| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. வக்கலிஸுத்தங்
5. Vakkalisuttaṃ
87. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா வக்கலி கும்ப⁴காரனிவேஸனே விஹரதி ஆபா³தி⁴கோ து³க்கி²தோ பா³ள்ஹகி³லானோ. அத² கோ² ஆயஸ்மா வக்கலி உபட்டா²கே ஆமந்தேஸி – ‘‘ஏத² தும்ஹே, ஆவுஸோ, யேன ப⁴க³வா தேனுபஸங்கமத²; உபஸங்கமித்வா மம வசனேன ப⁴க³வதோ பாதே³ ஸிரஸா வந்த³த² – ‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ, ஸோ ப⁴க³வதோ பாதே³ ஸிரஸா வந்த³தீ’தி. ஏவஞ்ச வதே³த² – ‘ஸாது⁴ கிர, ப⁴ந்தே, ப⁴க³வா யேன வக்கலி பி⁴க்கு² தேனுபஸங்கமது; அனுகம்பங் உபாதா³யா’’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ, ஸோ ப⁴க³வதோ பாதே³ ஸிரஸா வந்த³தி; ஏவஞ்ச பன வதே³தி – ‘ஸாது⁴ கிர, ப⁴ந்தே, ப⁴க³வா யேன வக்கலி பி⁴க்கு² தேனுபஸங்கமது; அனுகம்பங் உபாதா³யா’’’தி. அதி⁴வாஸேஸி ப⁴க³வா துண்ஹீபா⁴வேன.
87. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena āyasmā vakkali kumbhakāranivesane viharati ābādhiko dukkhito bāḷhagilāno. Atha kho āyasmā vakkali upaṭṭhāke āmantesi – ‘‘etha tumhe, āvuso, yena bhagavā tenupasaṅkamatha; upasaṅkamitvā mama vacanena bhagavato pāde sirasā vandatha – ‘vakkali, bhante, bhikkhu ābādhiko dukkhito bāḷhagilāno, so bhagavato pāde sirasā vandatī’ti. Evañca vadetha – ‘sādhu kira, bhante, bhagavā yena vakkali bhikkhu tenupasaṅkamatu; anukampaṃ upādāyā’’’ti. ‘‘Evamāvuso’’ti kho te bhikkhū āyasmato vakkalissa paṭissutvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘vakkali, bhante, bhikkhu ābādhiko dukkhito bāḷhagilāno, so bhagavato pāde sirasā vandati; evañca pana vadeti – ‘sādhu kira, bhante, bhagavā yena vakkali bhikkhu tenupasaṅkamatu; anukampaṃ upādāyā’’’ti. Adhivāsesi bhagavā tuṇhībhāvena.
அத² கோ² ப⁴க³வா நிவாஸெத்வா பத்தசீவரமாதா³ய யேனாயஸ்மா வக்கலி தேனுபஸங்கமி. அத்³த³ஸா கோ² ஆயஸ்மா வக்கலி ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான மஞ்சகே ஸமதோ⁴ஸி 1. அத² கோ² ப⁴க³வா ஆயஸ்மந்தங் வக்கலிங் ஏதத³வோச – ‘‘அலங், வக்கலி, மா த்வங் மஞ்சகே ஸமதோ⁴ஸி. ஸந்திமானி ஆஸனானி பஞ்ஞத்தானி; தத்தா²ஹங் நிஸீதி³ஸ்ஸாமீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா ஆயஸ்மந்தங் வக்கலிங் ஏதத³வோச – ‘‘கச்சி தே, வக்கலி, க²மனீயங், கச்சி யாபனீயங், கச்சி து³க்கா² வேத³னா படிக்கமந்தி, நோ அபி⁴க்கமந்தி; படிக்கமோஸானங் பஞ்ஞாயதி, நோ அபி⁴க்கமோ’’தி? ‘‘ந மே, ப⁴ந்தே, க²மனீயங், ந யாபனீயங்; பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ’’தி. ‘‘கச்சி தே, வக்கலி, ந கிஞ்சி குக்குச்சங், ந கோசி விப்படிஸாரோ’’தி? ‘‘தக்³க⁴ மே, ப⁴ந்தே, அனப்பகங் குக்குச்சங், அனப்பகோ விப்படிஸாரோ’’தி. ‘‘கச்சி பன தங், வக்கலி, அத்தா ஸீலதோ ந உபவத³தீ’’தி? ‘‘ந கோ² மங், ப⁴ந்தே, அத்தா ஸீலதோ உபவத³தீ’’தி. ‘‘நோ சே கிர தங், வக்கலி, அத்தா ஸீலதோ உபவத³தி; அத² கிஞ்ச தே குக்குச்சங் கோ ச விப்படிஸாரோ’’தி? ‘‘சிரபடிகாஹங், ப⁴ந்தே, ப⁴க³வந்தங் த³ஸ்ஸனாய உபஸங்கமிதுகாமோ, நத்தி² ச மே காயஸ்மிங் தாவதிகா ப³லமத்தா, யாவதாஹங் 2 ப⁴க³வந்தங் த³ஸ்ஸனாய உபஸங்கமெய்ய’’ந்தி.
Atha kho bhagavā nivāsetvā pattacīvaramādāya yenāyasmā vakkali tenupasaṅkami. Addasā kho āyasmā vakkali bhagavantaṃ dūratova āgacchantaṃ. Disvāna mañcake samadhosi 3. Atha kho bhagavā āyasmantaṃ vakkaliṃ etadavoca – ‘‘alaṃ, vakkali, mā tvaṃ mañcake samadhosi. Santimāni āsanāni paññattāni; tatthāhaṃ nisīdissāmī’’ti. Nisīdi bhagavā paññatte āsane. Nisajja kho bhagavā āyasmantaṃ vakkaliṃ etadavoca – ‘‘kacci te, vakkali, khamanīyaṃ, kacci yāpanīyaṃ, kacci dukkhā vedanā paṭikkamanti, no abhikkamanti; paṭikkamosānaṃ paññāyati, no abhikkamo’’ti? ‘‘Na me, bhante, khamanīyaṃ, na yāpanīyaṃ; bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo’’ti. ‘‘Kacci te, vakkali, na kiñci kukkuccaṃ, na koci vippaṭisāro’’ti? ‘‘Taggha me, bhante, anappakaṃ kukkuccaṃ, anappako vippaṭisāro’’ti. ‘‘Kacci pana taṃ, vakkali, attā sīlato na upavadatī’’ti? ‘‘Na kho maṃ, bhante, attā sīlato upavadatī’’ti. ‘‘No ce kira taṃ, vakkali, attā sīlato upavadati; atha kiñca te kukkuccaṃ ko ca vippaṭisāro’’ti? ‘‘Cirapaṭikāhaṃ, bhante, bhagavantaṃ dassanāya upasaṅkamitukāmo, natthi ca me kāyasmiṃ tāvatikā balamattā, yāvatāhaṃ 4 bhagavantaṃ dassanāya upasaṅkameyya’’nti.
‘‘அலங் , வக்கலி, கிங் தே இமினா பூதிகாயேன தி³ட்டே²ன? யோ கோ², வக்கலி, த⁴ம்மங் பஸ்ஸதி ஸோ மங் பஸ்ஸதி; யோ மங் பஸ்ஸதி ஸோ த⁴ம்மங் பஸ்ஸதி. த⁴ம்மஞ்ஹி, வக்கலி, பஸ்ஸந்தோ மங் பஸ்ஸதி; மங் பஸ்ஸந்தோ த⁴ம்மங் பஸ்ஸதி.
‘‘Alaṃ , vakkali, kiṃ te iminā pūtikāyena diṭṭhena? Yo kho, vakkali, dhammaṃ passati so maṃ passati; yo maṃ passati so dhammaṃ passati. Dhammañhi, vakkali, passanto maṃ passati; maṃ passanto dhammaṃ passati.
‘‘தங் கிங் மஞ்ஞஸி, வக்கலி, ரூபங் நிச்சங் வா அனிச்சங் வா’’தி? ‘‘அனிச்சங் , ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’…பே॰… ஏஸோ மே அத்தாதி? ‘‘நோ ஹேதங், ப⁴ந்தே’’. ‘‘தஸ்மாதிஹ…பே॰… ஏவங் பஸ்ஸங்…பே॰… நாபரங் இத்த²த்தாயாதி பஜானாதீ’’தி.
‘‘Taṃ kiṃ maññasi, vakkali, rūpaṃ niccaṃ vā aniccaṃ vā’’ti? ‘‘Aniccaṃ , bhante’’. ‘‘Yaṃ panāniccaṃ dukkhaṃ vā taṃ sukhaṃ vā’’ti? ‘‘Dukkhaṃ, bhante’’. ‘‘Yaṃ panāniccaṃ dukkhaṃ vipariṇāmadhammaṃ, kallaṃ nu taṃ samanupassituṃ – ‘etaṃ mama, esohamasmi, eso me attā’’’ti? ‘‘No hetaṃ, bhante’’. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ, bhante’’…pe… eso me attāti? ‘‘No hetaṃ, bhante’’. ‘‘Tasmātiha…pe… evaṃ passaṃ…pe… nāparaṃ itthattāyāti pajānātī’’ti.
அத² கோ² ப⁴க³வா ஆயஸ்மந்தங் வக்கலிங் இமினா ஓவாதே³ன ஓவதி³த்வா உட்டா²யாஸனா யேன கி³ஜ்ஜ²கூடோ பப்³ப³தோ தேன பக்காமி. அத² கோ² ஆயஸ்மா வக்கலி அசிரபக்கந்தஸ்ஸ ப⁴க³வதோ உபட்டா²கே ஆமந்தேஸி – ‘‘ஏத² மங், ஆவுஸோ, மஞ்சகங் ஆரோபெத்வா யேன இஸிகி³லிபஸ்ஸங் காளஸிலா தேனுபஸங்கமத². கத²ஞ்ஹி நாம மாதி³ஸோ அந்தரக⁴ரே காலங் கத்தப்³ப³ங் மஞ்ஞெய்யா’’தி? ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா ஆயஸ்மந்தங் வக்கலிங் மஞ்சகங் ஆரோபெத்வா யேன இஸிகி³லிபஸ்ஸங் காளஸிலா தேனுபஸங்கமிங்ஸு. அத² கோ² ப⁴க³வா தஞ்ச ரத்திங் தஞ்ச தி³வாவஸேஸங் கி³ஜ்ஜ²கூடே பப்³ப³தே விஹாஸி. அத² கோ² த்³வே தே³வதாயோ அபி⁴க்கந்தாய ரத்தியா அபி⁴க்கந்தவண்ணா கேவலகப்பங் கி³ஜ்ஜ²கூடங் ஓபா⁴ஸெத்வா யேன ப⁴க³வா தேனுபஸங்கமிங்ஸு…பே॰… ஏகமந்தங் அட்ட²ங்ஸு. ஏகமந்தங் டி²தா கோ² ஏகா தே³வதா ப⁴க³வந்தங் ஏதத³வோச – ‘‘வக்கலி, ப⁴ந்தே, பி⁴க்கு² விமொக்கா²ய சேதேதீ’’தி. அபரா தே³வதா ப⁴க³வந்தங் ஏதத³வோச – ‘‘ஸோ ஹி நூன, ப⁴ந்தே, ஸுவிமுத்தோ விமுச்சிஸ்ஸதீ’’தி. இத³மவோசுங் தா தே³வதாயோ. இத³ங் வத்வா ப⁴க³வந்தங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யிங்ஸு.
Atha kho bhagavā āyasmantaṃ vakkaliṃ iminā ovādena ovaditvā uṭṭhāyāsanā yena gijjhakūṭo pabbato tena pakkāmi. Atha kho āyasmā vakkali acirapakkantassa bhagavato upaṭṭhāke āmantesi – ‘‘etha maṃ, āvuso, mañcakaṃ āropetvā yena isigilipassaṃ kāḷasilā tenupasaṅkamatha. Kathañhi nāma mādiso antaraghare kālaṃ kattabbaṃ maññeyyā’’ti? ‘‘Evamāvuso’’ti kho te bhikkhū āyasmato vakkalissa paṭissutvā āyasmantaṃ vakkaliṃ mañcakaṃ āropetvā yena isigilipassaṃ kāḷasilā tenupasaṅkamiṃsu. Atha kho bhagavā tañca rattiṃ tañca divāvasesaṃ gijjhakūṭe pabbate vihāsi. Atha kho dve devatāyo abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yena bhagavā tenupasaṅkamiṃsu…pe… ekamantaṃ aṭṭhaṃsu. Ekamantaṃ ṭhitā kho ekā devatā bhagavantaṃ etadavoca – ‘‘vakkali, bhante, bhikkhu vimokkhāya cetetī’’ti. Aparā devatā bhagavantaṃ etadavoca – ‘‘so hi nūna, bhante, suvimutto vimuccissatī’’ti. Idamavocuṃ tā devatāyo. Idaṃ vatvā bhagavantaṃ abhivādetvā padakkhiṇaṃ katvā tatthevantaradhāyiṃsu.
அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘ஏத² தும்ஹே, பி⁴க்க²வே, யேன வக்கலி பி⁴க்கு² தேனுபஸங்கமத²; உபஸங்கமித்வா வக்கலிங் பி⁴க்கு²ங் ஏவங் வதே³த² –
Atha kho bhagavā tassā rattiyā accayena bhikkhū āmantesi – ‘‘etha tumhe, bhikkhave, yena vakkali bhikkhu tenupasaṅkamatha; upasaṅkamitvā vakkaliṃ bhikkhuṃ evaṃ vadetha –
‘‘‘ஸுணாவுஸோ த்வங், வக்கலி, ப⁴க³வதோ வசனங் த்³வின்னஞ்ச தே³வதானங். இமங், ஆவுஸோ, ரத்திங் த்³வே தே³வதாயோ அபி⁴க்கந்தாய ரத்தியா அபி⁴க்கந்தவண்ணா கேவலகப்பங் கி³ஜ்ஜ²கூடங் ஓபா⁴ஸெத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ², ஆவுஸோ, ஏகா தே³வதா ப⁴க³வந்தங் ஏதத³வோச – வக்கலி, ப⁴ந்தே, பி⁴க்கு² விமொக்கா²ய சேதேதீதி. அபரா தே³வதா ப⁴க³வந்தங் ஏதத³வோச – ஸோ ஹி நூன, ப⁴ந்தே, ஸுவிமுத்தோ விமுச்சிஸ்ஸதீதி. ப⁴க³வா ச தங், ஆவுஸோ வக்கலி, ஏவமாஹ – மா பா⁴யி, வக்கலி; மா பா⁴யி, வக்கலி! அபாபகங் தே மரணங் ப⁴விஸ்ஸதி, அபாபிகா காலகிரியா’’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ படிஸ்ஸுத்வா யேனாயஸ்மா வக்கலி தேனுபஸங்கமிங்ஸு; உபஸங்கமித்வா ஆயஸ்மந்தங் வக்கலிங் ஏதத³வோசுங் – ‘‘ஸுணாவுஸோ வக்கலி, ப⁴க³வதோ வசனங் த்³வின்னஞ்ச தே³வதான’’ந்தி.
‘‘‘Suṇāvuso tvaṃ, vakkali, bhagavato vacanaṃ dvinnañca devatānaṃ. Imaṃ, āvuso, rattiṃ dve devatāyo abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho, āvuso, ekā devatā bhagavantaṃ etadavoca – vakkali, bhante, bhikkhu vimokkhāya cetetīti. Aparā devatā bhagavantaṃ etadavoca – so hi nūna, bhante, suvimutto vimuccissatīti. Bhagavā ca taṃ, āvuso vakkali, evamāha – mā bhāyi, vakkali; mā bhāyi, vakkali! Apāpakaṃ te maraṇaṃ bhavissati, apāpikā kālakiriyā’’’ti. ‘‘Evaṃ, bhante’’ti kho te bhikkhū bhagavato paṭissutvā yenāyasmā vakkali tenupasaṅkamiṃsu; upasaṅkamitvā āyasmantaṃ vakkaliṃ etadavocuṃ – ‘‘suṇāvuso vakkali, bhagavato vacanaṃ dvinnañca devatāna’’nti.
அத² கோ² ஆயஸ்மா வக்கலி உபட்டா²கே ஆமந்தேஸி – ‘‘ஏத² மங், ஆவுஸோ, மஞ்சகா ஓரோபேத². கத²ஞ்ஹி நாம மாதி³ஸோ உச்சே ஆஸனே நிஸீதி³த்வா தஸ்ஸ ப⁴க³வதோ ஸாஸனங் ஸோதப்³ப³ங் மஞ்ஞெய்யா’’தி! ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா ஆயஸ்மந்தங் வக்கலிங் மஞ்சகா ஓரோபேஸுங். ‘‘இமங், ஆவுஸோ, ரத்திங் த்³வே தே³வதாயோ அபி⁴க்கந்தாய ரத்தியா…பே॰… ஏகமந்தங் அட்ட²ங்ஸு. ஏகமந்தங் டி²தா கோ², ஆவுஸோ, ஏகா தே³வதா ப⁴க³வந்தங் ஏதத³வோச – ‘வக்கலி, ப⁴ந்தே, பி⁴க்கு² விமொக்கா²ய சேதேதீ’தி. அபரா தே³வதா ப⁴க³வந்தங் ஏதத³வோச – ‘ஸோ ஹி நூன, ப⁴ந்தே, ஸுவிமுத்தோ விமுச்சிஸ்ஸதீ’தி. ப⁴க³வா ச தங், ஆவுஸோ வக்கலி, ஏவமாஹ – ‘மா பா⁴யி, வக்கலி; மா பா⁴யி, வக்கலி! அபாபகங் தே மரணங் ப⁴விஸ்ஸதி, அபாபிகா காலகிரியா’’’தி. ‘‘தேன ஹாவுஸோ, மம வசனேன ப⁴க³வதோ பாதே³ ஸிரஸா வந்த³த² – ‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ. ஸோ ப⁴க³வதோ பாதே³ ஸிரஸா வந்த³தீ’தி. ஏவஞ்ச வதே³த² – ‘ரூபங் அனிச்சங். தாஹங், ப⁴ந்தே, ந கங்கா²மி. யத³னிச்சங் தங் து³க்க²ந்தி ந விசிகிச்சா²மி. யத³னிச்சங் து³க்க²ங் விபரிணாமத⁴ம்மங், நத்தி² மே தத்த² ச²ந்தோ³ வா ராகோ³ வா பேமங் வாதி ந விசிகிச்சா²மி. வேத³னா அனிச்சா. தாஹங், ப⁴ந்தே, ந கங்கா²மி . யத³னிச்சங் தங் து³க்க²ந்தி ந விசிகிச்சா²மி. யத³னிச்சங் து³க்க²ங் விபரிணாமத⁴ம்மங், நத்தி² மே தத்த² ச²ந்தோ³ வா ராகோ³ வா பேமங் வாதி ந விசிகிச்சா²மி. ஸஞ்ஞா… ஸங்கா²ரா அனிச்சா. தாஹங், ப⁴ந்தே, ந கங்கா²மி. யத³னிச்சங் தங் து³க்க²ந்தி ந விசிகிச்சா²மி. யத³னிச்சங் து³க்க²ங் விபரிணாமத⁴ம்மங், நத்தி² மே தத்த² ச²ந்தோ³ வா ராகோ³ வா பேமங் வாதி ந விசிகிச்சா²மி. விஞ்ஞாணங் அனிச்சங். தாஹங், ப⁴ந்தே, ந கங்கா²மி. யத³னிச்சங் தங் து³க்க²ந்தி ந விசிகிச்சா²மி. யத³னிச்சங் து³க்க²ங் விபரிணாமத⁴ம்மங், நத்தி² மே தத்த² ச²ந்தோ³ வா ராகோ³ வா பேமங் வாதி ந விசிகிச்சா²மீ’’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா பக்கமிங்ஸு. அத² கோ² ஆயஸ்மா வக்கலி அசிரபக்கந்தேஸு தேஸு பி⁴க்கூ²ஸு ஸத்த²ங் ஆஹரேஸி.
Atha kho āyasmā vakkali upaṭṭhāke āmantesi – ‘‘etha maṃ, āvuso, mañcakā oropetha. Kathañhi nāma mādiso ucce āsane nisīditvā tassa bhagavato sāsanaṃ sotabbaṃ maññeyyā’’ti! ‘‘Evamāvuso’’ti kho te bhikkhū āyasmato vakkalissa paṭissutvā āyasmantaṃ vakkaliṃ mañcakā oropesuṃ. ‘‘Imaṃ, āvuso, rattiṃ dve devatāyo abhikkantāya rattiyā…pe… ekamantaṃ aṭṭhaṃsu. Ekamantaṃ ṭhitā kho, āvuso, ekā devatā bhagavantaṃ etadavoca – ‘vakkali, bhante, bhikkhu vimokkhāya cetetī’ti. Aparā devatā bhagavantaṃ etadavoca – ‘so hi nūna, bhante, suvimutto vimuccissatī’ti. Bhagavā ca taṃ, āvuso vakkali, evamāha – ‘mā bhāyi, vakkali; mā bhāyi, vakkali! Apāpakaṃ te maraṇaṃ bhavissati, apāpikā kālakiriyā’’’ti. ‘‘Tena hāvuso, mama vacanena bhagavato pāde sirasā vandatha – ‘vakkali, bhante, bhikkhu ābādhiko dukkhito bāḷhagilāno. So bhagavato pāde sirasā vandatī’ti. Evañca vadetha – ‘rūpaṃ aniccaṃ. Tāhaṃ, bhante, na kaṅkhāmi. Yadaniccaṃ taṃ dukkhanti na vicikicchāmi. Yadaniccaṃ dukkhaṃ vipariṇāmadhammaṃ, natthi me tattha chando vā rāgo vā pemaṃ vāti na vicikicchāmi. Vedanā aniccā. Tāhaṃ, bhante, na kaṅkhāmi . Yadaniccaṃ taṃ dukkhanti na vicikicchāmi. Yadaniccaṃ dukkhaṃ vipariṇāmadhammaṃ, natthi me tattha chando vā rāgo vā pemaṃ vāti na vicikicchāmi. Saññā… saṅkhārā aniccā. Tāhaṃ, bhante, na kaṅkhāmi. Yadaniccaṃ taṃ dukkhanti na vicikicchāmi. Yadaniccaṃ dukkhaṃ vipariṇāmadhammaṃ, natthi me tattha chando vā rāgo vā pemaṃ vāti na vicikicchāmi. Viññāṇaṃ aniccaṃ. Tāhaṃ, bhante, na kaṅkhāmi. Yadaniccaṃ taṃ dukkhanti na vicikicchāmi. Yadaniccaṃ dukkhaṃ vipariṇāmadhammaṃ, natthi me tattha chando vā rāgo vā pemaṃ vāti na vicikicchāmī’’’ti. ‘‘Evamāvuso’’ti kho te bhikkhū āyasmato vakkalissa paṭissutvā pakkamiṃsu. Atha kho āyasmā vakkali acirapakkantesu tesu bhikkhūsu satthaṃ āharesi.
அத² கோ² தே பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ; ஸோ ப⁴க³வதோ பாதே³ ஸிரஸா வந்த³தி; ஏவஞ்ச வதே³தி – ‘ரூபங் அனிச்சங். தாஹங், ப⁴ந்தே, ந கங்கா²மி. யத³னிச்சங் தங் து³க்க²ந்தி ந விசிகிச்சா²மி. யத³னிச்சங் து³க்க²ங் விபரிணாமத⁴ம்மங், நத்தி² மே தத்த² ச²ந்தோ³ வா ராகோ³ வா பேமங் வாதி ந விசிகிச்சா²மி. வேத³னா… ஸஞ்ஞா… ஸங்கா²ரா … விஞ்ஞாணங் அனிச்சங். தாஹங், ப⁴ந்தே, ந கங்கா²மி. யத³னிச்சங் தங் து³க்க²ந்தி ந விசிகிச்சா²மி. யத³னிச்சங் து³க்க²ங் விபரிணாமத⁴ம்மங், நத்தி² மே தத்த² ச²ந்தோ³ வா ராகோ³ வா பேமங் வாதி ந விசிகிச்சா²மீ’’’தி.
Atha kho te bhikkhū yena bhagavā tenupasaṅkamiṃsu; upasaṅkamitvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘vakkali, bhante, bhikkhu ābādhiko dukkhito bāḷhagilāno; so bhagavato pāde sirasā vandati; evañca vadeti – ‘rūpaṃ aniccaṃ. Tāhaṃ, bhante, na kaṅkhāmi. Yadaniccaṃ taṃ dukkhanti na vicikicchāmi. Yadaniccaṃ dukkhaṃ vipariṇāmadhammaṃ, natthi me tattha chando vā rāgo vā pemaṃ vāti na vicikicchāmi. Vedanā… saññā… saṅkhārā … viññāṇaṃ aniccaṃ. Tāhaṃ, bhante, na kaṅkhāmi. Yadaniccaṃ taṃ dukkhanti na vicikicchāmi. Yadaniccaṃ dukkhaṃ vipariṇāmadhammaṃ, natthi me tattha chando vā rāgo vā pemaṃ vāti na vicikicchāmī’’’ti.
அத² கோ² ப⁴க³வா பி⁴க்கூ² ஆமந்தேஸி – ‘‘ஆயாம, பி⁴க்க²வே, யேன இஸிகி³லிபஸ்ஸங் காளஸிலா தேனுபஸங்கமிஸ்ஸாம; யத்த² வக்கலினா குலபுத்தேன ஸத்த²மாஹரித’’ந்தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். அத² கோ² ப⁴க³வா ஸம்ப³ஹுலேஹி பி⁴க்கூ²ஹி ஸத்³தி⁴ங் யேன இஸிகி³லிபஸ்ஸங் காளஸிலா தேனுபஸங்கமி. அத்³த³ஸா கோ² ப⁴க³வா ஆயஸ்மந்தங் வக்கலிங் தூ³ரதோவ மஞ்சகே விவத்தக்க²ந்த⁴ங் ஸேமானங்.
Atha kho bhagavā bhikkhū āmantesi – ‘‘āyāma, bhikkhave, yena isigilipassaṃ kāḷasilā tenupasaṅkamissāma; yattha vakkalinā kulaputtena satthamāharita’’nti. ‘‘Evaṃ, bhante’’ti kho te bhikkhū bhagavato paccassosuṃ. Atha kho bhagavā sambahulehi bhikkhūhi saddhiṃ yena isigilipassaṃ kāḷasilā tenupasaṅkami. Addasā kho bhagavā āyasmantaṃ vakkaliṃ dūratova mañcake vivattakkhandhaṃ semānaṃ.
தேன கோ² பன ஸமயேன தூ⁴மாயிதத்தங் திமிராயிதத்தங் க³ச்ச²தேவ புரிமங் தி³ஸங், க³ச்ச²தி பச்சி²மங் தி³ஸங், க³ச்ச²தி உத்தரங் தி³ஸங், க³ச்ச²தி த³க்கி²ணங் தி³ஸங், க³ச்ச²தி உத்³த⁴ங் தி³ஸங், க³ச்ச²தி அதோ⁴ தி³ஸங், க³ச்ச²தி அனுதி³ஸங். அத² கோ² ப⁴க³வா பி⁴க்கூ² ஆமந்தேஸி – ‘‘பஸ்ஸத² நோ தும்ஹே, பி⁴க்க²வே, ஏதங் தூ⁴மாயிதத்தங் திமிராயிதத்தங் க³ச்ச²தேவ புரிமங் தி³ஸங்…பே॰… க³ச்ச²தி அனுதி³ஸ’’ந்தி. ‘‘ஏவங், ப⁴ந்தே’’. ‘‘ஏஸோ கோ², பி⁴க்க²வே, மாரோ பாபிமா வக்கலிஸ்ஸ குலபுத்தஸ்ஸ விஞ்ஞாணங் ஸமன்வேஸதி 5 – ‘கத்த² வக்கலிஸ்ஸ குலபுத்தஸ்ஸ விஞ்ஞாணங் பதிட்டி²த’ந்தி? அப்பதிட்டி²தேன ச, பி⁴க்க²வே, விஞ்ஞாணேன வக்கலி குலபுத்தோ பரினிப்³பு³தோ’’தி. பஞ்சமங்.
Tena kho pana samayena dhūmāyitattaṃ timirāyitattaṃ gacchateva purimaṃ disaṃ, gacchati pacchimaṃ disaṃ, gacchati uttaraṃ disaṃ, gacchati dakkhiṇaṃ disaṃ, gacchati uddhaṃ disaṃ, gacchati adho disaṃ, gacchati anudisaṃ. Atha kho bhagavā bhikkhū āmantesi – ‘‘passatha no tumhe, bhikkhave, etaṃ dhūmāyitattaṃ timirāyitattaṃ gacchateva purimaṃ disaṃ…pe… gacchati anudisa’’nti. ‘‘Evaṃ, bhante’’. ‘‘Eso kho, bhikkhave, māro pāpimā vakkalissa kulaputtassa viññāṇaṃ samanvesati 6 – ‘kattha vakkalissa kulaputtassa viññāṇaṃ patiṭṭhita’nti? Appatiṭṭhitena ca, bhikkhave, viññāṇena vakkali kulaputto parinibbuto’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. வக்கலிஸுத்தவண்ணனா • 5. Vakkalisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. வக்கலிஸுத்தவண்ணனா • 5. Vakkalisuttavaṇṇanā
