| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. வக்கலிஸுத்தவண்ணனா
5. Vakkalisuttavaṇṇanā
87. பஞ்சமே கும்ப⁴காரனிவேஸனேதி கும்ப⁴காரஸாலாயங். தே²ரோ கிர வுத்த²வஸ்ஸோ பவாரெத்வா ப⁴க³வந்தங் த³ஸ்ஸனாய ஆக³ச்ச²தி. தஸ்ஸ நக³ரமஜ்ஜே² மஹாஆபா³தோ⁴ உப்பஜ்ஜி, பாதா³ ந வஹந்தி. அத² நங் மஞ்சகஸிவிகாய கும்ப⁴காரஸாலங் ஆஹரிங்ஸு. ஸா ச ஸாலா தேஸங் கம்மஸாலா, ந நிவேஸனஸாலா. தங் ஸந்தா⁴ய வுத்தங் ‘‘கும்ப⁴காரனிவேஸனே விஹரதீ’’தி. பா³ள்ஹகி³லானோதி அதி⁴மத்தகி³லானோ. ஸமதோ⁴ஸீதி ஸமந்ததோ அதோ⁴ஸி, சலனாகாரேன அபசிதிங் த³ஸ்ஸேஸி. வத்தங் கிரேதங் பா³ள்ஹகி³லானேனபி பு³ட்³ட⁴தரங் தி³ஸ்வா உட்டா²னாகாரேன அபசிதி த³ஸ்ஸேதப்³பா³. தேன பன ‘‘மா சலி மா சலீ’’தி வத்தப்³போ³. ஸந்திமானி ஆஸனானீதி பு³த்³த⁴காலஸ்மிஞ்ஹி ஏகஸ்ஸபி பி⁴க்கு²னோ வஸனட்டா²னே ‘‘ஸசே ஸத்தா² ஆக³ச்சி²ஸ்ஸதி, இத⁴ நிஸீதி³ஸ்ஸதீ’’தி ஆஸனங் பஞ்ஞத்தமேவ ஹோதி அந்தமஸோ ப²லகமத்தம்பி பண்ணஸந்தா²ரமத்தம்பி. க²மனீயங் யாபனீயந்தி கச்சி து³க்க²ங் க²மிதுங் இரியாபத²ங் வா யாபேதுங் ஸக்காதி புச்ச²தி. படிக்கமந்தீதி நிவத்தந்தி. அபி⁴க்கமந்தீதி அதி⁴க³ச்ச²ந்தி . படிக்கமோஸானந்தி படிக்கமோ ஏதாஸங். ஸீலதோ ந உபவத³தீதி ஸீலங் ஆரப்³ப⁴ ஸீலபா⁴வேன ந உபவத³தி. சிரபடிகாஹந்தி சிரபடிகோ அஹங், சிரதோ பட்டா²ய அஹந்தி அத்தோ². பூதிகாயேனாதி அத்தனோ ஸுவண்ணவண்ணம்பி காயங் ப⁴க³வா து⁴வபக்³க⁴ரணட்டே²ன ஏவமாஹ. யோ கோ², வக்கலி, த⁴ம்மந்தி இத⁴ ப⁴க³வா ‘‘த⁴ம்மகாயோ கோ², மஹாராஜ, ததா²க³தோ’’தி வுத்தங் த⁴ம்மகாயதங் த³ஸ்ஸேதி. நவவிதோ⁴ ஹி லோகுத்தரத⁴ம்மோ ததா²க³தஸ்ஸ காயோ நாம.
87. Pañcame kumbhakāranivesaneti kumbhakārasālāyaṃ. Thero kira vutthavasso pavāretvā bhagavantaṃ dassanāya āgacchati. Tassa nagaramajjhe mahāābādho uppajji, pādā na vahanti. Atha naṃ mañcakasivikāya kumbhakārasālaṃ āhariṃsu. Sā ca sālā tesaṃ kammasālā, na nivesanasālā. Taṃ sandhāya vuttaṃ ‘‘kumbhakāranivesane viharatī’’ti. Bāḷhagilānoti adhimattagilāno. Samadhosīti samantato adhosi, calanākārena apacitiṃ dassesi. Vattaṃ kiretaṃ bāḷhagilānenapi buḍḍhataraṃ disvā uṭṭhānākārena apaciti dassetabbā. Tena pana ‘‘mā cali mā calī’’ti vattabbo. Santimāni āsanānīti buddhakālasmiñhi ekassapi bhikkhuno vasanaṭṭhāne ‘‘sace satthā āgacchissati, idha nisīdissatī’’ti āsanaṃ paññattameva hoti antamaso phalakamattampi paṇṇasanthāramattampi. Khamanīyaṃ yāpanīyanti kacci dukkhaṃ khamituṃ iriyāpathaṃ vā yāpetuṃ sakkāti pucchati. Paṭikkamantīti nivattanti. Abhikkamantīti adhigacchanti . Paṭikkamosānanti paṭikkamo etāsaṃ. Sīlato na upavadatīti sīlaṃ ārabbha sīlabhāvena na upavadati. Cirapaṭikāhanti cirapaṭiko ahaṃ, cirato paṭṭhāya ahanti attho. Pūtikāyenāti attano suvaṇṇavaṇṇampi kāyaṃ bhagavā dhuvapaggharaṇaṭṭhena evamāha. Yo kho, vakkali, dhammanti idha bhagavā ‘‘dhammakāyo kho, mahārāja, tathāgato’’ti vuttaṃ dhammakāyataṃ dasseti. Navavidho hi lokuttaradhammo tathāgatassa kāyo nāma.
இதா³னி தே²ரஸ்ஸ திபரிவட்டத⁴ம்மதே³ஸனங் ஆரப⁴ந்தோ தங் கிங் மஞ்ஞஸீதிஆதி³மாஹ. காளஸிலாதி காளஸிலாவிஹாரோ. விமொக்கா²யாதி மக்³க³விமொக்க²த்தா²ய. ஸுவிமுத்தோ விமுச்சிஸ்ஸதீதி அரஹத்தப²லவிமுத்தியா விமுத்தோ ஹுத்வா விமுச்சிஸ்ஸதி. தா கிர தே³வதா ‘‘யேன நீஹாரேன இமினா விபஸ்ஸனா ஆரத்³தா⁴, அனந்தராயேன அரஹத்தங் பாபுணிஸ்ஸதீ’’தி ஞத்வா ஏவமாஹங்ஸு. அபாபகந்தி அலாமகங். ஸத்த²ங் ஆஹரேஸீதி தே²ரோ கிர அதி⁴மானிகோ அஹோஸி. ஸோ ஸமாதி⁴விபஸ்ஸனாஹி விக்க²ம்பி⁴தானங் கிலேஸானங் ஸமுதா³சாரங் அபஸ்ஸந்தோ ‘‘கீ²ணாஸவொம்ஹீ’’தி ஸஞ்ஞீ ஹுத்வா ‘‘கிங் மே இமினா து³க்கே²ன ஜீவிதேன? ஸத்த²ங் ஆஹரித்வா மரிஸ்ஸாமீ’’தி திகி²ணேன ஸத்தே²ன கண்ட²னாளங் சி²ந்தி³. அத²ஸ்ஸ து³க்கா² வேத³னா உப்பஜ்ஜி. ஸோ தஸ்மிங் க²ணே அத்தனோ புது²ஜ்ஜனபா⁴வங் ஞத்வா அவிஸ்ஸட்ட²கம்மட்டா²னத்தா ஸீக⁴ங் மூலகம்மட்டா²னங் ஆதா³ய ஸம்மஸந்தோ அரஹத்தங் பாபுணித்வாவ காலமகாஸி. பச்சவெக்க²ணா பனஸ்ஸ ச கத²ங் அஹோஸீதி? கீ²ணாஸவஸ்ஸ ஏகூனவீஸதி பச்சவெக்க²ணா ந ஸப்³பா³வ அவஸ்ஸங் லத்³த⁴ப்³பா³, திகி²ணேனாபி பன அஸினா ஸீஸே சி²ஜ்ஜந்தே ஏகங் த்³வே ஞாணானி அவஸ்ஸங் உப்பஜ்ஜந்தி.
Idāni therassa tiparivaṭṭadhammadesanaṃ ārabhanto taṃ kiṃ maññasītiādimāha. Kāḷasilāti kāḷasilāvihāro. Vimokkhāyāti maggavimokkhatthāya. Suvimutto vimuccissatīti arahattaphalavimuttiyā vimutto hutvā vimuccissati. Tā kira devatā ‘‘yena nīhārena iminā vipassanā āraddhā, anantarāyena arahattaṃ pāpuṇissatī’’ti ñatvā evamāhaṃsu. Apāpakanti alāmakaṃ. Satthaṃ āharesīti thero kira adhimāniko ahosi. So samādhivipassanāhi vikkhambhitānaṃ kilesānaṃ samudācāraṃ apassanto ‘‘khīṇāsavomhī’’ti saññī hutvā ‘‘kiṃ me iminā dukkhena jīvitena? Satthaṃ āharitvā marissāmī’’ti tikhiṇena satthena kaṇṭhanāḷaṃ chindi. Athassa dukkhā vedanā uppajji. So tasmiṃ khaṇe attano puthujjanabhāvaṃ ñatvā avissaṭṭhakammaṭṭhānattā sīghaṃ mūlakammaṭṭhānaṃ ādāya sammasanto arahattaṃ pāpuṇitvāva kālamakāsi. Paccavekkhaṇā panassa ca kathaṃ ahosīti? Khīṇāsavassa ekūnavīsati paccavekkhaṇā na sabbāva avassaṃ laddhabbā, tikhiṇenāpi pana asinā sīse chijjante ekaṃ dve ñāṇāni avassaṃ uppajjanti.
விவத்தக்க²ந்த⁴ந்தி பரிவத்தக்க²ந்த⁴ங். ஸேமானந்தி ஸயமானங். தே²ரோ கிர உத்தானகோ நிபன்னோ ஸத்த²ங் ஆஹரி. தஸ்ஸ ஸரீரங் யதா²டி²தமேவ அஹோஸி. ஸீஸங் பன த³க்கி²ணபஸ்ஸேன பரிவத்தித்வா அட்டா²ஸி. அரியஸாவகா ஹி யேபு⁴ய்யேன த³க்கி²ணபஸ்ஸேனேவ காலங் கரொந்தி. தேனஸ்ஸ ஸரீரங் யதா²டி²தங்யேவ அஹோஸி. ஸீஸங் பன த³க்கி²ணபஸ்ஸேன பரிவத்தித்வா டி²தங். தங் ஸந்தா⁴ய விவத்தக்க²ந்தோ⁴ நாம ஜாதோதிபி வத³ந்தி. தூ⁴மாயிதத்தந்தி தூ⁴மாயனபா⁴வங் . திமிராயிதத்தந்தி திமிராயனபா⁴வங். தூ⁴மவலாஹகங் விய திமிரவலாஹகங் விய சாதி அத்தோ². பஞ்சமங்.
Vivattakkhandhanti parivattakkhandhaṃ. Semānanti sayamānaṃ. Thero kira uttānako nipanno satthaṃ āhari. Tassa sarīraṃ yathāṭhitameva ahosi. Sīsaṃ pana dakkhiṇapassena parivattitvā aṭṭhāsi. Ariyasāvakā hi yebhuyyena dakkhiṇapasseneva kālaṃ karonti. Tenassa sarīraṃ yathāṭhitaṃyeva ahosi. Sīsaṃ pana dakkhiṇapassena parivattitvā ṭhitaṃ. Taṃ sandhāya vivattakkhandho nāma jātotipi vadanti. Dhūmāyitattanti dhūmāyanabhāvaṃ . Timirāyitattanti timirāyanabhāvaṃ. Dhūmavalāhakaṃ viya timiravalāhakaṃ viya cāti attho. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. வக்கலிஸுத்தங் • 5. Vakkalisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. வக்கலிஸுத்தவண்ணனா • 5. Vakkalisuttavaṇṇanā
