| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৫. ৰজ্জিপুত্তত্থেরঅপদানৰণ্ণনা
5. Vajjiputtattheraapadānavaṇṇanā
সহস্সরংসী ভগৰাতিআদিকং আযস্মতো ৰজ্জিপুত্তত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো চতুনৰুতিকপ্পে একং পচ্চেকবুদ্ধং ভিক্খায গচ্ছন্তং দিস্ৰা পসন্নমানসো কদলিফলানি অদাসি। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে ৰেসালিযং লিচ্ছৰিরাজকুমারো হুত্ৰা নিব্বত্তি, ৰজ্জিরাজপুত্তত্তা ৰজ্জিপুত্তোত্ৰেৰস্স সমঞ্ঞা। সো দহরো হুত্ৰা হত্থিসিপ্পাদিসিক্খনকালেপি হেতুসম্পন্নতায নিস্সরণজ্ঝাসযোৰ হুত্ৰা ৰিচরন্তো সত্থু ধম্মদেসনং সুত্ৰা পটিলদ্ধসদ্ধো সত্থু সন্তিকে পব্বজিত্ৰা ৰিপস্সনায কম্মং কত্ৰা নচিরস্সেৰ ছল়ভিঞ্ঞো অহোসি। ছল়ভিঞ্ঞো পন হুত্ৰা অপরভাগে অচিরপরিনিব্বুতে সত্থরি ধম্মং সঙ্গাযিতুং সঙ্কেতং কত্ৰা মহাথেরেসু তত্থ তত্থ ৰিহরন্তেসু একদিৰসং আযস্মন্তং আনন্দং সেখংযেৰ সমানং মহতিযা পরিসায পরিৰুতং ধম্মং দেসেন্তং দিস্ৰা তস্স উপরিমগ্গাধিগমায উস্সাহং জনেন্তো –
Sahassaraṃsībhagavātiādikaṃ āyasmato vajjiputtattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayaṃ puññaṃ upacinanto ito catunavutikappe ekaṃ paccekabuddhaṃ bhikkhāya gacchantaṃ disvā pasannamānaso kadaliphalāni adāsi. So tena puññakammena devamanussesu saṃsaranto imasmiṃ buddhuppāde vesāliyaṃ licchavirājakumāro hutvā nibbatti, vajjirājaputtattā vajjiputtotvevassa samaññā. So daharo hutvā hatthisippādisikkhanakālepi hetusampannatāya nissaraṇajjhāsayova hutvā vicaranto satthu dhammadesanaṃ sutvā paṭiladdhasaddho satthu santike pabbajitvā vipassanāya kammaṃ katvā nacirasseva chaḷabhiñño ahosi. Chaḷabhiñño pana hutvā aparabhāge aciraparinibbute satthari dhammaṃ saṅgāyituṃ saṅketaṃ katvā mahātheresu tattha tattha viharantesu ekadivasaṃ āyasmantaṃ ānandaṃ sekhaṃyeva samānaṃ mahatiyā parisāya parivutaṃ dhammaṃ desentaṃ disvā tassa uparimaggādhigamāya ussāhaṃ janento –
‘‘রুক্খমূলগহনং পসক্কিয, নিব্বানং হদযস্মিং ওপিয।
‘‘Rukkhamūlagahanaṃ pasakkiya, nibbānaṃ hadayasmiṃ opiya;
ঝায গোতম মা চ পমাদো, কিং তে বিল়িবিল়িকা করিস্সতী’’তি॥ (থেরগা॰ ১১৯) – গাথং অভাসি।
Jhāya gotama mā ca pamādo, kiṃ te biḷibiḷikā karissatī’’ti. (theragā. 119) – gāthaṃ abhāsi;
তত্থ রুক্খমূলগহনন্তি রুক্খমূলভূতং গহনং, গহনঞ্হি অত্থি, ন রুক্খমূলং, রুক্খমূলঞ্চ অত্থি, ন গহনং, তেসু রুক্খমূলগ্গহণেন ঠানস্স ছাযায সম্পন্নতায ৰাতাতপপরিস্সযাভাৰং দীপেতি, গহনগ্গহণেন নিৰাতভাৰেন ৰাতপরিস্সযাভাৰং জনসম্বাধাভাৰঞ্চ দস্সেতি, তদুভযেন চ ভাৰনাযোগ্যতং। পসক্কিযাতি উপগন্ত্ৰা। নিব্বানং হদযস্মিং ওপিযাতি ‘‘এৰং মযা পটিপজ্জিত্ৰা নিব্বানং অধিগন্তব্ব’’ন্তি নিব্বুতিং হদযে ঠপেত্ৰা চিত্তে কত্ৰা। ঝাযাতি তিলক্খণূপনিজ্ঝানেন ঝায, ৰিপস্সনাভাৰনাসহিতং মগ্গভাৰনং ভাৰেহি। গোতমাতি ধম্মভণ্ডাগারিকং গোত্তেনালপতি। মা চ পমাদোতি অধিকুসলেসু ধম্মেসু মা পমাদং আপজ্জি। ইদানি যাদিসো থেরস্স পমাদো, তং পটিক্খেপৰসেন দস্সেন্তো ‘‘কিং তে বিল়িবিল়িকা করিস্সতী’’তি আহ। তত্থ বিল়িবিল়িকাতি বিল়িবিল়িকিরিযা, বিল়িবিল়িতিসদ্দপৰত্তি যথা নিরত্থকা, এৰং বিল়িবিল়িকাসদিসা জনপঞ্ঞত্তি। কিং তে করিস্সতীতি কীদিসং অত্থং তুয্হং সাধেস্সতি, তস্মা জনপঞ্ঞত্তিং পহায সদত্থপসুতো হোহীতি ওৰাদং অদাসি।
Tattha rukkhamūlagahananti rukkhamūlabhūtaṃ gahanaṃ, gahanañhi atthi, na rukkhamūlaṃ, rukkhamūlañca atthi, na gahanaṃ, tesu rukkhamūlaggahaṇena ṭhānassa chāyāya sampannatāya vātātapaparissayābhāvaṃ dīpeti, gahanaggahaṇena nivātabhāvena vātaparissayābhāvaṃ janasambādhābhāvañca dasseti, tadubhayena ca bhāvanāyogyataṃ. Pasakkiyāti upagantvā. Nibbānaṃ hadayasmiṃ opiyāti ‘‘evaṃ mayā paṭipajjitvā nibbānaṃ adhigantabba’’nti nibbutiṃ hadaye ṭhapetvā citte katvā. Jhāyāti tilakkhaṇūpanijjhānena jhāya, vipassanābhāvanāsahitaṃ maggabhāvanaṃ bhāvehi. Gotamāti dhammabhaṇḍāgārikaṃ gottenālapati. Mā ca pamādoti adhikusalesu dhammesu mā pamādaṃ āpajji. Idāni yādiso therassa pamādo, taṃ paṭikkhepavasena dassento ‘‘kiṃ te biḷibiḷikā karissatī’’ti āha. Tattha biḷibiḷikāti biḷibiḷikiriyā, biḷibiḷitisaddapavatti yathā niratthakā, evaṃ biḷibiḷikāsadisā janapaññatti. Kiṃ te karissatīti kīdisaṃ atthaṃ tuyhaṃ sādhessati, tasmā janapaññattiṃ pahāya sadatthapasuto hohīti ovādaṃ adāsi.
তং সুত্ৰা অঞ্ঞেহি ৰুত্তেন ৰিস্সগন্ধৰাযনৰচনেন সংৰেগজাতো বহুদেৰ রত্তিং চঙ্কমেন ৰীতিনামেন্তো ৰিপস্সনং উস্সুক্কাপেত্ৰা সেনাসনং পৰিসিত্ৰা মঞ্চকে নিসিন্নমত্তোৰ ‘‘কিঞ্চি সযামী’’তি সীসং বিম্বোহনমসম্পত্তং পাদং ভূমিতো উগ্গতং সরীরস্স আকাসগতক্খণেযেৰ অরহত্তং পাপুণি।
Taṃ sutvā aññehi vuttena vissagandhavāyanavacanena saṃvegajāto bahudeva rattiṃ caṅkamena vītināmento vipassanaṃ ussukkāpetvā senāsanaṃ pavisitvā mañcake nisinnamattova ‘‘kiñci sayāmī’’ti sīsaṃ bimbohanamasampattaṃ pādaṃ bhūmito uggataṃ sarīrassa ākāsagatakkhaṇeyeva arahattaṃ pāpuṇi.
৪৯. ৰজ্জিপুত্তত্থেরো অপরভাগে সোমনস্সজাতো অত্তনো পুব্বচরিতাপদানং পকাসেন্তো সহস্সরংসী ভগৰাতিআদিমাহ। তত্থ সহস্সরংসীতি এত্থ ‘‘অনেকসতসহস্সরংসী’’তি ৰত্তব্বে গাথাবন্ধসুখত্থং ‘‘সহস্সরংসী’’তি ৰুত্তন্তি ৰেদিতব্বং। সেসং সুৰিঞ্ঞেয্যমেৰাতি।
49. Vajjiputtatthero aparabhāge somanassajāto attano pubbacaritāpadānaṃ pakāsento sahassaraṃsī bhagavātiādimāha. Tattha sahassaraṃsīti ettha ‘‘anekasatasahassaraṃsī’’ti vattabbe gāthābandhasukhatthaṃ ‘‘sahassaraṃsī’’ti vuttanti veditabbaṃ. Sesaṃ suviññeyyamevāti.
ৰজ্জিপুত্তত্থেরঅপদানৰণ্ণনা সমত্তা।
Vajjiputtattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৫. ৰজ্জীপুত্তত্থেরঅপদানং • 5. Vajjīputtattheraapadānaṃ
