| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៥. វក្កលិសុត្តវណ្ណនា
5. Vakkalisuttavaṇṇanā
៨៧. នគរមជ្ឈេ មហាអាពាធោ ឧប្បជ្ជីតិ នគរមជ្ឈេន អាគច្ឆន្តោ កម្មសមុដ្ឋានោ មហន្តោ អាពាធោ ឧប្បជ្ជតិ។ សមន្តតោ អធោសីតិ សព្ពភាគេន បរិប្ផន្ទិ។ ឥរិយាបថំ យាបេតុន្តិ សយននិសជ្ជាទិភេទំ ឥរិយាបថំ បវត្តេតុំ។ និវត្តន្តីតិ ឱសក្កន្តិ, បរិហាយន្តីតិ អត្ថោ។ អធិគច្ឆន្តីតិ វឌ្ឍន្តិ។ សត្ថុ គុណសរីរំ នាម នវវិធលោកុត្តរធម្មាធិគមមូលន្តិ កត្វា វុត្តំ ‘‘នវវិធោ ហិ…បេ.… កាយោ នាមា’’តិ, យថា សត្តានំ កាយោ បដិសន្ធិមូលកោ។
87.Nagaramajjhe mahāābādho uppajjīti nagaramajjhena āgacchanto kammasamuṭṭhāno mahanto ābādho uppajjati. Samantato adhosīti sabbabhāgena paripphandi. Iriyāpathaṃ yāpetunti sayananisajjādibhedaṃ iriyāpathaṃ pavattetuṃ. Nivattantīti osakkanti, parihāyantīti attho. Adhigacchantīti vaḍḍhanti. Satthu guṇasarīraṃ nāma navavidhalokuttaradhammādhigamamūlanti katvā vuttaṃ ‘‘navavidho hi…pe… kāyo nāmā’’ti, yathā sattānaṃ kāyo paṭisandhimūlako.
កាឡសិលាយំ កតវិហារោ កាឡសិលាវិហារោ។ មគ្គវិមោក្ខត្ថាយាតិ អគ្គមគ្គវិមោក្ខាធិគមាយ។ ទេវតាតិ សុទ្ធាវាសទេវតា។ អលាមកំ នាម បុថុជ្ជនកាលកិរិយាយ អភាវតោ។ តេនាហ ‘‘ថេរោ កិរា’’តិអាទិ ។ ឯកំ ទ្វេ ញាណានីតិ ឯកំ ទ្វេ បច្ចវេក្ខណញាណានិ សភាវតោ អវស្សំ ឧប្បជ្ជន្តិ, អយំ ធម្មតា។ មគ្គផលនិព្ពានបច្ចវេក្ខណានិ តំតំមគ្គវុដ្ឋានេ ឧប្បជ្ជន្តិ ឯវ។ ឯកំ ទ្វេតិ វចនំ ឧប្បន្នភាវទស្សនត្ថំ វុត្តំ។
Kāḷasilāyaṃ katavihāro kāḷasilāvihāro. Maggavimokkhatthāyāti aggamaggavimokkhādhigamāya. Devatāti suddhāvāsadevatā. Alāmakaṃ nāma puthujjanakālakiriyāya abhāvato. Tenāha ‘‘thero kirā’’tiādi . Ekaṃ dve ñāṇānīti ekaṃ dve paccavekkhaṇañāṇāni sabhāvato avassaṃ uppajjanti, ayaṃ dhammatā. Maggaphalanibbānapaccavekkhaṇāni taṃtaṃmaggavuṭṭhāne uppajjanti eva. Ekaṃ dveti vacanaṃ uppannabhāvadassanatthaṃ vuttaṃ.
ធូមាយនភាវោ ធូមាការតា, តថា តិមិរាយនភាវោ។
Dhūmāyanabhāvo dhūmākāratā, tathā timirāyanabhāvo.
វក្កលិសុត្តវណ្ណនា និដ្ឋិតា។
Vakkalisuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៥. វក្កលិសុត្តំ • 5. Vakkalisuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥. វក្កលិសុត្តវណ្ណនា • 5. Vakkalisuttavaṇṇanā
