| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੯. વਜ੍ਜਿਪੁਤ੍ਤਸੁਤ੍ਤવਣ੍ਣਨਾ
9. Vajjiputtasuttavaṇṇanā
੨੨੯. વਜ੍ਜਿਰਟ੍ਠੇ ਰਾਜਪੁਤ੍ਤੋਤਿ વਜ੍ਜਿਰਟ੍ਠੇ ਜਾਤਸਂવਦ੍ਧੋ વਜ੍ਜਿਰਾਜਪੁਤ੍ਤੋ। ਸਬ੍ਬਰਤ੍ਤਿਚਾਰੋਤਿ ਛਣਸਮ੍ਪਤ੍ਤਿਯਾ ਇਤੋ ਚਿਤੋ ਚਰਨ੍ਤੇਹਿ ਅਨੁਭવਿਤਬ੍ਬਨਕ੍ਖਤ੍ਤਮਹੋ। ਤੇਨਾਹ ‘‘ਕਤ੍ਤਿਕਨਕ੍ਖਤ੍ਤਂ ਘੋਸੇਤ੍વਾ’’ ਤਿਆਦਿ। ਏਕਾਬਦ੍ਧਂ ਹੋਤੀਤਿ ਯਸ੍ਮਾ ਚਾਤੁਮਹਾਰਾਜਿਕਦੇવਾ ਤਸ੍ਮਿਂ ਦਿવਸੇ ਨਕ੍ਖਤ੍ਤਂ ਘੋਸੇਤ੍વਾ ਅਤ੍ਤਨੋ ਪੁਞ੍ਞਾਨੁਭਾવਸਿਦ੍ਧਾਯ ਦਿਬ੍ਬਸਮ੍ਪਤ੍ਤਿਯਾ ਮਹਨ੍ਤਂ ਨਕ੍ਖਤ੍ਤਕੀਲ਼ਾਸੁਖਂ ਅਨੁਭવਨ੍ਤਿ, ਤਸ੍ਮਾ ਤਂ ਤੇਹਿ ਏਕਾਬਦ੍ਧਂ વਿਯ ਹੋਤਿ। ਭੇਰਿਆਦਿਤੂਰਿਯਾਨਨ੍ਤਿ ਭੇਰਿਮੁਦਿਙ੍ਗਸਙ੍ਖਪਣવવੀਣਾਦਿਤੂਰਿਯਾਨਂ। ਤਾਲ਼ਿਤਾਨਨ੍ਤਿ ਆਰਦ੍ਧਲਯਾਨੁਰੂਪਂ ਪਹਟਾਨਂ। વੀਣਾਦੀਨਨ੍ਤਿ વੀਣਾવੇਣੁਗੋਮੁਖੀਆਦੀਨਂ। વਾਦਿਤਾਨਨ੍ਤਿ ਯਥਾਰਦ੍ਧਮੁਚ੍ਛਨਾਨੁਰੂਪਂ ਸਙ੍ਘਟ੍ਟਿਤਾਨਂ। ਅਭਾਸੀਤਿ ਤੇਨ ਸਦ੍ਦੇਨ ਆਕਡ੍ਢਿਯਮਾਨਹਦਯੋ ਅਯੋਨਿਸੋ ਉਮ੍ਮੁਜ੍ਜਿਤ੍વਾ ‘‘ਮਹਤੀ વਤ ਮੇ ਜਾਨੀ’’ਤਿ ਅਨੁਤ੍ਥੁਨਨ੍ਤੋ ਅਭਾਸਿ। ਛਡ੍ਡਿਤਦਾਰੁਕਂ વਿਯਾਤਿ વਨੇ ਛਡ੍ਡਿਤਨਿਰਤ੍ਥਕਕਲ਼ਿਙ੍ਗਰਂ વਿਯ। ਲਾਮਕਤਰੋਤਿ ਨਿਹੀਨਤਰੋ। ਦੇવਤਾ ਪਠਮਪ੍ਪਿਤਂ ਆਣਿਂ ਪਟਾਣਿਯਾ ਨੀਹਰਨ੍ਤੀ વਿਯ ਤੇਨ ਭਿਕ੍ਖੁਨਾ વੁਤ੍ਤਮਤ੍ਥਂ ਅਪਨੇਨ੍ਤੀ ‘‘ਤਸ੍ਸ ਤੇ ਬਹੁਕਾ ਪਿਹਯਨ੍ਤੀ’’ਤਿ ਅવੋਚਾਤਿ વੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਥੇਰੋ’’ਤਿਆਦਿਮਾਹ। ਸਗ੍ਗਂ ਗਚ੍ਛਨ੍ਤਾਨਂ ਯਥਾ ਨੇਰਯਿਕਾ ਪਿਹਯਨ੍ਤਿ, ਏવਂ ਸਮ੍ਮਾਪਟਿਪਨ੍ਨਸ੍ਸ ਤੁਯ੍ਹਂ ਬਹੂ ਪਿਹਯਨ੍ਤਿ, ਤਸ੍ਮਾ ਤ੍વਂ ‘‘ਪਾਪਿਯੋ’’ਤਿ ਅਤ੍ਤਾਨਂ ਮਾ ਮਞ੍ਞਿਤ੍ਥਾਤਿ ਅਧਿਪ੍ਪਾਯੋ।
229.Vajjiraṭṭhe rājaputtoti vajjiraṭṭhe jātasaṃvaddho vajjirājaputto. Sabbaratticāroti chaṇasampattiyā ito cito carantehi anubhavitabbanakkhattamaho. Tenāha ‘‘kattikanakkhattaṃ ghosetvā’’ tiādi. Ekābaddhaṃ hotīti yasmā cātumahārājikadevā tasmiṃ divase nakkhattaṃ ghosetvā attano puññānubhāvasiddhāya dibbasampattiyā mahantaṃ nakkhattakīḷāsukhaṃ anubhavanti, tasmā taṃ tehi ekābaddhaṃ viya hoti. Bheriāditūriyānanti bherimudiṅgasaṅkhapaṇavavīṇāditūriyānaṃ. Tāḷitānanti āraddhalayānurūpaṃ pahaṭānaṃ. Vīṇādīnanti vīṇāveṇugomukhīādīnaṃ. Vāditānanti yathāraddhamucchanānurūpaṃ saṅghaṭṭitānaṃ. Abhāsīti tena saddena ākaḍḍhiyamānahadayo ayoniso ummujjitvā ‘‘mahatī vata me jānī’’ti anutthunanto abhāsi. Chaḍḍitadārukaṃ viyāti vane chaḍḍitaniratthakakaḷiṅgaraṃ viya. Lāmakataroti nihīnataro. Devatā paṭhamappitaṃ āṇiṃ paṭāṇiyā nīharantī viya tena bhikkhunā vuttamatthaṃ apanentī ‘‘tassa te bahukā pihayantī’’ti avocāti vuttanti dassento ‘‘thero’’tiādimāha. Saggaṃ gacchantānaṃ yathā nerayikā pihayanti, evaṃ sammāpaṭipannassa tuyhaṃ bahū pihayanti, tasmā tvaṃ ‘‘pāpiyo’’ti attānaṃ mā maññitthāti adhippāyo.
વਜ੍ਜਿਪੁਤ੍ਤਸੁਤ੍ਤવਣ੍ਣਨਾ ਨਿਟ੍ਠਿਤਾ।
Vajjiputtasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੯. વਜ੍ਜਿਪੁਤ੍ਤਸੁਤ੍ਤਂ • 9. Vajjiputtasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੯. વਜ੍ਜਿਪੁਤ੍ਤਸੁਤ੍ਤવਣ੍ਣਨਾ • 9. Vajjiputtasuttavaṇṇanā
