವಂ, ಭಿಕ್ಖು, ತೀಸು ಸಿಕ್ಖಾಸು ಸಿಕ್ಖಸ್ಸು – ಅಧಿಸೀಲಸಿಕ್ಖಾಯ, ಅಧಿಚಿತ್ತಸಿಕ್ಖಾಯ, ಅಧಿಪಞ್ಞಾಸಿಕ್ಖಾಯ’’।
85. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho aññataro vajjiputtako bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so vajjiputtako bhikkhu bhagavantaṃ etadavoca – ‘‘sādhikamidaṃ, bhante, diyaḍḍhasikkhāpadasataṃ 2 anvaddhamāsaṃ uddesaṃ āgacchati. Nāhaṃ , bhante, ettha sakkomi sikkhitu’’nti. ‘‘Sakkhissasi pana tvaṃ, bhikkhu, tīsu sikkhāsu sikkhituṃ – adhisīlasikkhāya, adhicittasikkhāya adhipaññāsikkhāyā’’ti? ‘‘Sakkomahaṃ, bhante, tīsu sikkhāsu sikkhituṃ – adhisīlasikkhāya, adhicittasikkhāya, adhipaññāsikkhāyā’’ti. ‘‘Tasmātiha tvaṃ, bhikkhu, tīsu sikkhāsu sikkhassu – adhisīlasikkhāya, adhicittasikkhāya, adhipaññāsikkhāya’’.
‘‘ಯತೋ ಖೋ ತ್ವಂ, ಭಿಕ್ಖು, ಅಧಿಸೀಲಮ್ಪಿ ಸಿಕ್ಖಿಸ್ಸಸಿ, ಅಧಿಚಿತ್ತಮ್ಪಿ ಸಿಕ್ಖಿಸ್ಸಸಿ, ಅಧಿಪಞ್ಞಮ್ಪಿ ಸಿಕ್ಖಿಸ್ಸಸಿ, ತಸ್ಸ ತುಯ್ಹಂ ಭಿಕ್ಖು ಅಧಿಸೀಲಮ್ಪಿ ಸಿಕ್ಖತೋ ಅಧಿಚಿತ್ತಮ್ಪಿ ಸಿಕ್ಖತೋ ಅಧಿಪಞ್ಞಮ್ಪಿ ಸಿಕ್ಖತೋ ರಾಗೋ ಪಹೀಯಿಸ್ಸತಿ, ದೋಸೋ ಪಹೀಯಿಸ್ಸತಿ, ಮೋಹೋ ಪಹೀಯಿಸ್ಸತಿ। ಸೋ ತ್ವಂ ರಾಗಸ್ಸ ಪಹಾನಾ ದೋಸಸ್ಸ ಪಹಾನಾ ಮೋಹಸ್ಸ ಪಹಾನಾ ಯಂ ಅಕುಸಲಂ ನ ತಂ ಕರಿಸ್ಸಸಿ, ಯಂ ಪಾಪಂ ನ ತಂ ಸೇವಿಸ್ಸಸೀ’’ತಿ।
‘‘Yato kho tvaṃ, bhikkhu, adhisīlampi sikkhissasi, adhicittampi sikkhissasi, adhipaññampi sikkhissasi, tassa tuyhaṃ bhikkhu adhisīlampi sikkhato adhicittampi sikkhato adhipaññampi sikkhato rāgo pahīyissati, doso pahīyissati, moho pahīyissati. So tvaṃ rāgassa pahānā dosassa pahānā mohassa pahānā yaṃ akusalaṃ na taṃ karissasi, yaṃ pāpaṃ na taṃ sevissasī’’ti.
ಅಥ ಖೋ ಸೋ ಭಿಕ್ಖು ಅಪರೇನ ಸಮಯೇನ ಅಧಿಸೀಲಮ್ಪಿ ಸಿಕ್ಖಿ, ಅಧಿಚಿತ್ತಮ್ಪಿ ಸಿಕ್ಖಿ, ಅಧಿಪಞ್ಞಮ್ಪಿ ಸಿಕ್ಖಿ। ತಸ್ಸ ಅಧಿಸೀಲಮ್ಪಿ ಸಿಕ್ಖತೋ ಅಧಿಚಿತ್ತಮ್ಪಿ ಸಿಕ್ಖತೋ ಅಧಿಪಞ್ಞಮ್ಪಿ ಸಿಕ್ಖತೋ ರಾಗೋ ಪಹೀಯಿ, ದೋಸೋ ಪಹೀಯಿ, ಮೋಹೋ ಪಹೀಯಿ। ಸೋ ರಾಗಸ್ಸ ಪಹಾನಾ ದೋಸಸ್ಸ ಪಹಾನಾ ಮೋಹಸ್ಸ ಪಹಾನಾ ಯಂ ಅಕುಸಲಂ ತಂ ನಾಕಾಸಿ, ಯಂ ಪಾಪಂ ತಂ ನ ಸೇವೀತಿ। ಚತುತ್ಥಂ।
Atha kho so bhikkhu aparena samayena adhisīlampi sikkhi, adhicittampi sikkhi, adhipaññampi sikkhi. Tassa adhisīlampi sikkhato adhicittampi sikkhato adhipaññampi sikkhato rāgo pahīyi, doso pahīyi, moho pahīyi. So rāgassa pahānā dosassa pahānā mohassa pahānā yaṃ akusalaṃ taṃ nākāsi, yaṃ pāpaṃ taṃ na sevīti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ವಜ್ಜಿಪುತ್ತಸುತ್ತವಣ್ಣನಾ • 4. Vajjiputtasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೫. ಸಮಣಸುತ್ತಾದಿವಣ್ಣನಾ • 1-5. Samaṇasuttādivaṇṇanā
