| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๔. วชฺชิยมาหิตสุตฺตวณฺณนา
4. Vajjiyamāhitasuttavaṇṇanā
๙๔. จตุเตฺถ วชฺชิยมาหิโตติ เอวํนามโกฯ สพฺพํ ตปนฺติ สพฺพเมว ทุกฺกรการิกํฯ สพฺพํ ตปสฺสินฺติ สพฺพํ ตปนิสฺสิตกํฯ ลูขาชีวินฺติ ทุกฺกรการิกชีวิกานุโยคํ อนุยุตฺตํฯ คารยฺหนฺติ ครหิตพฺพยุตฺตกํฯ ปสํสิยนฺติ ปสํสิตพฺพยุตฺตกํฯ เวนยิโกติ สยํ อวินีโต อเญฺญหิ วิเนตโพฺพฯ อปญฺญตฺติโกติ น กิญฺจิ ปญฺญาเปตุํ สโกฺกติฯ อถ วา เวนยิโกติ สตฺตวินาสโกฯ อปญฺญตฺติโกติ อปจฺจกฺขํ นิพฺพานํ ปญฺญาเปติ, สยํกตาทีสุ กิญฺจิ ปญฺญาเปตุํ น สโกฺกติฯ น โส ภควา เวนยิโกติ โส ภควา เอวํ ยาถาวโต ญตฺวา กุสลากุสลํ ปญฺญาเปโนฺต น อเญฺญน วิเนตโพฺพ น อญฺญสิกฺขิโตฯ เย จ ธเมฺม อุปาทาย สโตฺต ปญฺญาปิยติ, เตสํ ปญฺญาปนโต น สตฺตวินาสโก, สุวินีโต สุสิกฺขิโต สตฺตวินายโกติ อโตฺถฯ ตสฺส จ ปญฺญตฺติโย สปญฺญตฺติโยเยวาติ ทเสฺสติฯ วิมุตฺติํ วิมุจฺจโต อกุสลา ธมฺมาติ มิจฺฉาทิฎฺฐิสงฺขาตํ จิตฺตสฺส อธิมุตฺติํ อธิมุจฺจโต อกุสลา ธมฺมา วฑฺฒนฺติ นาม, ตํ สนฺธาเยตํ วุตฺตํฯ สาสเน ปน จิตฺตสฺส วิมุตฺติสงฺขาโต วิมุตฺติ กุสลานํเยว ปจฺจโย โหติฯ
94. Catutthe vajjiyamāhitoti evaṃnāmako. Sabbaṃ tapanti sabbameva dukkarakārikaṃ. Sabbaṃ tapassinti sabbaṃ tapanissitakaṃ. Lūkhājīvinti dukkarakārikajīvikānuyogaṃ anuyuttaṃ. Gārayhanti garahitabbayuttakaṃ. Pasaṃsiyanti pasaṃsitabbayuttakaṃ. Venayikoti sayaṃ avinīto aññehi vinetabbo. Apaññattikoti na kiñci paññāpetuṃ sakkoti. Atha vā venayikoti sattavināsako. Apaññattikoti apaccakkhaṃ nibbānaṃ paññāpeti, sayaṃkatādīsu kiñci paññāpetuṃ na sakkoti. Na so bhagavā venayikoti so bhagavā evaṃ yāthāvato ñatvā kusalākusalaṃ paññāpento na aññena vinetabbo na aññasikkhito. Ye ca dhamme upādāya satto paññāpiyati, tesaṃ paññāpanato na sattavināsako, suvinīto susikkhito sattavināyakoti attho. Tassa ca paññattiyo sapaññattiyoyevāti dasseti. Vimuttiṃ vimuccato akusalā dhammāti micchādiṭṭhisaṅkhātaṃ cittassa adhimuttiṃ adhimuccato akusalā dhammā vaḍḍhanti nāma, taṃ sandhāyetaṃ vuttaṃ. Sāsane pana cittassa vimuttisaṅkhāto vimutti kusalānaṃyeva paccayo hoti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๔. วชฺชิยมาหิตสุตฺตํ • 4. Vajjiyamāhitasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๔. กามโภคีสุตฺตาทิวณฺณนา • 1-4. Kāmabhogīsuttādivaṇṇanā
