| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. ཝཛྫིཔུཏྟསུཏྟཾ
4. Vajjiputtasuttaṃ
༨༥. ཨེཀཾ སམཡཾ བྷགཝཱ ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡཾ། ཨཐ ཁོ ཨཉྙཏརོ ཝཛྫིཔུཏྟཀོ བྷིཀྑུ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ ཝཛྫིཔུཏྟཀོ བྷིཀྑུ བྷགཝནྟཾ ཨེཏདཝོཙ – ‘‘སཱདྷིཀམིདཾ, བྷནྟེ, དིཡཌྜྷསིཀྑཱཔདསཏཾ 1 ཨནྭདྡྷམཱསཾ ཨུདྡེསཾ ཨཱགཙྪཏི། ནཱཧཾ , བྷནྟེ, ཨེཏྠ སཀྐོམི སིཀྑིཏུ’’ནྟི། ‘‘སཀྑིསྶསི པན ཏྭཾ, བྷིཀྑུ, ཏཱིསུ སིཀྑཱསུ སིཀྑིཏུཾ – ཨདྷིསཱིལསིཀྑཱཡ, ཨདྷིཙིཏྟསིཀྑཱཡ ཨདྷིཔཉྙཱསིཀྑཱཡཱ’’ཏི? ‘‘སཀྐོམཧཾ, བྷནྟེ, ཏཱིསུ སིཀྑཱསུ སིཀྑིཏུཾ – ཨདྷིསཱིལསིཀྑཱཡ, ཨདྷིཙིཏྟསིཀྑཱཡ, ཨདྷིཔཉྙཱསིཀྑཱཡཱ’’ཏི། ‘‘ཏསྨཱཏིཧ ཏྭཾ, བྷིཀྑུ, ཏཱིསུ སིཀྑཱསུ སིཀྑསྶུ – ཨདྷིསཱིལསིཀྑཱཡ, ཨདྷིཙིཏྟསིཀྑཱཡ, ཨདྷིཔཉྙཱསིཀྑཱཡ’’།
85. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho aññataro vajjiputtako bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so vajjiputtako bhikkhu bhagavantaṃ etadavoca – ‘‘sādhikamidaṃ, bhante, diyaḍḍhasikkhāpadasataṃ 2 anvaddhamāsaṃ uddesaṃ āgacchati. Nāhaṃ , bhante, ettha sakkomi sikkhitu’’nti. ‘‘Sakkhissasi pana tvaṃ, bhikkhu, tīsu sikkhāsu sikkhituṃ – adhisīlasikkhāya, adhicittasikkhāya adhipaññāsikkhāyā’’ti? ‘‘Sakkomahaṃ, bhante, tīsu sikkhāsu sikkhituṃ – adhisīlasikkhāya, adhicittasikkhāya, adhipaññāsikkhāyā’’ti. ‘‘Tasmātiha tvaṃ, bhikkhu, tīsu sikkhāsu sikkhassu – adhisīlasikkhāya, adhicittasikkhāya, adhipaññāsikkhāya’’.
‘‘ཡཏོ ཁོ ཏྭཾ, བྷིཀྑུ, ཨདྷིསཱིལམྤི སིཀྑིསྶསི, ཨདྷིཙིཏྟམྤི སིཀྑིསྶསི, ཨདྷིཔཉྙམྤི སིཀྑིསྶསི, ཏསྶ ཏུཡ྄ཧཾ བྷིཀྑུ ཨདྷིསཱིལམྤི སིཀྑཏོ ཨདྷིཙིཏྟམྤི སིཀྑཏོ ཨདྷིཔཉྙམྤི སིཀྑཏོ རཱགོ པཧཱིཡིསྶཏི, དོསོ པཧཱིཡིསྶཏི, མོཧོ པཧཱིཡིསྶཏི། སོ ཏྭཾ རཱགསྶ པཧཱནཱ དོསསྶ པཧཱནཱ མོཧསྶ པཧཱནཱ ཡཾ ཨཀུསལཾ ན ཏཾ ཀརིསྶསི, ཡཾ པཱཔཾ ན ཏཾ སེཝིསྶསཱི’’ཏི།
‘‘Yato kho tvaṃ, bhikkhu, adhisīlampi sikkhissasi, adhicittampi sikkhissasi, adhipaññampi sikkhissasi, tassa tuyhaṃ bhikkhu adhisīlampi sikkhato adhicittampi sikkhato adhipaññampi sikkhato rāgo pahīyissati, doso pahīyissati, moho pahīyissati. So tvaṃ rāgassa pahānā dosassa pahānā mohassa pahānā yaṃ akusalaṃ na taṃ karissasi, yaṃ pāpaṃ na taṃ sevissasī’’ti.
ཨཐ ཁོ སོ བྷིཀྑུ ཨཔརེན སམཡེན ཨདྷིསཱིལམྤི སིཀྑི, ཨདྷིཙིཏྟམྤི སིཀྑི, ཨདྷིཔཉྙམྤི སིཀྑི། ཏསྶ ཨདྷིསཱིལམྤི སིཀྑཏོ ཨདྷིཙིཏྟམྤི སིཀྑཏོ ཨདྷིཔཉྙམྤི སིཀྑཏོ རཱགོ པཧཱིཡི, དོསོ པཧཱིཡི, མོཧོ པཧཱིཡི། སོ རཱགསྶ པཧཱནཱ དོསསྶ པཧཱནཱ མོཧསྶ པཧཱནཱ ཡཾ ཨཀུསལཾ ཏཾ ནཱཀཱསི, ཡཾ པཱཔཾ ཏཾ ན སེཝཱིཏི། ཙཏུཏྠཾ།
Atha kho so bhikkhu aparena samayena adhisīlampi sikkhi, adhicittampi sikkhi, adhipaññampi sikkhi. Tassa adhisīlampi sikkhato adhicittampi sikkhato adhipaññampi sikkhato rāgo pahīyi, doso pahīyi, moho pahīyi. So rāgassa pahānā dosassa pahānā mohassa pahānā yaṃ akusalaṃ taṃ nākāsi, yaṃ pāpaṃ taṃ na sevīti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. ཝཛྫིཔུཏྟསུཏྟཝཎྞནཱ • 4. Vajjiputtasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༥. སམཎསུཏྟཱདིཝཎྞནཱ • 1-5. Samaṇasuttādivaṇṇanā
