| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. வஜ்ஜிபுத்தஸுத்தவண்ணனா
9. Vajjiputtasuttavaṇṇanā
229. நவமே வஜ்ஜிபுத்தகோதி வஜ்ஜிரட்டே² ராஜபுத்தோ ச²த்தங் பஹாய பப்³ப³ஜிதோ. ஸப்³ப³ரத்திசாரோதி கத்திகனக்க²த்தங் கோ⁴ஸெத்வா ஸகலனக³ரங் த⁴ஜபடாகாதீ³ஹி படிமண்டெ³த்வா பவத்திதோ ஸப்³ப³ரத்திசாரோ. இத³ஞ்ஹி நக்க²த்தங் யாவ சாதுமஹாராஜிகேஹி ஏகாப³த்³த⁴ங் ஹோதி. தூரியதாளிதவாதி³தனிக்³கோ⁴ஸஸத்³த³ந்தி பே⁴ரிஆதி³தூரியானங் தாளிதானங் வீணாதீ³னஞ்ச வாதி³தானங் நிக்³கோ⁴ஸஸத்³த³ங். அபா⁴ஸீதி வேஸாலியங் கிர ஸத்த ராஜஸஹஸ்ஸானி ஸத்தஸதானி ஸத்த ச ராஜானோ, தத்தகாவ தேஸங் உபராஜஸேனாபதிஆத³யோ . தேஸு அலங்கதபடியத்தேஸு நக்க²த்தகீளனத்தா²ய வீதி²ங் ஓதிண்ணேஸு ஸட்டி²ஹத்தே² மஹாசங்கமே சங்கமமானோ நப⁴ஸ்ஸ மஜ்ஜே² டி²தங் சந்த³ங் தி³ஸ்வா சங்கமனகோடியங் ப²லகங் நிஸ்ஸாய டி²தோ அபா⁴ஸி. அபவித்³த⁴ங்வ வனஸ்மிங் தா³ருகந்தி வத்த²வேட²னாலங்காரரஹிதத்தா வனே ச²ட்³டி³ததா³ருகங் விய ஜாதங். பாபியோதி லாமகதரோ அம்ஹேஹி அஞ்ஞோ கோசி அத்தி². பிஹயந்தீதி தே²ரோ ஆரஞ்ஞிகோ பங்ஸுகூலிகோ பிண்ட³பாதிகோ ஸபதா³னசாரிகோ அப்பிச்சோ² ஸந்துட்டோ²தி ப³ஹூ துய்ஹங் பத்த²யந்தீதி அத்தோ². ஸக்³க³கா³மினந்தி ஸக்³க³ங் க³ச்ச²ந்தானங் க³தானம்பி. நவமங்.
229. Navame vajjiputtakoti vajjiraṭṭhe rājaputto chattaṃ pahāya pabbajito. Sabbaratticāroti kattikanakkhattaṃ ghosetvā sakalanagaraṃ dhajapaṭākādīhi paṭimaṇḍetvā pavattito sabbaratticāro. Idañhi nakkhattaṃ yāva cātumahārājikehi ekābaddhaṃ hoti. Tūriyatāḷitavāditanigghosasaddanti bheriāditūriyānaṃ tāḷitānaṃ vīṇādīnañca vāditānaṃ nigghosasaddaṃ. Abhāsīti vesāliyaṃ kira satta rājasahassāni sattasatāni satta ca rājāno, tattakāva tesaṃ uparājasenāpatiādayo . Tesu alaṅkatapaṭiyattesu nakkhattakīḷanatthāya vīthiṃ otiṇṇesu saṭṭhihatthe mahācaṅkame caṅkamamāno nabhassa majjhe ṭhitaṃ candaṃ disvā caṅkamanakoṭiyaṃ phalakaṃ nissāya ṭhito abhāsi. Apaviddhaṃvavanasmiṃ dārukanti vatthaveṭhanālaṅkārarahitattā vane chaḍḍitadārukaṃ viya jātaṃ. Pāpiyoti lāmakataro amhehi añño koci atthi. Pihayantīti thero āraññiko paṃsukūliko piṇḍapātiko sapadānacāriko appiccho santuṭṭhoti bahū tuyhaṃ patthayantīti attho. Saggagāminanti saggaṃ gacchantānaṃ gatānampi. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. வஜ்ஜிபுத்தஸுத்தங் • 9. Vajjiputtasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. வஜ்ஜிபுத்தஸுத்தவண்ணனா • 9. Vajjiputtasuttavaṇṇanā
