| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೪. ವಜ್ಜಿಯಮಾಹಿತಸುತ್ತವಣ್ಣನಾ
4. Vajjiyamāhitasuttavaṇṇanā
೯೪. ಚತುತ್ಥೇ ವಜ್ಜಿಯಮಾಹಿತೋತಿ ಏವಂನಾಮಕೋ। ಸಬ್ಬಂ ತಪನ್ತಿ ಸಬ್ಬಮೇವ ದುಕ್ಕರಕಾರಿಕಂ। ಸಬ್ಬಂ ತಪಸ್ಸಿನ್ತಿ ಸಬ್ಬಂ ತಪನಿಸ್ಸಿತಕಂ। ಲೂಖಾಜೀವಿನ್ತಿ ದುಕ್ಕರಕಾರಿಕಜೀವಿಕಾನುಯೋಗಂ ಅನುಯುತ್ತಂ। ಗಾರಯ್ಹನ್ತಿ ಗರಹಿತಬ್ಬಯುತ್ತಕಂ। ಪಸಂಸಿಯನ್ತಿ ಪಸಂಸಿತಬ್ಬಯುತ್ತಕಂ। ವೇನಯಿಕೋತಿ ಸಯಂ ಅವಿನೀತೋ ಅಞ್ಞೇಹಿ ವಿನೇತಬ್ಬೋ। ಅಪಞ್ಞತ್ತಿಕೋತಿ ನ ಕಿಞ್ಚಿ ಪಞ್ಞಾಪೇತುಂ ಸಕ್ಕೋತಿ। ಅಥ ವಾ ವೇನಯಿಕೋತಿ ಸತ್ತವಿನಾಸಕೋ। ಅಪಞ್ಞತ್ತಿಕೋತಿ ಅಪಚ್ಚಕ್ಖಂ ನಿಬ್ಬಾನಂ ಪಞ್ಞಾಪೇತಿ, ಸಯಂಕತಾದೀಸು ಕಿಞ್ಚಿ ಪಞ್ಞಾಪೇತುಂ ನ ಸಕ್ಕೋತಿ। ನ ಸೋ ಭಗವಾ ವೇನಯಿಕೋತಿ ಸೋ ಭಗವಾ ಏವಂ ಯಾಥಾವತೋ ಞತ್ವಾ ಕುಸಲಾಕುಸಲಂ ಪಞ್ಞಾಪೇನ್ತೋ ನ ಅಞ್ಞೇನ ವಿನೇತಬ್ಬೋ ನ ಅಞ್ಞಸಿಕ್ಖಿತೋ। ಯೇ ಚ ಧಮ್ಮೇ ಉಪಾದಾಯ ಸತ್ತೋ ಪಞ್ಞಾಪಿಯತಿ, ತೇಸಂ ಪಞ್ಞಾಪನತೋ ನ ಸತ್ತವಿನಾಸಕೋ, ಸುವಿನೀತೋ ಸುಸಿಕ್ಖಿತೋ ಸತ್ತವಿನಾಯಕೋತಿ ಅತ್ಥೋ। ತಸ್ಸ ಚ ಪಞ್ಞತ್ತಿಯೋ ಸಪಞ್ಞತ್ತಿಯೋಯೇವಾತಿ ದಸ್ಸೇತಿ। ವಿಮುತ್ತಿಂ ವಿಮುಚ್ಚತೋ ಅಕುಸಲಾ ಧಮ್ಮಾತಿ ಮಿಚ್ಛಾದಿಟ್ಠಿಸಙ್ಖಾತಂ ಚಿತ್ತಸ್ಸ ಅಧಿಮುತ್ತಿಂ ಅಧಿಮುಚ್ಚತೋ ಅಕುಸಲಾ ಧಮ್ಮಾ ವಡ್ಢನ್ತಿ ನಾಮ, ತಂ ಸನ್ಧಾಯೇತಂ ವುತ್ತಂ। ಸಾಸನೇ ಪನ ಚಿತ್ತಸ್ಸ ವಿಮುತ್ತಿಸಙ್ಖಾತೋ ವಿಮುತ್ತಿ ಕುಸಲಾನಂಯೇವ ಪಚ್ಚಯೋ ಹೋತಿ।
94. Catutthe vajjiyamāhitoti evaṃnāmako. Sabbaṃ tapanti sabbameva dukkarakārikaṃ. Sabbaṃ tapassinti sabbaṃ tapanissitakaṃ. Lūkhājīvinti dukkarakārikajīvikānuyogaṃ anuyuttaṃ. Gārayhanti garahitabbayuttakaṃ. Pasaṃsiyanti pasaṃsitabbayuttakaṃ. Venayikoti sayaṃ avinīto aññehi vinetabbo. Apaññattikoti na kiñci paññāpetuṃ sakkoti. Atha vā venayikoti sattavināsako. Apaññattikoti apaccakkhaṃ nibbānaṃ paññāpeti, sayaṃkatādīsu kiñci paññāpetuṃ na sakkoti. Na so bhagavā venayikoti so bhagavā evaṃ yāthāvato ñatvā kusalākusalaṃ paññāpento na aññena vinetabbo na aññasikkhito. Ye ca dhamme upādāya satto paññāpiyati, tesaṃ paññāpanato na sattavināsako, suvinīto susikkhito sattavināyakoti attho. Tassa ca paññattiyo sapaññattiyoyevāti dasseti. Vimuttiṃ vimuccato akusalā dhammāti micchādiṭṭhisaṅkhātaṃ cittassa adhimuttiṃ adhimuccato akusalā dhammā vaḍḍhanti nāma, taṃ sandhāyetaṃ vuttaṃ. Sāsane pana cittassa vimuttisaṅkhāto vimutti kusalānaṃyeva paccayo hoti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೪. ವಜ್ಜಿಯಮಾಹಿತಸುತ್ತಂ • 4. Vajjiyamāhitasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೪. ಕಾಮಭೋಗೀಸುತ್ತಾದಿವಣ್ಣನಾ • 1-4. Kāmabhogīsuttādivaṇṇanā
