| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
4. важ̇ж̇ибуд̇д̇асуд̇д̇аван̣н̣анаа
4. Vajjiputtasuttavaṇṇanā
85. жад̇уд̇т̇з важ̇ж̇ибуд̇д̇агод̇и важ̇ж̇ирааж̇агуласса буд̇д̇о. д̣̇ияад̣дхасигкаабад̣̇асад̇анд̇и бан̣н̣аасаад̇хигам̣ сигкаабад̣̇асад̇ам̣. д̇асмим̣ самаяз бан̃н̃ад̇д̇аани сигкаабад̣̇аанзва санд̇хааязд̇ам̣ вуд̇д̇ам̣. со гира бхигку аж̇ж̇авасамбанно уж̇уж̇аад̇иго аван̇го агудило, д̇асмаа ‘‘ахам̣ зд̇д̇агаани сигкаабад̣̇аани рагкид̇ум̣ саггун̣зяяам̣ ваа на ваа’’д̇и жинд̇зд̇ваа сад̇т̇у аарожзси. саггомаханд̇и саггоми ахам̣. со гира ‘‘зд̇д̇агзсу сигкаабад̣̇зсу сигканд̇асса аг̇ару д̇ийсу сигкаасу сигкид̇у’’нд̇и ман̃н̃амаано звамааха. ат̇а бхаг̇аваа яат̇аа наама бан̃н̃ааса д̇ин̣агалаабияо угкибид̇ум̣ асаггонд̇асса галаабияасад̇ам̣ б̣анд̇хид̇ваа сийсз табзяяа, звамзва згиссааби сигкааяа сигкид̇ум̣ асаггонд̇асса абараа д̣̇взби сигкаа убари багкибанд̇о д̇асмаад̇иха д̇вам̣ бхигкууд̇иаад̣̇имааха. сукумаало гира уд̇д̇аро наама ж̇аанабад̣̇амануссо лохабаасаад̣̇авихаарз васад̇и. ат̇а нам̣ д̣̇ахарабхигкуу аахам̣су – ‘‘уд̇д̇ара, аг̇г̇исаалаа овассад̇и, д̇ин̣ам̣ габбияам̣ гад̇ваа д̣̇зхий’’д̇и. д̇ам̣ аад̣̇ааяа адавим̣ г̇анд̇ваа д̇зна лааяид̇ам̣ д̇ин̣ам̣язва гарал̣з б̣анд̇хид̇ваа ‘‘бан̃н̃ааса гарал̣з г̇ахзд̇ум̣ сагкиссаси уд̇д̇араа’’д̇и аахам̣су. со ‘‘на сагкиссаамий’’д̇и ааха. асийд̇им̣ бана сагкиссасийд̇и? на сагкиссаами, бханд̇зд̇и. згам̣ гарал̣асад̇ам̣ сагкиссасийд̇и? аама, бханд̇з, г̇ан̣хиссаамийд̇и. д̣̇ахарабхигкуу гарал̣асад̇ам̣ б̣анд̇хид̇ваа д̇асса сийсз табаяим̣су. со угкибид̇ваа нид̇т̇унанд̇о г̇анд̇ваа аг̇г̇исаалааяа самийбз баад̇зси. ат̇а нам̣ бхигкуу ‘‘гиланд̇аруубоси уд̇д̇араа’’д̇и аахам̣су. аама, бханд̇з, д̣̇ахараа бхигкуу мам̣ ван̃жзсум̣, имам̣ згамби гарал̣асад̇ам̣ угкибид̇ум̣ асаггонд̇ам̣ мам̣ ‘‘бан̣н̣ааса гарал̣з угкибаахий’’д̇и вад̣̇им̣су. аама, уд̇д̇ара, ван̃жаяим̣су д̇анд̇и. звам̣ самбад̣̇амид̣̇ам̣ взд̣̇ид̇аб̣б̣ам̣. ид̇хааби д̇иссо сигкаа миссигаава гат̇ид̇аа.
85. Catutthe vajjiputtakoti vajjirājakulassa putto. Diyaḍḍhasikkhāpadasatanti paṇṇāsādhikaṃ sikkhāpadasataṃ. Tasmiṃ samaye paññattāni sikkhāpadāneva sandhāyetaṃ vuttaṃ. So kira bhikkhu ajjavasampanno ujujātiko avaṅko akuṭilo, tasmā ‘‘ahaṃ ettakāni sikkhāpadāni rakkhituṃ sakkuṇeyyaṃ vā na vā’’ti cintetvā satthu ārocesi. Sakkomahanti sakkomi ahaṃ. So kira ‘‘ettakesu sikkhāpadesu sikkhantassa agaru tīsu sikkhāsu sikkhitu’’nti maññamāno evamāha. Atha bhagavā yathā nāma paññāsa tiṇakalāpiyo ukkhipituṃ asakkontassa kalāpiyasataṃ bandhitvā sīse ṭhapeyya, evameva ekissāpi sikkhāya sikkhituṃ asakkontassa aparā dvepi sikkhā upari pakkhipanto tasmātiha tvaṃ bhikkhūtiādimāha. Sukhumālo kira uttaro nāma jānapadamanusso lohapāsādavihāre vasati. Atha naṃ daharabhikkhū āhaṃsu – ‘‘uttara, aggisālā ovassati, tiṇaṃ kappiyaṃ katvā dehī’’ti. Taṃ ādāya aṭaviṃ gantvā tena lāyitaṃ tiṇaṃyeva karaḷe bandhitvā ‘‘paññāsa karaḷe gahetuṃ sakkhissasi uttarā’’ti āhaṃsu. So ‘‘na sakkhissāmī’’ti āha. Asītiṃ pana sakkhissasīti? Na sakkhissāmi, bhanteti. Ekaṃ karaḷasataṃ sakkhissasīti? Āma, bhante, gaṇhissāmīti. Daharabhikkhū karaḷasataṃ bandhitvā tassa sīse ṭhapayiṃsu. So ukkhipitvā nitthunanto gantvā aggisālāya samīpe pātesi. Atha naṃ bhikkhū ‘‘kilantarūposi uttarā’’ti āhaṃsu. Āma, bhante, daharā bhikkhū maṃ vañcesuṃ, imaṃ ekampi karaḷasataṃ ukkhipituṃ asakkontaṃ maṃ ‘‘paṇṇāsa karaḷe ukkhipāhī’’ti vadiṃsu. Āma, uttara, vañcayiṃsu tanti. Evaṃ sampadamidaṃ veditabbaṃ. Idhāpi tisso sikkhā missikāva kathitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 4. важ̇ж̇ибуд̇д̇асуд̇д̇ам̣ • 4. Vajjiputtasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 1-5. саман̣асуд̇д̇аад̣̇иван̣н̣анаа • 1-5. Samaṇasuttādivaṇṇanā
